ສານສະແດງຄວາມເຫັນໃຈ


11.04.2019 9:24     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈເຖິງ ທ່ານ ລີ ນັກ ຢອນ ນາຍົກລັດຖະມົນຕີ ແຫ່ງ ສ.ເກົາຫຼີ ທີ່ ເຊອູນ ເມື່ອວັນທີ 8 ເມສາຜ່ານມານີ້ ເນື້ອໃນສານລະບຸວ່າ: ຂ້າພະເຈົ້າໄດ້ຮັບຂ່າວ ດ້ວຍຄວາມເສົ້າໂສກເສຍໃຈ ຕໍ່ເຫດການໄຟໄໝ້ປ່າຢູ່ເມືອງໂກຊອງ ແລະ ເຂດໃກ້ຄຽງ ຂອງແຂວງກັງວອນ ຂອງ ສ.ເກົາຫຼີ ໃນລະຫວ່າງ ວັນທີ 4-5 ເມສາ 2019, ຊຶ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນ ຂອງປະຊາຊົນ ສ.ເກົາຫຼີ ທີ່ອາໃສຢູ່ພື້ນທີ່ດັ່ງກ່າວເປັນຈຳນວນຫຼວງຫຼາຍ. ຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະ ໄຕ ປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນໃຈຢ່າງສຸດຊຶ້ງມາຍັງ ທ່ານ, ລັດຖະບານ ແລະ ປະຊາຊົນ ສ.ເກົາຫຼີ ໂດຍສະເພາະຜູ້ຖືກເຄາະຮ້າຍ ແລະ ຄອບຄົວຜູ້ທີ່ໄດ້ຮັບຜົນກະທົບ ຈາກເຫດການທີ່ເກີດຂຶ້ນໃນຄັ້ງນີ້. ຂ້າພະເຈົ້າເຊື່ອໝັ້ນວ່າ ດ້ວຍຄວາມເອົາໃຈໃສ່ ຢ່າງໃກ້ຊິດຂອງ ທ່ານ ແລະ ລັດຖະບານ ສ.ເກົາຫຼີ, ປະຊາຊົນ ສ.ເກົາຫຼີ ຈະສາມາດຜ່ານຜ່າຄວາມຫຍຸ້ງຍາກຈາກໄພພິບັດຄັ້ງນີ້ ແລະ ຟື້ນຟູຊີວິດການເປັນຢູ່ຂອງປະຊາຊົນຢູ່ໃນເຂດທີ່ໄດ້ຮັບຜົນກະທົບ ກັບຄືນສູ່ສະພາບປົກກະຕິໂດຍໄວ.