ຄະນະບໍລິຫານງານສູນກາງພັກ ປປ ລາວ ສົ່ງສານອວຍພອນວັນສ້າງຕັ້ງພັກກອມມູນິດຈີນ


04.07.2019 10:56     

   ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ໄດ້ສົ່ງສານອວຍພອນ ເຖິງ ຄະນະກຳມະການສູນກາງພັກກອມມູນິດຈີນ ເມື່ອບໍ່ດົນມານີ້ ທີ່ນະຄອນຫຼວງປັກກິ່ງ, ເນື້ອໃນສານລະບຸວ່າ:
ເນື່ອງໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 98 ປີ, ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ແລະ ສະມາຊິກພັກ ປະຊາຊົນ ປະຕິວັດລາວ ພ້ອມດ້ວຍປະຊາຊົນລາວບັນດາເຜົ່າ ຂໍສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງຄະນະກຳມະການສູນກາງພັກກອມມູນິດຈີນ, ສະມາຊິກພັກ ແລະ ປະຊາຊົນຈີນອ້າຍນ້ອງທຸກຖ້ວນໜ້າ.
ພວກຂ້າພະເຈົ້າຕີລາຄາສູງຕໍ່ວິວັດທະນາການແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກກອມມູນິດຈີນ ຕະຫຼອດໄລຍະເກືອບໜຶ່ງສະຕະວັດທີ່ຜ່ານມາ, ຊຶ່ງໄດ້ຜ່ານການທົດສອບອັນດຸເດືອດຂ້ຽວຂາດ ໃນແປວໄຟປະຕິວັດ ແລະ ໄລຍະທາງປະຫວັດສາດທີ່ສຳຄັນຂອງຊາດ, ພັກກອມມູນິດຈີນ ໄດ້ສ້າງວິລະກຳອັນລໍ້າເລີດ ໃນການນຳພາປະຊາຊົນຈີນ ຕໍ່ສູ້ຕ້ານການຮຸກຮານຂອງຕ່າງຊາດ ຈົນສາມາດປົດປ່ອຍປະເທດ ແລະ ສະຖາປະນາເປັນປະເທດ ສາທາລະນະລັດ ປະຊາຊົນຈີນ ໃນເດືອນຕຸລາ 1949, ພ້ອມທັງຍາດໄດ້ຜົນສຳເລັດຢ່າງໃຫຍ່ຫຼວງ, ຮອບດ້ານ ໃນການພັດທະນາປະເທດຊາດ ຕະຫຼອດ 70 ປີ ທີ່ຜ່ານມາ. ໃນໄລຍະໃໝ່, ພາຍໃຕ້ການນຳພາອັນຖືກຕ້ອງ, ໜັກແໜ້ນ ຂອງພັກກອມມູນິດຈີນ ໂດຍສືບຕໍ່ຢຶດໝັ້ນລັດທິມາກ, ແນວຄິດເໝົາເຈີຕົງ, ທິດສະດີເຕີ້ງສຽວຜິງ, ແນວຄິດສຳຄັນ 3 ຕົວແທນ, ທັດສະນະການພັດທະນາຢ່າງມີວິທະຍາສາດ ແລະ ແນວຄິດ ສີຈິ້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່ ຍິ່ງເຮັດໃຫ້ການນຳພາຂອງພັກ ມີຄວາມໜັກແໜ້ນ, ເຂັ້ມແຂງ ເຮັດໃຫ້ພາລະກິດແຫ່ງການປະຕິຮູບ ແລະ ເປີດປະຕູສູ່ພາຍນອກ ກໍຄືພາລະກິດແຫ່ງການກໍ່ສ້າງສັງຄົມນິຍົມທີ່ທັນສະໄໝຢ່າງຮອບດ້ານຕາມສີສັນຂອງຈີນ ສືບຕໍ່ມີຜົນສຳເລັດໃໝ່ ໃຫຍ່ຫຼວງກວ່າເກົ່າ, ສັງຄົມມີຄວາມສະຫງົບ, ປະຊາຊົນດຳລົງຊີວິດຢ່າງມີຄວາມຜາສຸກ, ມີຄວາມກົມກຽວປອງດອງ, ເສດຖະກິດມີການຂະຫຍາຍຕົວຢ່າງວ່ອງໄວ ແລະ ຕໍ່ເນື່ອງຕາມທິດຍືນຍົງ, ການພົວພັນຕ່າງປະເທດ ນັບມື້ນັບພົ້ນເດັ່ນ, ບົດບາດຂອງພັກກອມມູນິດຈີນ ແລະ ສປ ຈີນ ນັບມື້ນັບສູງເດັ່ນໃນເວທີພາກພື້ນ ແລະ ສາກົນ. ຜົນສຳເລັດອັນໃຫຍ່ຫຼວງຮອບດ້ານຂອງ ສປ ຈີນ ໄດ້ປະກອບສ່ວນອັນສຳຄັນເຂົ້າໃນການຊຸກຍູ້ເສີມຂະຫຍາຍສັນຕິພາບ, ຄວາມໝັ້ນຄົງ ແລະ ການພັດທະນາຂອງພາກພື້ນ ແລະ ຂອງໂລກ, ທັງເປັນແບບຢ່າງທີ່ດີໃຫ້ແກ່ບັນດາປະເທດທີ່ຢຶດໝັ້ນອຸດົມການເດີນຕາມເສັ້ນທາງສັງຄົມນິຍົມ ກໍຄືຊາວກອມມູນິດ ແລະ ຊາວຜູ້ອອກແຮງງານໃນທົ່ວໂລກ.
ພັກປະຊາຊົນປະຕິວັດລາວ ມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າຕະຫຼອດໄລຍະ 60 ປີ ທີ່ສອງພັກ ລາວ-ຈີນ ໄດ້ມີການພົວພັນຮ່ວມມືນຳກັນ, ການພົວພັນຮ່ວມມືສອງຝ່າຍ ນັບມື້ນັບໄດ້ຮັບການເສີມຂະຫຍາຍທັງທາງກວ້າງ, ເຂົ້າສູ່ລວງເລິກ, ອັນພົ້ນເດັ່ນແມ່ນການນຳຂັ້ນສູງສຸດຂອງສອງພັກ ໄດ້ເອກະພາບກັນລົງນາມໃນແຜນແມ່ບົດວ່າດ້ວຍຄູ່ຮ່ວມຊາຕາກຳສັງຄົມນິຍົມ ລາວ-ຈີນ ໃນທ້າຍເດືອນເມສາ ທີ່ຜ່ານມາ, ຊຶ່ງເປັນການກຳນົດທິດທາງໃຫ້ແກ່ການເພີ່ມພູນຄູນສ້າງສາຍພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ລະຫວ່າງສອງຝ່າຍໃຫ້ນັບມື້ເລິກເຊິ່ງ ແລະ ໜັກແໜ້ນໃນຍຸກສະໄໝໃໝ່.
ພັກປະຊາຊົນປະຕິວັດລາວ ຂໍສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ບັນດາຜົນສຳເລັດອັນໃຫຍ່ຫຼວງ ຮອບດ້ານ ທີ່ພັກ, ລັດຖະບານ ແລະ ປະຊາຊົນຈີນ ອ້າຍນ້ອງຍາດມາໄດ້ ໃນຕະຫຼອດໄລຍະທີ່ຜ່ານມາ. ຜົນສຳເລັດດັ່ງກ່າວ ໄດ້ເປັນບົດຮຽນອັນລຳ້ຄ່າ ແລະ ເປັນກຳລັງໃຈຢ່າງແຮງກ້າ ໃຫ້ແກ່ພັກ, ລັດ ແລະ ປະຊາຊົນລາວ ບັນດາເຜົ່າ ໃນການສືບຕໍ່ດຳເນີນພາລະກິດປົກປັກຮັັກສາ ແລະ ສ້າງສາພັດທະນາປະເທດຊາດສູ່ຈຸດໝາຍສັງຄົມນິຍົມ.
ເນື່ອງໃນໂອກາດອັນສະຫງ່າລາສີນີ້, ພວກຂ້າພະເຈົ້າຂໍອວຍພອນໃຫ້ ພັກກອມມູນິດຈີນ ທີ່ມີ ສະຫາຍເລຂາທິການໃຫຍ່ ສີຈິ້ນຜິງ ເປັນແກນນຳນັ້ນ, ຈົ່ງສືບຕໍ່ຍາດໄດ້ຜົນສຳເລັດໃໝ່, ໃຫຍ່ຫຼວງກວ່າເກົ່າ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ ກໍຄື ພາລະກິດແຫ່ງການບັນລຸເປົ້າໝາຍສູ້ຊົນ 100 ປີທຳອິດ ໃນການສ້າງສັງຄົມນິຍົມອີ່ມໜຳສຳລານຮອບດ້ານ ແລະ ການບັນລຸຈຸດໝາຍໃນການສ້າງປະເທດຈີນ ໃຫ້ເປັນປະເທດສັງຄົມນິຍົມທີ່ທັນສະໄໝ ເຂັ້ມແຂງ, ຈະເລີນຮຸ່ງເຮືອງ, ປະຊາທິປະໄຕ, ສີວິໄລ, ກົມກຽວປອງດອງ ແລະ ສວຍງາມ ໃນຕໍ່ໜ້າ.
ຂໍອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອຖານບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ເປັນຄູ່ຮ່ວມມືທີ່ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ບົນພື້ນຖານແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ຈົ່ງສືບຕໍ່ໄດ້ຮັບການເສີມຂະຫຍາຍໃຫ້ແຕກດອກອອກຜົນຍິ່ງໆຂຶ້ນ ນຳ ເອົາຜົນປະໂຫຍດຕົວຈິງມາສູ່ປະຊາຊົນສອງຊາດນັບມື້ນັບຫຼາຍຂຶ້ນ.