ທູດລາວ ຍື່ນສານແຕ່ງຕັ້ງຕໍ່ປະທານາທິບໍດີ ສີລັງກາ


...

13.05.2019 8:53     

   ທ່ານ ບຸນແນມ ຈວງຫອມ ໄດ້ຍື່ນສານແຕ່ງຕັ້ງຕໍ່ພະນະທ່ານ ໄມຕຣີພາລາ ສີຣິເຊນາ (Maithripala SIRISENA) ປະທານາທິບໍດີ ແຫ່ງ ສາທາລະນະລັດ ປະ ຊາທິປະໄຕ ສັງຄົມນິຍົມ ສີລັງກາທີ່ທຳນຽບປະທານາທິ ບໍດີ, ນະຄອນຫຼວງໂຄລົມໂບ, ປະເທດສີລັງກາ ເມື່ອບໍ່ດົນມານີ້ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ, ໂດຍມີສຳນັກງານສະຖານທູດຕັ້ງຢູ່ນະຄອນຫຼວງ ນິວເດນລີ, ປະເທດອິນເດຍ. ໃນໂອກາດດັ່ງກ່າວ, ທ່ານເອກອັກຄະລັດຖະທູດໄດ້ສະແດງຄວາມຂອບໃຈເປັນຢ່າງຍິ່ງ ແລະ ເປັນກຽດ ຢ່າງສູງ ທີ່ພະນະທ່ານປະທາ ນາທິບໍດີໄດ້ໃຫ້ກຽດຮັບສານແຕ່ງຕັ້ງດັ່ງກ່າວ ແລະ ໄດ້ໃຫ້ຄຳໝັ້ນສັນຍາວ່າ ໃນໄລຍະເວລາການປະຕິບັດໜ້າທ່ີ່ ການທູດຢູ່ ສີລັງກາ ໃນຄັ້ງນີ້ ຈະພະຍາຍາມເຮັດສຸດຄວາມສາມາດຂອງຕົນ ເພື່ອຊຸກຍູ້ສົ່ງເສີມສາຍພົວພັນມິດຕະພາບທີ່ມີມູນເຊື້ອອັນດີງາມຍາວນານ ແລະ ການຮ່ວມມືສອງຝ່າຍທີ່ມີຢູ່ແລ້ວນັ້ນ ໃຫ້ມີບາດກ້າວໃໝ່ຂະ ຫຍາຍຕົວຂຶ້ນຕື່ມ. ພ້ອມກັນນີ້, ທ່ານເອກອັກຄະລັດຖະທູດ ຍັງໄດ້ນຳເອົາຄຳຢື້ຢາມຖາມຂ່າວ ແລະ ພອນໄຊອັນປະເສີດຂອງພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ຝາກເຖິງພະນະທ່ານປະທານາທິບໍດີ ໄມຕຣີພາລາ ສີຣິເຊນາ ຈົ່ງມີສຸຂະພະລານາໄມແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ໄດ້ຮັບຜົນສຳເລັດໃນພາລະໜ້າທີ່ອັນມີກຽດຂອງພະນະທ່ານ. ທ່ານເອກອັກຄະລັດຖະທູດໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການ ຊ່ວຍເຫຼືອຂອງລັດຖະບານ ແລະ ປະຊາຊົນ ສີລັງກາ ຕໍ່ລັດຖະບານ ແລະ ປະຊາຊົນລາວ ໃນໄລຍະຜ່ານມາ ກໍຄື ການປົກປັກຮັກສາ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ໃນປັດຈຸບັນ. ສປປ ລາວ ແລະ ສີລັງກາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 20ກໍລະກົດປີ1965, ຊຶ່ງສາຍພົວພັນດັ່ງກ່າວ ໄດ້ກາຍເປັນມູນເຊື້ອອັນດີງາມ, ຍາວນານ ແລະ ມີການຮ່ວມມືທີ່ຂະຫຍາຍຕົວດີຂຶ້ນເລື້ອຍໆ, ໂດຍມີການແລກປ່ຽນການຢ້ຽມຢາມຂອງຄະນະຜູ້ແທນໃນລະດັບຕ່າງໆຂອງສອງປະເທດ, ມີການຮ່ວມມືກັນໃນຫຼາຍຂະແໜງການ, ເຊັ່ນ: ທາງດ້ານສຶກສາ, ວັດທະ ນະທຳ, ເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ ແລະ ອື່ນໆ. ສີລັງກາ ມີເນື້ອທີ່ປະເທດທັງໝົດ 65.610 ກິໂລແມັດມົນທົນ, ມີພົນລະເມືອງ 22,4 ລ້ານກວ່າຄົນ, ເປັນໜຶ່ງໃນບັນດາປະເທດສະມາຊິກສະ ມາຄົມອາຊີໃຕ້ເພື່ອການຮ່ວມມືຂົງເຂດ (ຫຼື SAARC) ກໍຄືໜຶ່ງໃນບັນດາປະເທດໃນອາຊີໃຕ້ທີ່ມີເສດຖະກິດຂະຫຍາຍຕົວໄວ (GDP 6,4% ແລະ ລາຍຮັບຕໍ່ຫົວຄົນມີ 13.847 ໂດລາ ໃນປີ 2012). ພາຍຫຼັງສິ້ນສຸດສົງຄາມກາງເມືອງໃນ10 ປີຜ່ານມາ, ລັດຖະບານໄດ້ສຸມໃສ່ການພັດທະນາໂຄງລ່າງພື້ນຖານ ກ້າວເຂົ້າເປັນປະເທດທີ່ມີລາຍຮັບລະດັບປານກາງ ແລະ ສາມາດຫຼຸດຜ່ອນຄວາມທຸກຍາກ ຍັງເຫຼືອແຕ່ 9% ຂອງພົນລະເມືອງ.