ສານອວຍພອນ


22.03.2019 7:57     

   ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ສົ່ງສານອວຍພອນ ເຖິງຄະນະບໍລິຫານງານສູນກາງພັກປະຊາຊົນ ປະຕິວັດລາວ, ທີ່ນະຄອນຫຼວງວຽງຈັນ ໃນວັນທີ 21 ມີນານີ້ ຊຶ່ງມີເນື້ອໃນວ່າ: ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 64 ປີ (22/3/1955- 22/3/2019), ຕາງໜ້າໃຫ້ພັກກອມມູນິດ ຫວຽດນາມ ແລະ ປະຊາຊົນ ຫວຽດນາມ, ພວກຂ້າພະເຈົ້າຂໍສົ່ງຄວາມຊົມເຊີຍອັນອົບອຸ່ນ, ຄວາມສາມັກຄີຮັກແພງຖານສະຫາຍອ້າຍນ້ອງ ແລະ ພອນໄຊອັນປະເສີດມາຍັງ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ສະມາຊິກພັກປະຊາຊົນ ປະຕິວັດລາວ ແລະ ປະຊາຊົນລາວ ທຸກຖ້ວນໜ້າ.
    ພັກກອມມູນິດ ຫວຽດນາມ ແລະ ປະຊາຊົນ ຫວຽດນາມ ຕີລາຄາສູງ ແລະ ສະແດງຄວາມຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງ, ມີຄວາມໝາຍປະຫວັດສາດ ທີ່ພັກປະຊາຊົນ ປະຕິວັດລາວ ແລະ ປະຊາຊົນລາວອ້າຍນ້ອງຍາດມາໄດ້ໃນພາລະກິດການຕໍ່ສູ້ກູ້ຊາດໃນເມື່ອກ່ອນ, ກໍຄືໃນພາລະກິດແຫ່ງການປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດໃນປັດຈຸບັນ, ໂດຍສະເພາະແມ່ນ ພາຍຫຼັງສາມປີໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນ ປະຕິວັດລາວ. ບັນດາຜົນສໍາເລັດທີ່ຍາດມາໄດ້ໃນໄລຍະທີ່ຜ່ານມາ ມີຄວາມໝາຍອັນເລິກເຊິ່ງຕໍ່ພາລະກິດການປົກປັກຮັກສາ ແລະ ສ້າງສາພັດທະນາປະເທດລາວ, ເປັນແຫຼ່ງປຸກລະດົມກໍາລັງໃຈອັນໃຫຍ່ຫຼວງໃຫ້ແກ່ ຫວຽດນາມ ໃນພາລະກິດການປ່ຽນແປງໃໝ່ ແລະ ສ້າງສາປະເທດຊາດ.ພັກ, ລັດ ແລະ ປະຊາຊົນ ຫວຽດນາມ ສະໜັບສະໜູນຢ່າງເຂັ້ມແຂງ ແລະ ຮອບດ້ານພາລະກິດແຫ່ງການປ່ຽນແປງໃໝ່ຂອງ ລາວ ແລະ ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ,ປະເທດລາວ ອ້າຍນ້ອງ ຈະສືບຕໍ່ຍາດໄດ້ຜົນສໍາເລັດອັນໃໝ່, ໃຫຍ່ຫຼວງກວ່າເກົ່າໃນພາລະກິດແຫ່ງການປ່ຽນແປງໃໝ່, ປະຕິບັດບັນດາຄາດໝາຍຂອງມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນ ປະຕິວັດລາວ ວາງອອກຢ່າງມີໄຊ, ກະກຽມ ແລະ ຈັດຕັ້ງກອງປະຊຸມໃຫຍ່ອົງຄະນະພັກແຕ່ລະຂັ້ນ, ກ້າວເຖິງການຈັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກໃນຕົ້ນປີ 2021 ໃຫ້ປະສົບຜົນສໍາເລັດ; ສ້າງສາປະເທດລາວໃຫ້ກາຍເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ ຕາມເປົ້າໝາຍສັງຄົມນິຍົມ. ພວກຂ້າພະເຈົ້າປິຕິຍິນດີເປັນຢ່າງຍິ່ງທີ່ເຫັນວ່າ ຄຽງຄູ່ກັບບັນດາຜົນສໍາເລັດອັນສໍາຄັນທີ່ສອງພັກ, ສອງລັດ ແລະ ປະຊາຊົນສອງປະເທດຍາດມາໄດ້ໃນໄລຍະທີ່ຜ່ານມາ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ຊຶ່ງມີປະທານ ໂຮ່ຈິມິນ ຜູ້ຍິ່ງໃຫຍ່ ແລະ ປະທານ ໄກສອນ ພົມວິຫານ, ປະທານສຸພານຸວົງ ທີ່ແສນເຄົາລົບຮັກ ໄດ້ກໍ່ຕັ້ງ ແລະ ຝຶກຝົນຫຼໍ່ຫຼອມ ແລະ ບັນດາການນໍາຮຸ່ນຕ່າງໆຂອງສອງພັກ, ສອງລັດ ແລະ ປະຊາຊົນສອງປະເທດ ໄດ້ເພີ່ມພູນຄູນສ້າງ, ເພີ່ມທະວີຢ່າງບໍ່ຢຸດຢັ້ງ ແລະ ຂະຫຍາຍຕົວເຂົ້າສູ່ລວງເລິກ, ແທດຕົວຈິງ ແລະ ມີປະສິດທິຜົນໃນທຸກຂົງເຂດ, ປະກອບສ່ວນຕົວຈິງເຂົ້າໃນພາລະກິດການປ່ຽນແປງໃໝ່, ການປົກປັກຮັກສາ ແລະ ສ້າງສາຢູ່ແຕ່ລະປະເທດ.
    ພັກ, ລັດ ແລະ ປະຊາຊົນ ຫວຽດນາມ ຂໍສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ການສະໜັບສະໜູນຢ່າງແຂງແຮງ, ການຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ໝົດຈິດໝົດໃຈ ແລະ ມີປະສິດທິຜົນທີ່ ພັກ, ລັດ ແລະ ປະຊາຊົນລາວອ້າຍນ້ອງໄດ້ມີໃຫ້ແກ່ ພັກ, ລັດ ແລະ ປະຊາຊົນ ຫວຽດນາມ ຕະຫຼອດໄລຍະທີ່ຜ່ານມາ ແລະ ຈະເຮັດສຸດຄວາມສາມາດຂອງຕົນຮ່ວມກັບ ພັກ, ລັດ ແລະ ປະຊາຊົນລາວ ໃນການປົກປັກຮັກສາ, ຖະໜຸຖະໜອມ ແລະ ເພີ່ມພູນສາຍພົວພັນຄວາມສາມັກຄີພິເສດ ຫວຽດນາມ-ລາວ ໃຫ້ນັບມື້ນັບຂະຫຍາຍຕົວ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ.
    ອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ-ລາວ ຈົ່ງສວຍສົດງົດງາມ ແລະ ໝັ້ນຄົງຂະນົງແກ່ນຕະຫຼອດກາລະນານ.
    ໃນໂອກາດດຽວກັນນີ້ ສະຫາຍ ຮວາງ ບິ່ງກວັນ ກຳມະການສູນກາງພັກກອມມູນິດຫວຽດນາມ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ກໍໄດ້ສົ່ງສານອວຍພອນເຖິງ ສະຫາຍ ນາງ ສູນທອນ ໄຊຍະຈັກ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ເຊັ່ນດຽວກັນ. ( ຄຕພ )