ຄະນະຊ່ຽວຊານສຳນັກງານກວດສອບ ແຫ່ງຊາດຈີນ ຢ້ຽມຢາມລາວ


...

09.11.2018 17:29     

   ທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ຊ່ຽວຊານຈາກ ສໍານັກງານກວດສອບແຫ່ງຊາດ ສປ ຈີນ ຊຶ່ງນໍາໂດຍ ທ່ານ ນາງ ລຽງ ລີຈູນ ຮອງຫົວໜ້າຫ້ອງການກວດສອບການບັງຄັບໃຊ້ກົດໝາຍເສດຖະກິດ ສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ ໃນຕອນເຊົ້າຂອງວັນທີ 6 ພະຈິກນີ້ ທີ່ອົງການກວດສອບ. ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 5-9 ພະຈິກນີ້. ໃນໂອກາດດັ່ງກ່າວ ທ່ານ ນາງ ວຽງທອງ ສີພັນດອນ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະຊ່ຽວຊານ ທີ່ໄດ້ເດີນທາງມາຢ້ຽມຢາມ ແລະເຮັດວຽກຢູ່ສປປ ລາວ ຊຶ່ງເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລາວ-ຈີນ ໃຫ້ນັບມື້ນັບຂະຫຍາຍຕົວ ແລະ ກ້າວເຂົ້າສູ່ລວງເລິກ ໂດຍສະເພາະ ແມ່ນການຮ່ວມມືຊ່ວຍເຫຼືອຊຶ່ງກັນ ແລະ ກັນ ລະຫວ່າງ ອົງການກວດສອບແຫ່ງລັດ ສປປ ລາວ ແລະ ສຳນັກງານກວດສອບ ແຫ່ງຊາດ ສປ ຈີນ ໃຫ້ນັບມື້ແໜ້ນແຟ້ນ ມີປະສິດທິພາບ ແລະ ປະສິດທິຜົນຍິ່ງໆຂຶ້ນ. ໃນວັນດຽວກັນ, ທີ່ອົງການກວດສອບແຫ່ງລັດ ກໍໄດ້ຈັດໃຫ້ມີກອງປະຊຸມຄະນະວິຊາການຂຶ້ນ ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງປະທານອົງການກວດສອບແຫ່ງລັດ, ຊຶ່ງກອງປະຊຸມດັ່ງກ່າວ ແມ່ນໄດ້ມີການປຶກສາຫາລື ແລະ ແລກປ່ຽນບົດຮຽນດ້ານວຽກງານກວດສອບ ລະຫວ່າງ ສອງອົງການ ພາຍໃຕ້ຫົວຂໍ້: ການກວດສອບອົງການຈັດຕັ້ງລັດ; ການກວດສອບງົບປະມານບໍລິຫານລັດ; ການແລກປ່ຽນຂໍ້ມູນການກວດສອບລະບົບໄອທີ; ການບໍລິຫານຄຸ້ມຄອງຊັບພະຍາກອນມະນຸດ ແລະ ລະບົບຄຸ້ມຄອງເອກະສານກວດສອບ. ( ຂ່າວ: ແສງຈັນ)