ສານຊົມເຊີຍ


27.05.2019 10:17     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານຊົມເຊີຍ ເຖິງ ທ່ານ ສະກ໋ອດ ໂມຣິຊັນ ນາຍົກລັດຖະມົນຕີ ແຫ່ງ ອົສຕຣາລີ ທີ່ ແຄນເບີຣາ ເນື້ອໃນສານລະບຸວ່າ: ໃນນາມ ລັດຖະບານ ແລະ ປະຊາຊົນລາວ ທຸກຖ້ວນໜ້າ ກໍຄືໃນນາມສ່ວນຕົວ, ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄໍາຊົມເຊີຍອັນຈິງໃຈມາຍັງທ່ານ ເນື່ອງໃນໂອກາດທີ່ທ່ານ ໄດ້ຮັບເລືອກໃຫ້ດໍາລົງຕໍາແໜ່ງເປັນນາຍົກລັດຖະມົນຕີ ຄົນທີ 31 ຂອງ ອົສຕຣາລີ. ຂ້າພະເຈົ້າ ມີຄວາມປິຕິຍິນດີທີ່ເຫັນວ່າ ສປປ ລາວ ແລະ ອົສຕຣາລີ ມີສາຍພົວພັນມິດຕະພາບ ແລະ ການຮ່ວມມືອັນດີ ຕະຫຼອດໄລຍະຫຼາຍທົດສະວັດທີ່ຜ່ານມາ. ປີ 2019 ນີ້ເປັນປີຄົບຮອບ 25 ປີ ການເປີດນໍາໃຊ້ຂົວມິດຕະພາບ ລາວ-ໄທ ແຫ່ງທີ 1, ຊຶ່ງເປັນການຊ່ວຍເຫຼືອຈາກ ລັດຖະບານ ແລະ ປະຊາຊົນ ອົສຕຣາລີ ອັນໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ແລະ ການເຊື່ອມໂຍງຂອງ ສປປ ລາວ ກັບພາກພື້ນ. ໃນວັນທີ 26-27 ເມສາ 2019 ທີ່ຜ່ານມາ, ພາກສ່ວນກ່ຽວຂ້ອງຂອງລາວ, ໄທ ແລະ ອົສຕຣາລີ ກໍໄດ້ຈັດກິດຈະກໍາຕ່າງໆຮ່ວມກັນ ເພື່ອສະເຫຼີມສະຫຼອງວັນດັ່ງກ່າວ ຢ່າງມີຄວາມໝາຍ ແລະ ດ້ວຍບັນຍາກາດທີ່ຟົດຟື້ນມ່ວນຊື່ນ. ຂ້າພະເຈົ້າເຊື່ອໝັ້ນວ່າ ພາຍໃຕ້ການນໍາພາຂອງທ່ານ, ອົສຕຣາລີ ຈະສືບຕໍ່ໄດ້ຮັບການພັດທະນາຈະເລີນຮຸ່ງເຮືອງຍິ່ງໆຂຶ້ນ. ພ້ອມດຽວກັນນີ້, ຂ້າພະເຈົ້າ ກໍຫວັງວ່າ ຈະໄດ້ສືບຕໍ່ເຮັດວຽກຮ່ວມກັບທ່ານ ເພື່ອສືບຕໍ່ເສີມຂະຫຍາຍສາຍພົວພັນທີ່ດີດັ່ງກ່າວ ເພື່ອຜົນປະໂຫຍດຮ່ວມກັນຂອງປະຊາຊົນສອງຊາດພວກເຮົາ. ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊອັນປະເສີດມາຍັງທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດຂອງທ່ານ