ລັດຖະມົນຕີໄອຊີທີ ຮັບຮອງເອົາຖະແຫຼງການຮ່ວມມືສ້າງ ອະນາຄົດດີຈີຕອນໃນພາກພື້ນອາຊີ-ປາຊີຟິກ


08.07.2019 10:42     

   ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ, ໂທລະຄົມ ມະນາຄົມ ແລະ ການສື່ສານ (ປທສ) ໄດ້ເດີນທາງໄປເຂົ້າຮ່ວມກອງປະຊຸມລັດຖະມົນຕີ ໂທລະຄົມມະນາຄົມ ໄອຊີທີ ອາຊີ-ປາຊີຟິກ ຈັດຂຶ້ນເມື່ອບໍ່ດົນມານີ້, ທີ່ ປະເທດ ສິງກະໂປ ຊຶ່ງກອງປະຊຸມດັ່ງກ່າວ ໄດ້ຮັບຮອງເອົາຖະແຫຼງການວ່າດ້ວຍການຮ່ວມມືເພື່ອສ້າງອະນາຄົດ ດີຈີຕອນ ໃນພາກພື້ນອາຊີ-ປາຊີຟິກ. ກອງປະຊຸມໃນຄັ້ງນີ້, ໄດ້ຈັດຂຶ້ນໃນທ່າມກາງບັນຍາກາດ ການສະເຫຼີມສະຫຼອງການສ້າງ ຕັ້ງອົງການ ໂທລະຄົມມະນາ ຄົມ ອາຊີ-ປາຊີຟິກ (APT) ຄົບຮອບ 40 ປີ. ພ້ອມນີ້, ຍັງເປັນການຮັບຮູ້ເຖິງບົດບາດຄວາມສໍາຄັນຂອງການຮ່ວມມືໃນເວທີພາກພື້ນຕໍ່ການພັດທະນາ ໄອຊີທີ - ດີຈີຕອນ ແລະ ການສືບຕໍ່ຮ່ວມມື, ຮັດແໜ້ນສາຍສໍາພັນ ທາງດ້ານວຽກງານໄອຊີທີ ໃນຂົງເຂດອາຊີ-ປາຊີຟິກໃນຕໍ່ໜ້າ ກໍຄື ການປຶກສາຫາລື ທິດທາງແຜນການ 5 ປີຂ້າງໜ້າ ໃນການພັດທະນາ ໄອຊີທີ ໃຫ້ກາຍເປັນເຄື່ອງມືຂັບເຄື່ອນ ແລະ ປະກອບສ່ວນໃນການພັດທະນາເສດຖະກິດ-ສັງຄົມ. ນອກນີ້, ບັນດາລັດຖະມົນ ຕີ ຍັງໄດ້ແລກປ່ຽນບົດຮຽນສະພາບການພັດທະນາ, ກາລະໂອກາດ ແລະ ສິ່ງທ້າທາຍຂອງປະເທດຕົນໃນການ ຫັນເປັນອຸດສາຫະກໍາທັນສະໄໝ. ໃນໂອກາດດຽວກັນ, ທ່ານຮອງລັດຖະມົນຕີ ກະຊວງ ປທສ ໄດ້ຮັບກຽດໃຫ້ມີຄໍາເຫັນ ໃນວາລະການສ້າງຂີດຄວາມສາມາດ, ຄູ່ຮ່ວມພັດທະນາດີຈີຕອນ ແລະ ຊຸມຊົນດີຈີຕອນ (Digital Community, Digital Capacity Building and Partnership), ພ້ອມທັງລາຍງານສະພາບການພັດທະນາ, ການນໍາໃຊ້ໄອຊີທີ ຢູ່ ສປປ ລາວ ລວມທັງ ແຜນການສ້າງຂີດຄວາມອາດສາມາດ, ສ້າງຄວາມເຂັ້ມແຂງ ດ້ານເຕັກນິກ ລວມໄປເຖິງ ການສົ່ງເສີມ, ການສ້າງທັກສະດ້ານດີຈີຕອນ ທີ່ເປັນປັດໄຈສໍາຄັນໃນການພັດທະນາ ທາງດ້ານເສດຖະກິດ - ສັງຄົມ. ພ້ອມນັ້ນ, ທ່ານຍັງໄດ້ສະເໜີໃຫ້ບັນດາປະເທດສະມາຊິກ APT ສືບຕໍ່ຮ່ວມມືແລກປ່ຽນບົດຮຽນ ເພື່ອຮັດແຄບຄວາມແຕກໂຕນຂອງການພັດທະນາດີຈິີຕອນຂອງປະເທດສະມາຊິກ APT ແລະ ເພື່ອຮັບປະກັນການພັດທະນາທີ່ຍືນຍົງ. ໃນກອງປະຊຸມ ໄດ້ຕົກລົງຮັບຮອງເອົາ ຖະແຫຼງການສິງກະໂປ ວ່າດ້ວຍ ການຮ່ວມມືກັນ ເພື່ອສ້າງອະນາຄົດດິີຈີຕອນໃນພາກພື້ນອາຊີ-ປາຊີຟິກ ທີ່ໄດ້ກຳນົດເອົາ 5 ເປົ້າໝາຍຍຸດທະສາດບຸລິມະສິດ ເພື່ອເປັນທິດທາງໃນການດໍາເນີນງານຂອງອົງການ APT ຊຶ່ງປະກອບມີ 1. ການຫັນເປັນດີຈີຕອນ, 2. ການສ້າງນະວັດຕະກຳດີຈີຕອນ, 3. ຊຸມຊົນດີຈີຕອນ, 4. ຄວາມເຊື່ອໝັ້ນດີຈີຕອນ ແລະ 5. ການສ້າງຂີດຄວາມສາມາດ ແລະ ຄູ່ຮ່ວມພັດທະນາດີຈີຕອນ. (ຂ່າວ+ພາບ: ກົມແຜນ ການ ແລະ ການຮ່ວມມື ກະຊວງ ປທສ)