ສານສະແດງຄວາມຂອບໃຈຈາກ ສະຫາຍ ສີ ຈິ້ນຜິງ


     ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກຳມະການ ສູນກາງພັກກອມມູນິດຈີນ ປະທານປະເທດ ແຫ່ງ ສປ ຈີນ ໄດ້ສົ່ງສານສະແດງຄວາມຂອບໃຈເຖິງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ຊຶ່ງມີເນື້ອໃນດັ່ງນີ້: ເນື່ອງໃນການຢ້ຽມຢາມລັດຖະກິດທີ່ ສປປ ລາວ ຢ່າງ ປະສົບຜົນສຳເລັດອັນຈົບງາມ, ຂ້າພະເຈົ້າ ຂໍສະແດງຄວາມ ຂອບໃຈຢ່າງສຸດໃຈອີກເທື່ອໜຶ່ງ ມາຍັງສະຫາຍເລຂາທິການ ໃຫຍ່ ແລະ ໂດຍຜ່ານສະຫາຍ ໄປຍັງພັກປະຊາຊົນ ປະຕິວັດ ລາວ, ລັດຖະບານ ແລະ ປະຊາຊົນອ້າຍນ້ອງ. ໃນເວລາດຳເນີນການຢ້ຽມຢາມຄັ້ງນີ້ ຂ້າພະເຈົ້າໄດ້ພົບ ປະກັບສະຫາຍເລຂາທິການໃຫຍ່ ປະທານປະເທດ, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແລະ ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ ແລະ ບັນດາສະຫາຍການ ນຳ ພັກ-ລັດ ແຫ່ງ ສປປ ລາວ ໃນບັນຍາກາດທີ່ດີ ຊຶ່ງໄດ້ບັນລຸ ຄວາມຮັບຮູ້ສຳຄັນອັນໃໝ່ ດ້ານການເພີ່ມທະວີການແລກປ່ຽນດ້ານຍຸດທະສາດ ຊຸກຍູ້ການ ຮ່ວມມືຕົວຈິງ ເປີດກວ້າງການພົວພັນລະຫວ່າງປະຊາຊົນ ແລະ ວັດທະນະທຳ ແລະ ແໜ້ນແຟ້ນການປະສານສົມທົບ ໃນເວທີ ຫຼາຍຝ່າຍຂອງສອງປະເທດ. ຂ້າພະເຈົ້າຍັງໄດ້ພົບປະໂອ້ລົມ ກັບຜູ້ຕາງໜ້າຫຼາຍໆສະຫາຍ ຈາກວົງການສັງຄົມປະເທດ ລາວ, ແລກປ່ຽນຄຳຄິດຄຳເຫັນດ້ານການສົ່ງເສີມມິດຕະພາບ ແລະ ຄວາມເຂົ້າໃຈກັນລະຫວ່າງປະຊາຊົນສອງຊາດ. ທັງສອງ ຝ່າຍ ຍັງໄດ້ລົງນາມເຊັນສັນຍາການຮ່ວມມືຫຼາຍສະບັບ. ຂ້າ ພະເຈົ້າຮູ້ສຶກເພິ່ງພໍໃຈຢ່າງຍິ່ງຕໍ່ໝາກຜົນອັນອຸດົມສົມບູນ ຂອງ ການຢ້ຽມຢາມຄັ້ງນີ້. ໂດຍຜ່ານການຢ້ຽມຢາມ, ຂ້າພະເຈົ້າຍັງມີຄວາມຮູ້ສຶກ ຢ່າງເລິກເຊິ່ງ ຕໍ່ມິດຕະພາບສະໜິດແໜ້ນຂອງປະຊາຊົນລາວ ຕໍ່ປະຊາຊົນຈີນ, ມີຄວາມຮູ້ສຶກຢ່າງເລິກເຊິ່ງ ຕໍ່ມິດຕະພາບມູນ ເຊື້ອຍາວນານ ທີ່ມີລ້ຳຄ່າສູງລະຫວ່າງສອງຊາດຈີນ ແລະ ລາວ. ຂ້າພະເຈົ້າ ຂໍຢືນຢັນຄືນວ່າ ຝ່າຍຈີນ ຖືຄວາມສຳຄັນ ຢ່າງຍິ່ງ ຕໍ່ການພັດທະນາສາຍພົວພັນມິດຕະພາບ ກັບປະເທດ ລາວ, ຍິນດີທີ່ຈະຮ່ວມໄມ້ຮ່ວມມືກັບຝ່າຍລາວ ສືບຕໍ່ຢຶດຖືທິດ ຊີ້ນຳ ທີ່ໝັ້ນຄົງຍາວນານ ມິດຕະພາບຖານບ້ານໃກ້ເຮືອນຄຽງ ໄວ້ເນື້ອເຊື່ອໃຈກັນ ແລະ ຮ່ວມມືກັນຢ່າງຮອບດ້ານ ແລະ ນ້ຳ ໃຈບ້ານໃກ້ເຮືອນຄຽງທີ່ດີ ເພື່ອນມິດທີ່ດີ ສະຫາຍທີ່ດີ ແລະ ຄູ່ ຮ່ວມມືທີ່ດີ ເພື່ອຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບ ດ້ານ ລະຫວ່າງສອງຊາດກ້າວໜ້າພັດທະນາຢ່າງບໍ່ຢຸດຢັ້ງ ແລະ ພ້ອມກັນສ້າງສາຄູ່ຮ່ວມຊາຕາກຳ ທີ່ມີຄວາມໝາຍຍຸດທະສາດ ຂອງສອງປະເທດ. ຂໍອວຍພອນໃຫ້ພັກປະຊາຊົນ ປະຕິວັດລາວ ຈົ່ງຊີ້ນຳໆ ພາປະຊາຊົນລາວ ສືບຕໍ່ບັນລຸຜົນສຳເລັດໃໝ່ໃຫຍ່ຫຼວງກວ່າ ເກົ່າ ໃນພາລະກິດປະຕິຮູບໃໝ່ຢ່າງຮອບດ້ານ ຂໍອວຍພອນໃຫ້ ມິດຕະພາບມູນເຊື້ອຂອງສອງຊາດຈີນ ແລະ ລາວ ຈົ່ງສືບຕໍ່ພັດ ທະນາ ແລະ ໝັ້ນຄົງຂະໜົງແກ່ນຕະຫຼອດໄປ. ຂໍອວຍພອນໃຫ້ສະຫາຍເລຂາທິການໃຫຍ່ ຈົ່ງມີສຸຂະ ພາບເຂັ້ມແຂງ, ປະສົບຜົນສຳເລັດຍິ່ງໃຫຍ່ກວ່າເກົ່າ ໃນພາ ລະໜ້າທີ່ອັນສູງສົ່ງ.