ສູນຂໍ້ມູນດີຈີຕອນ ຈະປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງລາວ


...

30.10.2018 9:56     

   ສູນຂໍ້ມູນດີຈີຕອນ ຫຼື ສູນດາຕາເຊັນເຕີ ເປັນສູນເກັບຂໍ້ມູນທີ່ທັນສະໄໝທີ່ສຸດໃນ ສປປ ລາວ ເນື່ອງຈາກວ່າ ໄດ້ຕິດຕັ້ງລະບົບໄອທີທີ່ທັນສະໄໝຢ່າງຄົບຊຸດໄວ້ໃນສູນແຫ່ງນີ້ ຊຶ່ງຈະປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ. ໃນວັນທີ 26 ຕຸລາ ຜ່ານມານີ້ ທີ່ໂຮງແຮມຄຣາວພລາ ຊາ, ລັດຖະບານຍີ່ປຸ່ນ ໄດ້ມອບ ໂຄງການສ້າງສູນຂໍ້ມູນດີຈີຕອນທີ່ນຳໃຊ້ພະລັງງານຢ່າງມີປະ ສິດທິພາບໃຫ້ແກ່ ສປປ ລາວ Lao Energy Efficiency DataCenter (LEED) ຊຶ່ງເປັນໂຄງການຊ່ວຍເຫຼືອຈາກລັດຖະບານຍີ່ປຸ່ນດ້ວຍມູນຄ່າ20 ລ້ານໂດລາ ລະຫວ່າງ ທ່ານ ຊຸມິຍະ ຄິສະນຸກິ ຫົວໜ້າອົງ ການພັດທະນາພະລັງງານໃໝ່ ແລະ ເຕັກໂນໂລຊີອຸດສາຫະກຳ ແຫ່ງປະເທດຍີີ່ປຸ່ນເປັນຜູ້ເຊັນມອບ ແລະ ເຊັນຮັບແມ່ນ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດີຈີຕອນ ກະຊວງວິທະຍາສາດ ແລະ ເຕັກໂນໂລຊີ ໂດຍການເຂົ້າຮ່ວມຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ທ່ານ ທາເຄຊິ ຮິກິຮາລະ ເອກອັກຄະລາຊະທູດຍີ່ປຸ່ນ ປະຈຳລາວ, ພ້ອມດ້ວຍແຂກຖືກເຊີນເຂົ້າຮ່ວມ. ທ່ານ ແກ້ວນະຄອນ ໄຊສຸລຽນ ໄດ້ກ່າວວ່າ: ຈຸດປະສົງຂອງໂຄງການນີ້ ເພື່ອສ້າງໃຫ້ ສປປ ລາວ ໄດ້ມີການນຳໃຊ້ເຕັກໂນໂລຊີ ທີ່ທັນສະໄໝຕາມແນວທາງຫັນເປັນອຸດສາຫະກຳ ແລະ ທັນສະໄໝ, ໂດຍສະເພາະເພື່ອພັດທະນາພື້ນຖານໂຄງລ່າງ, ສູນຂໍ້ມູນດີຈີຕອນແຫ່ງຊາດ (Data Center) ທີ່ມີເຕັກໂນໂລຊີທັນສະໄໝ, ມີຄວາມປອດໄພ ແລະ ໄດ້ມາດຕະຖານສາກົນ, ພ້ອມດຽວກັນນັ້ນກໍ່ຈະເປັນການສົ່ງເສີມການພັດ ທະນາອຸດສາຫະກຳເຕັກໂນໂລຊີດີຈີຕອນແບບຍືນຍົງ ແລະ ເປັນມິດຕໍ່ສິ່ງແວດລ້ອມ, ຫຼຸດຜ່ອນທາດອາຍກາກໂບນິກ (Co2) ຊຶ່ງເປັນໂຄງການທຳອິດ ຂອງ ສປປ ລາວ ນອນຢູ່ໃນຂອບ JCM, ໄລຍະເວລາຂອງການຈັດຕັ້ງປະຕິບັດໂຄງການ LEED ຮ່ວມກັນໄດ້ເລີ່ມແຕ່ຕົ້ນປີ 2016 ແລະ ຈະສິ້ນສຸດໂຄງການໃນທ້າຍເດືອນຕຸລານີ້, ຫຼັງຈາກນັ້ນກໍໄດ້ມອບໂອນໂຄງການ LEED ໃຫ້ຝ່າຍລາວ ກໍ່ຄືກະຊວງວິທະຍາສາດ ແລະ ເຕັກໂນໂລຊີ ເປັນຜູ້ຮັບຜິດຊອບ ເພື່ອພັດທະນາ ແລະ ບໍລິການໃຫ້ແກ່ສັງຄົມແນໃສ່ປະກອບສ່ວນການພັດ ທະນາເສດຖະກິດ-ສັງຄົມ ຂອງ ສປປ ລາວ ໃຫ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ. (ພາບ-ຂ່າວ: ພູວຽງຄຳ)