ລັດຖະບານ ປະດັບຫຼຽນກາມິດຕະພາບ ໃຫ້ທູດສິງກະໂປ ປະຈຳລາວ


...

09.07.2019 9:43     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງ ປະເທດ ໄດ້ຕ້ອນຮັບການເຂົ້າຢ້ຽມອຳລາຂອງທ່ານ ໂດມິນິກ ໂກ (Dominic goh), ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈຳ ສປປ ລາວ ໃນວັນທີ 8 ກໍລະກົດນີ້ ທີ່ກະຊວງການຕ່າງ ປະເທດ, ໃນໂອກາດທີ່ສຳເລັດການປະຕິບັດໜ້າທີ່ການທູດຢູ່ ສປປ ລາວ, ພ້ອມທັງຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ເພື່ອຍ້ອງຍໍຜົນງານອັນໃຫຍ່ຫຼວງຂອງທ່ານທູດສິງກະໂປ. ໃນໂອກາດນີ້, ທ່ານ ສະ ເຫຼີມໄຊ ກົມມະສິດ ໄດ້ສະ ແດງຄວາມຍິນດີຕ້ອນຮັບທ່ານເອກອັກຄະລັດຖະທູດ ແລະ ຊົມເຊີຍທີ່ໄດ້ສຳເລັດໃນການປະຕິບັດໜ້າທີ່ການທູດຢູ່ ສປປ ລາວ ແລະ ສະແດງຄວາມຂອບໃຈຢ່າງຈິງໃຈຕໍ່ການສະ ໜັບສະໜູນ ແລະ ການຊ່ວຍ ເຫຼືອຂອງສິງກະໂປທີ່ມີຕໍ່ ສປປ ລາວ ໃນໄລຍະຜ່ານມາໃນຫຼາຍດ້ານເຊັ່ນ: ດ້ານການເມືອງ, ເສດ ຖະກິດ ແລະ ວັດທະນະທຳ-ສັງຄົມ ເປັນຕົ້ນໄດ້ປະກອບ ສ່ວນຊຸກຍູ້ການພົວພັນ ແລະ ປະກອບສ່ວນອັນສຳຄັນໃຫ້ແກ່ການແລກປ່ຽນການຢ້ຽມຢາມຂອງການນຳຂັ້ນສູງລະຫວ່າງສອງປະເທດ; ດ້ານການຄ້າ ແລະ ການລົງທຶນ. ປັດຈຸບັນນັກລົງທຶນສິງກະໂປມາລົງທຶນ ຢູ່ ສປປ ລາວ ມີມູນຄ່າປະມານ 187 ລ້ານໂດລາ, ກວມເອົາໃນ 79 ໂຄງການ ຈັດຢູ່ໃນອັນດັບທີ 11 ຂອງນັກລົງທຶນຕ່າງປະເທດຢູ່ ສປປ ລາວ ແລະ ຍັງໄດ້ຊຸກຍູ້ການເປີດສາຍການບິນ Silk Air ຢູ່ ສປປ ລາວ ໃນເດືອນເມສາ 2016 ທີ່ຜ່ານມາ. ສຳລັບການແລກປ່ຽນທາງດ້ານວັດທະນະທຳໄດ້ປະກອບສ່ວນຈັດພິທີເປີດໂຕປຶ້ມ "From Third World to First" ແລະ ໄດ້ຂົນຂວາຍທຶນຮອນ ໃຫ້ນັກສະແດງກອງລະຄອນຄົນພິການ ແລະ ນັກ ສະແດງເຕັ້ນບາເລ້ຂອງລາວ, ຈຳນວນ 14 ຄົນ ໄປຖອດຖອນບົດຮຽນທີ່ປະເທດສິງກະໂປ; ດ້ານການສຶກສາໄດ້ຂົນຂວາຍຍາດແຍ່ງທຶນຝຶກອົບຮົມພາສາ ອັງກິດໃຫ້ແກ່ການນຳລາວຈຳ ນວນ 35 ທ່ານ, ຊ່ວຍຂົນຂວາຍທຶນຝຶກອົບຮົມແກ່ພະນັກງານລາວ ໃນສາຂາຕ່າງໆຢູ່ສິງກະ ໂປຫຼາຍກ່ວາ 100 ທຶນ ແລະ ຍັງໄດ້ຊ່ວຍຝຶກອົບຮົມຢູ່ສູນຮ່ວມມືລາວ-ສິງກະໂປໃຫ້ແກ່ພະນັກງານລາວອີກຫຼາຍກ່ວາ 90 ຫຼັກສູດ ແລະ ມີພະນັກງານລາວຫຼາຍກວ່າ 2.000 ຄົນເຂົ້າ ຮ່ວມ. ພິເສດ, ທ່ານທູດຍັງໄດ້ຂົນຂວາຍອາສາສະໝັກນັກ ຮຽນຈາກມະຫາວິທະຍາໄລທີ່ ສຳຄັນຂອງສິງກະໂປມາຊ່ວຍ ເຫຼືອແກ່ໂຮງຮຽນຕ່າງໆຂອງ ສປປ ລາວ ມີຈຳນວນຫຼາຍ ກວ່າ 1.800 ຄົນ. ນອກຈາກນັ້ນ, ທ່ານທູດຍັງໄດ້ປະກອບສ່ວນຊຸກຍູ້ໃຫ້ລັດຖະບານສິງກະໂປຊ່ວຍເຫຼືອລາວ ໃນໄລຍະທີ່ເປັນປະທານອາຊຽນ ຊຶ່ງມີມູນຄ່າຫຼາຍກ່ວາ 200.000 ໂດລາ ແລະ ໃນໄລຍະເວລາເກີດອຸບັດເຫດສັນກັນນໍ້າເຂື່ອນໄຟ ຟ້າເຊປຽນ-ເຊນໍ້ານ້ອຍແຕກທີ່ ເມືອງສະໜາມໄຊ, ແຂວງອັດຕະປື, ລັດຖະບານສິງກະໂປກໍໄດ້ໃຫ້ການຊ່ວຍເຫຼືອແກ່ ສປປ ລາວ ຊຶ່ງຈັດເປັນປະເທດອັນດັບຕົ້ນໆຂອງການຊ່ວຍເຫຼືອຂອງຕ່າງປະເທດ. ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ຍັງໄດ້ຕາງໜ້າລັດຖະບານ ແລະ ປະຊາຊົນລາວ ປະດັບຫຼຽນກາມິດຕະພາບໃຫ້ແກ່ທ່ານທູດສິງກະໂປ ເພື່ອສະແດງຄວາມຍ້ອງຍໍຊົມເຊີຍຜົນສຳເລັດອັນໃຫຍ່ຫຼວງຕໍ່ຜົນງານຂອງທ່ານເອກອັກຄະລັດຖະທູດ ໃນໄລ ຍະການປະຕິບັດໜ້າທີ່ທາງການທູດຢູ່ ສປປ ລາວ ເປັນເວລາ 4 ປີກວ່າ. ໃນໂອກາດດຽວກັນ, ທ່ານ ທູດສິງກະໂປ ກໍໄດ້ສະແດງຄວາມຂອບໃຈເປັນຢ່າງຍິ່ງຕໍ່ລັດຖະບານ ສປປ ລາວ ທີ່ໄດ້ອຳນວຍຄວາມສະດວກໃຫ້ແກ່ການເຄື່ອນໄຫວປະຕິບັດວຽກງານການທູດຂອງຕົນ ຢູ່ ສປປ ລາວ, ພິເສດແມ່ນຄວາມຮູ້ບຸນຄຸນຢ່າງສູງຕໍ່ການມອບຫຼຽນກາມິດຕະພາບອັນສົມກຽດໃຫ້ແກ່ທ່ານ ແລະ ຢືນຢັນຈະສືບຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດສິງກະໂປ-ລາວທີ່ມີມາແຕ່ດົນນານນັ້ນໃຫ້ຈະເລີນງອກງາມຍິ່ງໆຂຶ້ນ. (ຂ່າວ: ກະຊວງການຕ່າງປະເທດ-ພາບ: ແສງຈັນ)