ນາ­ຍົກ ສົ່ງ​ສານ​ສະ­ແດງ​ຄວາມ​ເຫັນ­ໃຈເຖິງ​ລັດ­ຖະ­ບານ​ຍີ່­ປຸ່ນ

15.10.2019 8:58     

   ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ໄດ້​ສົ່ງ​ສານ​ສະແດງ​ຄວາມ​ເຫັນໃຈ ເຖິງ ທ່ານ ຊິນ​ໂຊ ອາ​ເບະ ນາຍົກລັດຖະມົນຕີ ແຫ່ງ ຍີ່ປຸ່ນ ເມື່ອ​ວັນ​ທີ 14 ຕຸລາ​ນີ້ ທີ່ ນະຄອນຫຼວງ​ໂຕ​ກຽວ ເນື້ອ​ໃນ​ສານ​ລະບຸ​ວ່າ:
   ຂ້າພະເຈົ້າ ມີ​ຄວາມ​ເສົ້າ​ສະຫຼົດ​ໃຈ ທີ່​ໄດ້​ຮັບ​ຊາບ​ຂ່າວ ພາຍຸ​ໄຕ້​ຝຸ່ນ Hagibis ໄດ້​ພັດ​ເຂົ້າ​ພາກ​ຕາເວັນ​ອອກ​ສ່ຽງ​ໃຕ້ ແລະ ພາກ​ກາງຂອງ​ຍີ່ປຸ່ນ ໃນ​ວັນ​ທີ 12-13 ຕຸລາ 2019 ຊຶ່ງ​ໄດ້​ສ້າງ​ຄວາມ​ເສຍ​ຫາຍ​ທາງ​ດ້ານ​ຊີວິດ, ຊັບ​ສິນ, ອາຄານ​ສະຖານທີ່ ແລະ ລະບົບ​ພື້ນຖານ​ໂຄງ​ລ່າງ​ຢູ່​ເຂດ​ດັ່ງກ່າວ​ຢ່າງ​ໜັກ​ໜ່ວງ.
   ຂ້າພະເຈົ້າ ໃນ​ນາມ​ສ່ວນ​ຕົວ ກໍ​ຄື​ລັດຖະບານ ແລະ ປະຊາຊົນ ແຫ່ງ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ສະແດງ​ຄວາມ​ເຫັນໃຈ ແລະ ຂໍ​ແບ່ງ​ເບົາ​ຄວາມທຸກ​ໂສກ ມາ​ຍັງ ທ່ານ ແລະ ຜ່ານ​ທ່ານ ໄປ​ຍັງ ລັດຖະບານ ກໍ​ຄື​ປະຊາຊົນ​ຍີ່ປຸ່ນ ໂດຍ​ສະເພາະ​ຜູ້​ທີ່​ຖືກ​ເຄາະ​ຮ້າຍ ແລະ ຄອບຄົວ​ຂອງ​ເຂົາເຈົ້າ​ຈາກ​ເຫດການ​ໄພພິບັດ​ທາງ​ທຳ​ມະ​ຊາດ​ຄັ້ງ​ນີ້.
ລັດຖະບານ ແລະ ປະຊາຊົນ​ລາວ​ທຸກ​ຖ້ວນ​ໜ້າ ຂໍ​ສົ່ງ​ກໍາ​ລັງ​ໃຈ​ອັນ​ແຮງ​ກ້າ​ມາ​ຍັງ ລັດຖະບານ ແລະ ປະຊາຊົນ​ຍີ່ປຸ່ນ ແລະ ເຊື່ອ​ໝັ້ນ​ວ່າ​ພາຍ​ໃຕ້​ການ​ຊີ້​ນໍານໍາ​ພາ​ຂອງ​ທ່ານ, ປະຊາຊົນ​ຍີ່ປຸ່ນ​ ຈະ​ສາມາດ​ຜ່ານ​ຜ່າ​ອຸປະສັກ​ຕ່າງໆ​ໃນ​ການ​ແກ້​ໄຂ​ຜົນ​ກະທົບ ແລະ ຟື້ນ​ຟູ​ຄວາມ​ເສຍ​ຫາຍ​ທີ່​ເກີດ​ຈາກ​ພາຍຸ​ໄຕ້​ຝຸ່ນ​ຄັ້ງ​ນີ້​ ໃຫ້​ກັບ​ຄືນ​ສູ່​ສະພາບ​ປົກກະຕິ​ໂດຍ​ໄວ.