ລາວ ແລະ ຕີມໍ-ເລສເຕ ເພີ່ມທະວີການຮ່ວມມືສອງຝ່າຍ


...

07.06.2019 9:28     

   ໂດຍຕອບສະໜອງຕາມຄຳເຊີນຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະ ຊວງ ການຕ່າງປະເທດ ແຫ່ງ ສາ ທາລະນະລັດ ປະຊາທິປະໄຕ ປະຊາຊົນລາວ, ທ່ານ ດິໂອນິຊິໂອ ດາ ຄອສຕາ ບາໂບ ໂຊອາເຣສ (Dionisio da Costa Babo Soares), ລັດຖະມົນຕີກະຊວງການຕ່າງປະເທດ ແລະ ການຮ່ວມມື ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 5-8 ມິຖຸນາ 2019, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສາທາລະນະລັດ ປະຊາ ທິປະໄຕ ຕີມໍ-ເລສເຕ. ໃນວັນທີ 6 ມິຖຸນານີ້, ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງ ປະເທດ ແຫ່ງ ສປປ ລາວ ພົບປະສອງຝ່າຍກັບ ທ່ານ ດິໂອນິຊິໂອ ດາ ຄອສຕາ ບາໂບ ໂຊອາເຣສ, ພ້ອມດ້ວຍຄະນະ. ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ເປັນຄັ້ງທຳອິດ ຂອງ ທ່ານ ດິໂອນິຊິໂອ ດາ ຄອສຕາ ບາໂບ ໂຊອາເຣສ ແລະ ຄະນະ ໃນຄັ້ງນີ້, ພາຍຫຼັງທີ່ໄດ້ດຳລົງຕຳແໜ່ງເປັນລັດຖະມົນຕີຕ່າງປະເທດ ແລະ ການຮ່ວມມື ຂອງ ຕີມໍ-ເລສເຕ, ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ ແລະ ຕີມໍ-ເລສເຕ ໃຫ້ມີບາດກ້າວໃໝ່ ແລະ ຂະຫຍາຍຕົວສູງຂຶ້ນຕື່ມອີກກ້າວໜຶ່ງ. ພ້ອມນີ້, ສອງຝ່າຍ ກໍໄດ້ຕີລາຄາສູງຕໍ່ການພົວພັນຮ່ວມມືຂອງສອງປະເທດ ທີ່ມີບາດກ້າວຂະຫຍາຍຕົວຢ່າງຕັ້ງໜ້າຕະຫຼອດໄລຍະ 17 ກວ່າປີ ແຫ່ງການສ້າງຕັ້ງສາຍພົວພັນການທູດຮ່ວມກັນ ແຕ່ວັນທີ 29 ກໍລະກົດ 2002 ເປັນຕົ້ນມາ, ຊຶ່ງເຫັນໄດ້ຈາກການແລກປ່ຽນການຢ້ຽມຢາມຂອງການນຳສອງປະເທດ, ການສະໜັບສະໜູນ ຊຸກຍູ້ຊ່ວຍເຫຼືອຊຶ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ ຢ່າງສະເໝີຕົ້ນສະເໝີປາຍ. ການຮ່ວມມືດ້ານການ ຄ້າ-ການລົງທຶນ ເຫັນວ່າ ຍັງມີຂໍ້ຈຳກັດ, ສອງຝ່າຍ ສະແດງຄວາມຍິນຈະສືບຕໍ່ຊຸກຍູ້ໃຫ້ມີການຮ່ວມມືກັນຫຼາຍຂຶ້ນ ເປັນຕົ້ນແມ່ນ ການສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ເຕັກນິກ, ຂະ ແໜງການອຸດສາຫະກຳ, ຂະ ແໜງການປູກຝັງ ແລະ ລ້ຽງ ສັດ, ການຂົນສົ່ງສິນຄ້າ, ແຮງງານ, ການທ່ອງທ່ຽວ, ການຝຶກອົບຮົມວິຊາຊີບ, ການພົບປະແລກປ່ຽນຂອງພາກທຸລະກິດ, ສະພາການຄ້າ ແລະ ອຸດ ສາຫະກຳ ແລະ ອື່ນໆ, ສືບຕໍ່ຄົ້ນຄວ້າທ່າແຮງບົ່ມຊ້ອນຂອງສອງຝ່າຍ ເພື່ອຮ່ວມມືກັນໃນອະນາຄົດ ເປັນຕົ້ນແມ່ນ ການແລກປ່ຽນຄວາມຮູ້ດ້ານການປະມົງ, ການຂຸດຄົ້ນນຳ້ມັນ ແລະ ອາຍແກັສ, ການປູກກາເຟ ແລະ ເຂົ້າ, ການຮ່ວມມື ດ້ານການທ່ອງທ່ຽວ ແລະ ການ ບິນ ເພື່ອສົ່ງເສີມໃຫ້ມີການໄປມາຫາສູ່ກັນ ແລະ ຮັດແໜ້ນຄວາມເຂົ້າອົກເຂົ້າໃຈ ລະຫວ່າງ ປະຊາຊົນສອງປະເທດ ແລະ ສືບຕໍ່ຈັດຕັ້ງປະຕິບັດສັນຍາທີ່ໄດ້ລົງນາມຮ່ວມກັນແລ້ວນັ້ນ ໃຫ້ໄດ້ຮັບໝາກຜົນຢ່າງເປັນຮູບປະທຳ. ນອກຈາກນີ້, ສອງຝ່າຍ ຍັງໄດ້ລາຍງານສະພາບການພັດທະນາເສດຖະກິດ-ສັງຄົມ ໂດຍລວມໃຫ້ກັນ ແລະ ກັນຊາບ, ພ້ອມທັງແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ໃຫ້ກັນຊາບ. ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ມາຍັງ ລັດຖະບານ ແລະ ປະຊາຊົນ ຕີມໍ-ເລສເຕ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ຕໍ່ເຫດການຄູກັນນຳ້ເຂື່ອນໄຟຟ້າ ເຊປຽນ-ເຊນຳ້ນ້ອຍແຕກ, ລວມມູນຄ່າ 750.000 ໂດລາສະຫະລັດ, ຊຶ່ງໄດ້ປະກອບສ່ວນອັນສຳຄັນໃນການຟື້ນຟູຊີວິດການເປັນຢູ່ຂອງປະຊາຊົນລາວ ທີ່ໄດ້ຮັບຜົນກະທົບຢູ່ໃນເຂດດັ່ງກ່າວ ໃຫ້ກັບສູ່ສະພາບປົກກະຕິໂດຍໄວ, ສະແດງຄວາມຍິນດີທີ່ ຕີມໍ-ເລສເຕ ມີແຜນຈະຈັດພິທີສະເຫຼີມສະຫຼອງວັນຄົບຮອບ 20 ປີ ແຫ່ງການລົງປະຊາມະຕິຂອງປະຊາຊົນ ຕີມໍ-ເລສເຕ ໃນທ້າຍເດືອນ ສິງຫາ ນີ້ ແລະ ຊົມເຊີຍຕໍ່ຜົນສຳເລັດທີ່ ຕີມໍ-ເລສເຕ ຍາດມາໄດ້ຕະຫຼອດໄລຍະ 20 ກວ່າປີ ພາຍຫຼັງທີ່ແຍກຕົວເປັນເອກະລາດ ເຫັນໄດ້ຈາກປະເທດຊາດ ໄດ້ຮັບການພັດທະນາ, ເສດຖະກິດ ມີການຂະຫຍາຍຕົວ, ສັງຄົມມີຄວາມສະຫງົບສຸກ ແລະ ມີສະຖຽນລະພາບທາງດ້ານການເມືອງ ເຮັດໃຫ້ບົດບາດຂອງ ຕີມໍ-ເລສເຕ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ, ຊຶ່ງຈະເປັນປະຖົມປັດໄຈອັນສຳຄັນ ເພື່ອເຮັດໃຫ້ ຕີມໍ-ເລສເຕ ເຂົ້າເປັນສະມາຊິກອາຊຽນໃນອະນາຄົດ. ພ້ອມນີ້ ສປປ ລາວ ປຶກສາຫາລືກ່ຽວກັບການສະໜັບສະໜູນ ຕີມໍ-ເລສເຕ ໃນການສະໝັກເຂົ້າເປັນສະມາຊິກອາຊຽນ, ຊຶ່ງໃນໄລຍະຜ່ານມາ ສປປ ລາວ ໄດ້ໃຫ້ການສະໜັບສະໜູນໃນຂະບວນການຕ່າງໆ. ທ່ານລັດຖະມົນຕີ ດິໂອນິຊິໂອ ດາ ຄອສຕາ ບາໂບ ໂຊອາເຣສ ກໍໄດ້ສະແດງຄວາມຂອບໃຈມາຍັງ ພັກ, ລັດຖະບານ ສປປ ລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນຕໍ່ການມາຢ້ຽມຢາມ ສປປ ລາວ ໃນຄັ້ງນີ້ ແລະ ສະແດງຄວາມຂອບໃຈ ທີ່ຝ່າຍລາວ ໄດ້ໃຫ້ການຊ່ວຍເຫຼືອປຶກສາຫາລືການສະໝັກເຂົ້າເປັນສະມາຊິກອາຊຽນຂອງ ຕີມໍ-ເລສເຕ ໃນໄລຍະຜ່ານມາ, ພ້ອມທັງສະແດງຄວາມຍິນດີສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ໃຫ້ນັບມື້ໄດ້ຮັບການຍົກລະດັບສູງຂຶ້ນ ແລະ ມີບາດກ້າວອັນໃໝ່ໃນອະນາຄົດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ. (ຂ່າວ: ກະຊວງການຕ່າງປະເທດ)