ໜັງສືພິມ ປະຊາຊົນ

ທ່ານ ກາກມາກ ນັກທິດສະດີຂອງຊົນຊັ້ນກຳມະກອນ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 05/05/2020 09:32:36 ຈຳນວນຜູ້ເຂົ້າຢ້ຽມຊົມ 2508 ຄັ້ງ

ໃນເວລາເປັນນັກສຶກສາຢູ່ມະຫາວິທະຍາໄລ, ທ່ານ ກາກມາກ ໄດ້ອຸທິດຕົນ ເພື່ອຄົ້ນຄວ້າປັດຊະຍາ, ວິຊາສັງຄົມສາດ. ນອກຈາກການຄົ້ນຄວ້າປັດຊະຍາແລ້ວ, ເພິ່ນຍັງໄດ້ສູ້ຊົນກັບຄວາມຫຍຸ້ງຍາກ ແລະ ອຸປະສັກນາໆປະການ ເພື່ອກ້າວໄປສູ່ຜົນສຳເລັດ. ທ່ານ ກາກມາກ ສາມາດຄົ້ນພົບ ຫຼັກມູນພື້ນຖານ ຈຳນວນໜຶ່ງ ໂດຍໄດ້ເລີ່ມສ້າງລັດທິມາກ ຂຶ້ນໃນຊຸມປີ 40 ຂອງສະຕະວັດທີ 19 ຢູ່ ເຢຍລະມັນ.
ລັດທິມາກ ເກີດຂຶ້ນເນື່ອງຈາກໄດ້ມີການຂະຫຍາຍຕົວທາງດ້ານສັງຄົມ, ການຕໍ່ສູ້ຊົນຊັ້ນ, ວິທະຍາສາດ ແລະ ປັດຊະຍາ. ໃນເວລານັ້ນໄດ້ເກີດມີປະຖົມປັດໄຈທາງດ້ານທິດສະດີວ່າດ້ວຍເສດຖະກິດ ແລະ ສັງຄົມ ສຳລັບລັດທິມາກ. ທ່ານ ກາກມາກ ໄດ້ຄົ້ນພົບກົດເກນພື້ນຖານທາງດ້ານເສດຖະກິດນາຍທຶນ ແລະ ກຳມະກອນ ໂດຍໄດ້ຊີ້ອອກວ່າ: ຊົນຊັ້ນກຳມະກອນ ແລະ ຊາວຜູ້ອອກ ແຮງງານ ແມ່ນຜູ້ສ້າງ ພາລະກຳປະຫວັດສາດ ໂດຍຖືວ່າ: ຊົນຊັ້ນ ແລະ ການຕໍ່ສູ້ຊົນຊັ້ນ ແມ່ນຈຸດປະສົງເປົ້າໝາຍທີ່ກ້າວໄປສູ່ການປົດປ່ອຍຕົວເອງອອກຈາກສັງຄົມແຫ່ງຄວາມມືດມົນ ແລະ ຄວາມບໍ່ຍຸຕິທຳ. ທ່ານ ກາກມາກ ເປັນນັກພຶດຕິກຳ ແລະ ນັກປະຕິວັດທີ່ກ້າແກ່ນ, ເປັນຜູ້ນຳ ແລະ ເປັນນັກທິດສະດີຂອງຊົນ ຊັ້ນກຳ ມະກອນ. ທ່ານ ກາກມາກ ໄດ້ເຂົ້າໃຈບົດ ບາດປະຫວັດສາດອັນຍິ່ງໃຫຍ່ ຂອງຊົນຊັ້ນ ຊຶ່ງເປັນກຳລັງປະຕິວັດທີ່ກ້າວໜ້າ ທີ່ສະເໝີຕົ້ນສະເໝີປາຍຢ່າງພາວະວິໄສ.
ທ່ານ ກາກມາກ ແມ່ນນັກປະຕິວັດຜູ້ໜຶ່ງ ທີ່ໄດ້ໃຫ້ກຳເນີດປັດຊະຍາມາກຊິດ ລວມມີລັດ ທິວັດຖຸນິຍົມສັດຈະວິພາກ, ລັດທິວັດຖຸນິຍົມປະຫວັດສາດ, ເສດຖະສາດການເມືອງ ແລະ ຍັງໄດ້ຮັບການຍອມຮັບຈາກບັນດານັກປາດທາງດ້ານການເມືອງທີ່ສຳຄັນ ແລະ ດີເດັ່ນຂອງໂລກ. ທ່ານ ກາກມາກ ຍັງເປັນນັກທິດສະດີຜູ້ຍິ່ງໃຫຍ່, ເປັນຜູ້ນຳທີ່ປີຊາສາມາດ, ເປັນອາຈານຜູ້ຍິ່ງໃຫຍ່ຂອງຂະບວນກຳມະກອນສາກົນ, ເປັນຜູ້ໃຫ້ກຳເນີດລັດທິກອມມູນິດວິທະຍາສາດ ຊຶ່ງເປັນທິດສະດີປ່ຽນແປງໃໝ່ ແລະ ດັດສ້າງໂລກ ໃຫ້ມີຄວາມກ້າວໜ້າຂະ ຫຍາຍຕົວ ແລະ ສັນຕິພາບ.
ທ່ານ ກາກມາກ ໄດ້ຮ່ວມກັບທ່ານ ອັງແກນ ເປັນ ຜູ້ທຳອິດທີ່ສ້າງຕັ້ງພັກຂອງຊົນຊັ້ນກຳມະກອນຂຶ້ນໃນປະຫວັດສາດການຂະຫຍາຍ ຕົວຂອງສັງຄົມມະນຸດ.