ຮອງນາຍົກລັດຖະມົນຕີ ແຫ່ງ ສສ ຫວຽດນາມ ຢ້ຽມຢາມເຮັດວຽກຢູ່ ສປປ ລາວ


...

25.06.2019 10:59     

   ໂດຍຕອບສະໜອງຕາມ ຄຳເຊີນຂອງສະຫາຍ ສອນໄຊ ສີພັນດອນ ຮອງນາຍົກລັດຖະ ມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຈິງ ດິງ ຢຸງ ຮອງນາຍົກ ລັດຖະມົນຕີ ແຫ່ງ ສສ ຫວຽດ ນາມ ພ້ອມດ້ວຍ ຄະນະໄດ້ເດີນ ທາງມາຢ້ຽມຢາມເຮັດວຽກ ຢູ່ ສປປ ລາວ, ໃນລະຫວ່າງ ວັນທີ 24-25 ມິຖຸນານີ້, ເພື່ອ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ. ໃນວັນທີ 24 ມິຖຸນານີ້, ທີ່ຫໍປະຊຸມແຫ່ງຊາດ, ສະຫາຍ ສອນໄຊ ສີພັນດອນ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ສະຫາຍ ຈິງ ດິງ ຢຸງ. ກອງປະຊຸມພົບປະສອງຝ່າຍໄດ້ດຳເນີນໄປດ້ວຍບັນຍາກາດອັນອົບອຸ່ນ, ໄມຕີຈິດມິດຕະພາບ ແລະ ຄວາມສາມັກຄີຮັກແພງອັນສະໜິດສະໜົມ. ໃນໂອກາດນີ້, ສະຫາຍ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຮັດວຽກຢູ່ ສປປ ລາວ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີ ແລະ ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານແລ້ວນັ້ນໃຫ້ມີຄວາມແໜ້ນແຟ້ນ ແລະ ມີປະສິດທິຜົນສູງຂຶ້ນກວ່າເກົ່າ. ສອງຝ່າຍ ໄດ້ຕີລາຄາຄືນເຖິງໝາກຜົນຂອງການຮ່ວມມືສອງຝ່າຍ ລາວ-ຫວຽດນາມ ໃນໄລຍະຜ່ານມາ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ. ການພົວພັນຮ່ວມມືສອງຝ່າຍດ້ານການເມືອງ ແມ່ນຢູ່ໃນລະດັບສູງສຸດ ເຫັນໄດ້ຈາກການນຳສູງສຸດ ພັກ-ລັດ ທັງສອງປະເທດ ໄດ້ມີການໄປມາຫາສູ່ກັນຢ່າງເປັນປົກກະຕິ. ສອງຝ່າຍ ໄດ້ຕີລາຄາສູງຕໍ່ ພັກ-ລັດຖະບານ ຂອງສອງປະເທດ ທີ່ໄດ້ເອົາໃຈໃສ່ໃນການຊຸກຍູ້ການພົວພັນຮ່ວມມືດ້ານເສດຖະກິດຂອງສອງຝ່າຍ ໂດຍສະເພາະແມ່ນການຈັດຕັ້ງປະຕິບັດບັນດາຂໍ້ຕົກລົງການຮ່ວມມືຕ່າງໆ ລະຫວ່າງສອງປະເທດ ໃນບົດບັນທຶກຄວາມເຂົ້າໃຈຂອງສອງກົມການເມືອງ, ບົດບັນທຶກຂອງກອງປະຊຸມຄັ້ງທີ 41 ຂອງ ສອງຄະນະກຳມະການຮ່ວມມື ລາວ-ຫວຽດນາມ ກໍຄືຂໍ້ຕົກລົງຮ່ວມມືປະຈຳປີ 2019 ແລະ ເອກະສານຮ່ວມມືອື່ນໆທີ່ສອງຝ່າຍໄດ້ມີການຕົກລົງຮ່ວມກັນ. ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ນສືບຕໍ່ຮ່ວມມືກັນຢ່າງແໜ້ນແຟ້ນ ເພື່ອປົກປັກຮັກສາຜືນແຜ່ນດິນອັນຄົບຖ້ວນ ແລະ ແນວທາງການພັດທະນາຂອງແຕ່ລະປະເທດ ແນໃສ່ສ້າງເສັ້ນຊາຍແດນໃຫ້ເປັນເສັ້ນຊາຍແດນແຫ່ງສັນຕິພາບ ແລະ ມີການພັດທະນາແບບຍືນຍົງ, ມູນຄ່າການຄ້າສອງຝ່າຍ ເພີ່ມຂຶ້ນ 13,24% ໃນ 5 ເດືອນຕົ້ນປີ 2019 ແລະ ຊຸກຍູ້ໃຫ້ມີການຮ່ວມມືກັນຫຼາຍຂຶ້ນດ້ານພະລັງງານໄຟຟ້າ ເພື່ອໃຫ້ສາມາດບັນລຸໄດ້ຕາມເປົ້າໝາຍ, ຊຶ່ງໃນປີ 2018 ຜ່ານມາ ການຄ້າສອງຝ່າຍສາມາດບັນລຸໄດ້ 1 ຕື້ໂດລາ. ພ້ອມນີ້, ສສ.ຫວຽດນາມ ຍັງເປັນປະ ເທດ ທີ່ຈັດຢູ່ໃນອັນດັບ 3 ຂອງການລົງທຶນຕ່າງປະເທດຢູ່ ສປປ ລາວ, ຊຶ່ງນັບແຕ່ປີ 1989 ເປັນຕົ້ນມາ ມີທັງໝົດ 413 ໂຄງການ, ມູນຄ່າອະນຸມັດທັງໝົດຫຼາຍກວ່າ 4,1 ຕື້ໂດລາ. ໃນປີ 2019, ສສ.ຫວຽດນາມ ໄດ້ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ຊຶ່ງແຜນປະຈຳປີ 2019 ແມ່ນ 711 ຕື້ດົງ, ຊຶ່ງໄດ້ຖືກນຳໃຊ້ເຂົ້າໃນການຈັດຕັ້ງປະຕິບັດວຽກງານໃນບັນດາໂຄງການຕ່າງໆຢ່າງມີຈຸດສຸມ, ຮັບປະກັນຄຸນນະພາບ ແລະ ມີຄວາມຄືບໜ້າ. ປັດຈຸບັນໂຄງການປຸກສ້າງຫໍສະພາແຫ່ງຊາດລາວ ຫຼັງໃໝ່ມູນຄ່າ 111,75 ລ້ານໂດລາ ແມ່ນມີຄວາມຄືບໜ້າໄປເລື້ອຍໆ, ໂຄງການກໍ່ສ້າງໂຮງໝໍແຂວງຊຽງຂວາງ ແລະ ໂຮງໝໍແຂວງຫົວພັນ ຄາດວ່າຈະສຳເລັດຕາມກຳນົດໄວໆນີ້; ສຳລັບໂຄງການກໍ່ສ້າງສະໜາມບິນໜອງຄ້າງ ແມ່ນສຳເລັດແລ້ວປະມານ 75% ແລະ ສະເໜີໃຫ້ສືບຕໍ່ຊຸກຍູ້ໃຫ້ສຳເລັດຕາມກຳນົດເວລາ. ນອກຈາກນີ້, ສອງຝ່າຍ ຍັງໄດ້ລາຍງານສະພາບການພັດທະນາເສດຖະກິດ-ສັງຄົມ ໂດຍລວມຂອງສອງຝ່າຍ ໃຫ້ກັນຊາບ. ພາຍຫຼັງສຳເລັດພິທີພົບປະ, ສອງສະຫາຍຮອງນາຍົກລັດຖະມົນຕີລາວ ແລະ ຫວຽດນາມ ກໍໄດ້ເຂົ້າຮ່ວມເປັນສັກຂີພິຍານໃນພິທີເຊັນສັນຍາ ຊື້-ຂາຍ ໄຟຟ້າ ເຂື່ອນໄຟຟ້ານ້ຳຊຳ 3 ລະຫວ່າງ ບໍລິສັດ ພົງຊັບທະວີ ຂອງລາວ ກັບ ລັດວິສາຫະກິດໄຟຟ້າ ຫວຽດນາມ. ໃນຕອນບ່າຍຂອງວັນດຽວກັນ, ສະຫາຍ ຈິງ ດິງ ຢຸງ ພ້ອມດ້ວຍຄະນະ ຍັງໄດ້ພົບປະເຮັດວຽກຮ່ວມກັບ ສະຫາຍ ສົມພັນ ແພງຄຳມີ ຮອງປະທານສະພາແຫ່ງຊາດ ແຫ່ງ ສປປ ລາວ, ທັງເປັນຫົວໜ້າຄະນະຊີ້ນຳໂຄງການປຸກສ້າງຫໍສະພາແຫ່ງຊາດລາວ ຫຼັງໃໝ່. ພາຍຫຼັງສຳເລັດພິທີພົບປະ ກໍໄດ້ມີພິທີເຊັນບົດບັນທຶກການພົບປະເຮັດວຽກຮ່ວມກັນ. (ຂ່າວ: ກະຊວງການຕ່າງປະເທດ-ພາບ: ພູວຽງຄຳ)