ແຈ້ງຂ່າວ ການມໍລະນະກຳຂອງສະຫາຍ ຕົ່ງເຢີ ທໍ່


...

17.03.2019 12:12     

    ຄະນະບໍລິຫານສູນກາງພັກ, ສະພາແຫ່ງຊາດ, ລັດຖະບານ, ສູນກາງແນວລາວສ້າງຊາດ, ຄະນະຈັດຕັ້ງສູນກາງພັກ, ຄະນະຮັບຜິດຊອບງານຊາປະນາກິດສົບ, ຄະນະພັກຄະນະປົກຄອງແຂວງ ຫົວພັນ ແລະ ຄອບຄົວ ຕົ່ງເຢີ ທໍ່ ຂໍແຈ້ງຂ່າວຄວາມເສົ້າສະຫຼົດໃຈມາຍັງສະມາຊິກພັກ, ພະນັກງານ, ນັກຮົບ ແລະ ພີ່ນ້ອງ ຮ່ວມຊາດຊາບທົ່ວເຖິງກັນວ່າ: ສະຫາຍ ຕົ່ງເຢີ ທໍ່ ອະດີດ ກຳມະການສູນກາງພັກ ສະໄໝທີ VIII-IX, ອະດີດຮອງປະທານສູນກາງແນວລາວສ້າງຊາດ, ອະດີດ ກຳມະການສູນກາງແນວລາວສ້າງຊາດ ສະໄໝ VI-X, ອະດີດ ສະມາຊິກສະພາແຫ່ງຊາດ ຊຸດທີ III-V ເຂດເລືອກຕັ້ງທີ 8 ແຂວງຫົວພັນ, ອະດີດ ສະມາຊິກສະພາບແຫ່ງຊາດ ຊຸດທີ VI ເຂດເລືອກຕັ້ງທີ 7 ແຂວງໄຊຍະບູລີ, ພະນັກງານບຳນານ ຢູ່ສູນກາງແນວລາວສ້າງຊາດ ພາຍຫຼັງສະຫາຍໄດ້ມີການເຈັບເປັນ, ການຈັດຕັ້ງ, ຄອບຄົວຍາດພີ່ນ້ອງ, ຄະນະແພດໝໍ ໄດ້ເອົາໃຈໃສ່ປິ່ນປົວຈົນສຸດຄວາມສາມາດແຕ່ກໍບໍ່ສາມາດກອບກູ້ເອົາຊີວິດຂອງສະຫາຍໄດ້, ສະຫາຍຈຶ່ງໄດ້ເສຍຊີວິດໃນເວລາ 1 ໂມງ 00 ນາທີ ຂອງວັນທີ 14 ມີນາ 2019 ລວມອາຍຸໄດ້ 73 ປີ.
    ເພື່ອຈາລຶກຄຸນງາມຄວາມດີຂອງສະຫາຍ ຕົ່ງເຢີ ທໍ່ ເຊິ່ງເປັນໜື່ງໃນພະນັກງານການນຳຂັ້ນສູງຂອງພັກ-ລັດ ທີ່ໄດ້ອຸທິດເຫືອແຮງສະຕິປັນຍາແກ່ປະເທດຊາດ ແລະ ການປະຕິວັດ, ດ້ວຍຄວາມອາໄລອາວອນຢ່າງສຸດຊຶ້ງຕໍ່ສະຫາຍ ຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ, ສູນກາງແນວລາວສ້າງຊາດ, ຄະນະຈັດຕັ້ງສູນກາງພັກ, ຄະນະຮັບຜິດຊອບງານຊາປະນາກິດສົບ ແລະ ພິທີໄວ້ອາໄລຢ່າງເປັນທາງການເປັນເວລາ 04 ວັນ ນັບແຕ່ວັນທີ 14/03/2019 ເຖິງວັນທີ 17/03/2019 ປັດຈຸບັນ ສົບຂອງເພີ່ນໄດ້ບຳເພັນກຸສົນໄວ້ທີ່ເຮືອນຜູ້ກ່ຽວ ທີ່ບ້ານ ສົມສະໜຸກ ເມືອງຫາດຊາຍຟອງ, ນະຄອນຫຼວງວຽງຈັນ ສ່ວນວັນຊາປະນາກິດສົບ ຈະໄດ້ຈັດຂື້ນຢ່າງເປັນທາງການໃນວັນທີ 17/03/2019 ເວລາ 13 ໂມງ 00 ນາທີ ທີ່ປ່າສັກສິດທົ່ງປົ່ງ, ເມືອງສີໂຄດຕະບອງ, ນະຄອນຫຼວງວຽງຈັນ.
    ດັ່ງນັ້ນ, ຈຶ່ງແຈ້ງຂ່າວມາຍັງສະມາຊິກພັກ, ພະນັກງານ, ນັກຮົບ ແລະ ປະຊາຊົນລາວບັນດາເຜົ່າໃນຂອບເຂດທົ່ວປະເທດ ເພື່ອຊາບທົ່ວເຖິງກັນ.

ຊີວະປະຫວັດຫຍໍ້

    ສະຫາຍ ຕົ່ງເຢີ ທໍ່ ເກີດເມື່ອວັນທີ 15/04/1946 ທີ່ບ້ານຫ້ວຍບາວ, ຕາແສງ ດົງກໍ, ເມືອງໜອງແຮດ, ແຂວງ ຊຽງຂວາງ. ເປັນບຸດຂອງ ທ່ານ ເຊົາຈາ ທໍ່ ແລະ ທ່ານ ນາງ ໄມວ່າງ; ສະຫາຍ ໄດ້ສ້າງຄອບຄົວກັບ ນາງ ເຍຍວາງ ມີລູກນຳກັນ 04 ຄົນ, ຊາຍ 03 ຄົນ ແລະ ຍິງ 01 ຄົນ. ປັດຈຸບັນຢູ່ບ້ານສົມສະໜຸກ, ເມືອງຫາດຊາຍຟອງ, ນະຄອນຫຼວງວຽງຈັນ.
ການເຄື່ອນໄຫວປະຕິວັດແຕ່ລະໄລຍະ ໂດຍຫຍໍ້ດັ່ງນີ້:
ວັນທີ 16/08/1966 ໄດ້ສະໝັກເຂົ້າເຮັດການປະຕິວັດເປັນຜູ້ຕິດຕໍ່ ທ່ານ ເລົາຟົງ.
ປີ 1966-1967 ຖືກຄັດເລືອກໄປຮຽນບຳລຸງວັດທະນະທຳ ທີ່ບ້ານຊຽງລວງ ເມືອງວຽງໄຊ ແຂວງຫົວພັນ.
ປີ 1967-1968 ຖືກຊັບຊ້ອນເປັນພະນັກງານຮັບໃຊ້ໂຮງຮຽນຊີ້ນຳສຶກສາທີ່ແຂວງຫົວພັນ.
ປີ 1968-1969 ຖືກຄັດເລືອກໄປຮຽນຕໍ່ໂຮງຮຽນສ້າງຄູ ຂອງສູນກາງທີ່ຖ້ຳຄວາຍ ເມືອງວຽງໄຊ, ແຂວງຫົວພັນ.
ປີ 1969-1971 ຖືກຊັບຊ້ອນເປັນຄູສອນຢູ່ໂຮງຮຽນຊາວໜຸ່ມຊົນຊາດ ທີ່ບ້ານສາດ-ຫ້ວຍອ້ອຍ ເມືອງປົວ (ເມືອງວຽງໄຊ) ແຂວງຫົວພັນ.
ປີ 1971 ເຂົ້າພັກສຳຮອງ.
ວັນທີ 30/03/1972 ໄດ້ເຂົ້າເປັນສະມາຊິກພັກສົມບູນ ພັກປະຊາຊົນປະຕິວັດລາວ.
ປີ 1971-1974 ຖືກຄັດເລືອກໄປຮຽນທິດສະດີຊັ້ນກາງຢູ່ ສສ ຫວຽດນາມ.
ປີ 1974-1977 ຖືກຊັບຊ້ອນເປັນພະນັກງານຢູ່ຈັດຕັ້ງແຂວງຫົວພັນ.
ປີ 1977-1978 ຖືກຄັດເລືອກໄປຮຽນວຽກງານຈັດຕັ້ງກວດກາຊັ້ນກາງ ຢູ່ ສສ ຫວຽດນາມ.
1978-1981 ຖືກແຕ່ງຕັ້ງເປັນຮອງຄະນະຊີ້ນຳ ຂະບວນການຫັນເປັນສະຫະກອນກະເສດ ແຂວງຫົວພັນ.
ປີ 1981-1982 ຖືກເລືອກຕັ້ງເປັນຮອງເລຂາພັກເມືອງ, ຮອງເຈົ້າເມືອງໆ ຫົວເມືອງ ແຂວງຫົວພັນ.
ປີ 1982-1994 ຖືກເລືອກຕັ້ງເປັນກຳມະການພັກແຂວງ, ເລຂາພັກເມືອງ ເຈົ້າເມືອງຫົວເມືອງ ແຂວງຫົວພັນ.
ປີ 1992-2002 ຖືກເລືອກຕັ້ງເປັນສະມາຊິກສະພາແຫ່ງຊາດ ຊຸດທີ III-V ເຂດເລືອກຕັ້ງທີ 8 ແລະ ຖືກແຕ່ງຕັ້ງເປັນປະທານກວດກາພັກລັດ ແຂວງຫົວພັນ.
ປີ 1996-1999 ຖືກແຕ່ງຕັ້ງເປັນຄະນະພັກ, ຮອງປະທານສູນກາງແນວລາວສ້າງຊາດ.
ປີ 1999-2000 ຖືກເລືອກໄປຮຽນທິດສະດີຊັ້ນສູງ ຢູ່ ສສ ຫວຽດນາມ.
ປີ 2000-2005 ຖືກແຕ່ງຕັ້ງເປັນເລຂາຄະນະພັກ, ຮອງປະທານສູນກາງແນວລາວສ້າງຊາດ.
ປີ 2006-2010 ໄດ້ຮັບເລືອກຕັ້ງເປັນກຳມະການສູນກາງພັກ ສະໄໝທີ VIII ທັງໄດ້ຮັບເລືອກຕັ້ງເປັນເລຂາຄະນະພັກ ສູນກາງແນວລາວສ້າງຊາດ, ທັງຖືກແຕ່ງຕັ້ງເປັນຮອງປະທານຜູ້ປະຈຳການສູນກາງແນວລາວສ້າງຊາດ, ໄດ້ຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ V ເຂດເລືອກຕັ້ງທີ 7 ແຂວງໄຊຍະບູລີ, ທັງໄດ້ຮັບແຕ່ງຕັ້ງເປັນປະທານສະມາຄົມມິດຕະພາບລາວເກົາຫຼີເໜືອ.
ປີ 2011-2015 ໄດ້ຮັບເລືອກຕັ້ງເປັນກຳມະການສູນກາງພັກ ສະໄໝ IX ທັງເປັນຮອງປະທານ ຜູ້ປະຈຳການສູນກາງແນວລາວສ້າງຊາດ, ໄດ້ຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ VI ເຂດເລືອກຕັ້ງທີ 8 ແຂວງຫົວພັນ, ທັງໄດ້ຮັບການແຕ່ງຕັ້ງເປັນປະທານສະມາຄົມມິດຕະພາບລາວເກົາຫຼີເໜືອ.
ມາຮອດ ວັນທີ 22/04/2015 ຍ້ອນສຸຂະພາບ ແລະ ອາຍຸກະສຽນ ສະຫາຍ ຈິ່ງໄດ້ຂໍອອກພັກການຮັບເບ້ຍບຳນານຕາມນະໂຍບາຍຂອງພັກລັດ, ແຕ່ຍັງເປັນກຳມະການສູນກາງແນວລາວສ້າງຊາດ ຊຸດທີ X ແລະ ເປັນຫົວໜ້າຄະນະປຶກສາວຽກງານຊົນເຜົ່າ ຂອງສູນກາງແນວລາວສ້າງຊາດ ເຖິງປັດຈຸບັນ.