ສານອວຍພອນວັນຊາດອາເມຣິກາ


04.07.2019 10:55     

   ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານອວຍພອນ ເຖິງ ທ່ານ ໂດໂນ ທຣັມ ປະທານາທິບໍດີ ແຫ່ງ ສະຫະລັດ ອາເມຣິກາ ທີ່ວໍຊິງຕັນ ດີຊີ ເມື່ອວັນທີ 3 ກໍລະກົດນີ້, ເນື້ອໃນສານລະບຸວ່າ:
ເນື່ອງໃນໂອກາດວັນຊາດ ແຫ່ງ ສະຫະລັດ ອາເມຣິກາ ຄົບຮອບ 243 ປີ, ໃນນາມປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງທ່ານ ແລະ ຜ່ານທ່ານໄປຍັງ ລັດຖະບານ ແລະ ປະຊາຊົນອາເມຣິກາທຸກຖ້ວນໜ້າ.
ຂ້າພະເຈົ້າຫວັງວ່າ ສາຍພົວພັນມິດຕະພາບ ແລະ ການຮ່ວມມືອັນຍາວນານ ລະຫວ່າງ ສາທາລະນະລັດ ປະຊາທິປະ ໄຕ ປະຊາຊົນລາວ ແລະ ສະຫະລັດອາເມຣິກາ ຈະສືບຕໍ່ໄດ້ ຮັບການພັດທະນາໃຫ້ເຂັ້ມແຂງ ແລະ ຂະຫຍາຍຕົວຍິ່ງໆຂຶ້ນ ໂດຍສະເພາະຮ່ວມກັນຈັດຕັ້ງຜັນຂະຫຍາຍຖະແຫຼງການຮ່ວມ ວ່າດ້ວຍ ການເປັນຄູ່ຮ່ວມມືແບບກວມລວມຂອງ 2 ປະເທດ ໃຫ້ເກີດດອກອອກຜົນ ເພື່ອຜົນປະໂຫຍດຂອງປະຊາຊົນສອງຊາດພວກເຮົາກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນທົ່ວໂລກ.
ໃນໂອກາດດັ່ງກ່າວນີ້ ທ່ານ ສະເຫຼີມໄຊ ກົມມະສິດ ລັດ ຖະມົນຕີກະຊວງການຕ່າງປະເທດ ກໍໄດ້ສົ່ງສານອວຍພອນເຖິງ ຄູ່ຮ່ວມຕຳແໜ່ງເຊັ່ນດຽວກັນ.
.