ສານຂອງສະຫາຍປະທານ ສີ ຈິ້ນຜິງ ເຖິງ ສະຫາຍປະທານ ບຸນຍັງ ວໍລະຈິດ


30.08.2019 8:59     

    ໃນວັນທີ 21 ສິງຫາຜ່ານມາ, ສະຫາຍ ເລຂາທິການໃຫຍ່ ສີ ຈິ້ນຜິງ ປະທານປະເທດ ແຫ່ງ ສປ ຈີນ ໄດ້ສົ່ງສານທາງວາຈາ ເຖິງ ສະຫາຍ ເລຂາທິການໃຫຍ່ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ກ່ຽວກັບການສະແດງຄວາມເສົ້າສະຫຼົດໃຈຕໍ່ເຫດການລົດໂດຍສານຂົນສົ່ງນັກທ່ອງທ່ຽວຈີນ ເສຍຫຼັກຕົກເຫວ ຢູ່ລາວອັນໄດ້ເຮັດໃຫ້ນັກທ່ອງທ່ຽວຊາວຈີນຫຼາຍສິບຄົນເສຍຊີວິດ ແລະ ບາດເຈັບ. ສະຫາຍປະທານ ສີ ຈິ້ນຜິງ ໄດ້ກ່າວວ່າ: ຂ້າພະເຈົ້າໄດ້ຮັບການສະແດງຄວາມເຫັນໃຈຕໍ່ເຫດການທີ່ເກີດຂຶ້ນ ແລະ ພ້ອມນັ້ນກໍໄດ້ຊາບວ່າຝ່າຍລາວໄດ້ລະດົມກໍາລັງຈາກທຸກພາກສ່ວນ ໂດຍສະເພາະກອງກໍາລັງທະຫານ ແລະ ປະຊາຊົນເຂົ້າຊ່ວຍເຫຼືອກູ້ໄພຢ່າງເລັ່ງດ່ວນ. ການທີ່ສະຫາຍເລຂາທິການໃຫຍ່ສົ່ງສານໄປຍັງຂ້າພະເຈົ້ານັ້ນ, ເປັນການສະແດງເຖິງຄວາມສຳຄັນຢ່າງຍິ່ງຕໍ່ສາຍພົວພັນລະຫວ່າງສອງປະເທດ ຈີນ-ລາວ ກໍຄືຄວາມເອົາໃຈໃສ່ຢ່າງສູງຂອງສະຫາຍເລຂາທິການໃຫຍ່ ແລະ ທຸກພາກສ່ວນກ່ຽວຂ້ອງຂອງຝ່າຍລາວຕໍ່ການກູ້ໄພ. ຂ້າພະເຈົ້າໄດ້ຊີ້ ນໍາອົງການກ່ຽວຂ້ອງຂອງຈີນ ແລະ ໜ່ວຍປິ່ນປົວຂອງທະຫານປົດປ່ອຍປະຊາຊົນຈີນທີ່ກໍາລັງຝຶກຊ້ອມຂະບວນລົດໄຟສັນຕິພາບ-2019 ຢູ່ລາວ ເຂົ້າຮ່ວມໃນການກູ້ໄພ. ຫວັງວ່າທຸກພາກສ່ວນຂອງພາກລັດ ແລະ ກອງກໍາລັງທະຫານຈະສືບຕໍ່ປະສານສົມທົບກັນຢ່າງສະໜິດແໜ້ນ ເພື່ອເຮັດໃຫ້ການປິ່ນປົວຜູ້ທີ່ໄດ້ຮັບບາດເຈັບ ແລະ ຊ່ວຍເຫຼືອຜູ້ໄດ້ຮັບເຄາະຮ້າຍດັ່ງກ່າວດໍາເນີນໄປໂດຍດີ.
ການຮັບໃຊ້ປະຊາຊົນແມ່ນຄວາມມຸ່ງມາດປາຖະໜາຂອງສອງພັກ-ລັດ ລາວ-ຈີນ. ການທີ່ທັງສອງຝ່າຍໄດ້ຮ່ວມກັນກູ້ໄພ ແລະ ແກ້ໄຂຜົນກະທົບຂອງອຸບັດເຫດຄັ້ງນີ້ໄດ້ສະແດງເຖິງຄວາມມີນໍ້າໃຈຮ່ວມທຸກຮ່ວມສຸກລະຫວ່າງ ຈີນ ແລະ ລາວ ຕາມທິດ 4 ດີ ຄື: ບ້ານໃກ້ເຮືອນຄຽງທີ່ດີ, ເພື່ອນມິດທິີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ຂ້າພະເຈົ້າຍິນດີ ແລະ ພ້ອມຈະຮ່ວມມືກັບສະຫາຍ ເລຂາທິການໃຫຍ່ ເພື່ອສຶກສາເພີ່ມທະວີສາຍພົວພັນ ລະຫວ່າງສອງພັກ ສອງລັດ ຈີນ-ລາວ ໃຫ້ກ້າວເຂົ້າສູ່ລ່ວງເລິກ ແລະ ສ້າງຄູ່ຮ່ວມຊາຕາກໍາຮ່ວມກັນໃຫ້ປະກົດຜົນເປັນຈິງ.