ຄະນະຜູ້ແທນຂັ້ນສູງຂອງພັກ ປປ ລາວ ເຂົ້າຮ່ວມກອງປະຊຸມສຳມະນາ ທິດສະດີ 2 ພັກ ລາວ-ຈີນ ຄັ້ງທີ VIII ຢູ່ ສປ ຈີນ


...

12.07.2019 8:45     

   ໂດຍປະຕິບັດຕາມແຜນ ການຮ່ວມມື ລະຫວ່າງ ພັກ ປປ ລາວ ແລະ ພັກກອມມູນິດຈີນ ປະຈຳປີ 2019, ຄະນະຜູ້ແທນຂັ້ນສູງຂອງພັກ ປປ ລາວ ນຳໂດຍ ສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະໄດ້ເດີນທາງໄປຢ້ຽມຢາມ ແລະ ເຂົ້າຮ່ວມກອງປະຊຸມສຳມະນາ ທິດສະດີ 2 ພັກ ລາວ-ຈີນ ຄັ້ງທີ VIII ຢູ່ນະຄອນເຊັ້ຍເມິນ ແຂວງຟູຈ້ຽນ ສປ ຈີນ ແຕ່ວັນທີ 8-12 ກໍລະກົດ 2019. ໃນວັນທີ 9 ກໍລະກົດ 2019, ສະຫາຍ ຈັນສີ ໂພສີຄຳ ໄດ້ພົບປະກັບ ສະຫາຍ ຮວງຄຸນມິງ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາສູນກາງພັກກອມມູນິດຈີນ. ໃນການພົບປະ, ສະຫາຍ ຈັນສີ ໂພສີຄຳ ໄດ້ສະແດງຄວາມ ປິຕິຊົມຊື່ນຕໍ່ສາຍພົວພັນມິດ ຕະພາບອັນເປັນມູນເຊື້ອ ລະ ຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ທີ່ໄດ້ຮັບການເພີ່ມພູນຄູນສ້າງ ແລະ ແຕກດອກອອກຜົນໃນຕະ ຫຼອດໄລຍະທີ່ຜ່ານມາ, ອັນພົ້ນເດັ່ນທີ່ສຸດ ແມ່ນການນຳສູງສຸດຂອງສອງພັກໄດ້ເອກະພາບກັນລົງນາມ ໃນແຜນແມ່ບົດວ່າດ້ວຍຄູ່ຮ່ວມຊາຕາກຳ ລາວ-ຈີນ ໃນທ້າຍເດືອນເມສາ 2019 ທີ່ຜ່ານມາ, ຊຶ່ງເປັນເອກະສານການເມືອງທີ່ສໍາຄັນຂອງສອງພັກ ຊຶ່ງໄດ້ກໍານົດຫຼັກການ ແລະ ທິດທາງລວມໃຫ້ແກ່ການສືບຕໍ່ເພີ່ມພູນຄູນສ້າງສາຍພົວພັນມິດຕະພາບ ລະຫວ່າງ ລາວ-ຈີນ ໃນຍຸກໃໝ່ ໃຫ້ມີຄວາມໜັກແໜ້ນ ແລະ ນັບມື້ນັບເລິກເຊິ່ງ. ສະຫາຍ ຈັນສີ ໂພສີຄໍາ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການຈັດກອງປະຊຸມສໍາມະນາທິດສະດີ 2 ພັກ ທີ່ພັກກອມມູນິດຈີນ ເປັນເຈົ້າພາບຈັດໃນຄັ້ງນີ້, ຊຶ່ງນອກຈາກເປັນການຈັດຕັ້ງປະຕິບັດຕາມແຜນຮ່ວມມືສອງພັກແລ້ວ ຍັງເປັນການຈັດຕັ້ງຜັນຂະຫຍາຍເນື້ອໃນຂອງແຜນແມ່ບົດວ່າດ້ວຍຄູ່ຮ່ວມຊາຕາກໍາ ລາວ-ຈີນ. ກອງປະຊຸມຄັ້ງນີ້ຈັດຂຶ້ນໂດຍປິ່ນອ້ອມຫົວຂໍ້: "ບົດຮຽນແຫ່ງການສ້າງສາສັງຄົມນິຍົມແບບທັນສະໄໝຂອງສອງປະເທດ ລາວ-ຈີນ" ຊຶ່ງເປັນຫົວຂໍ້ທີ່ມີຄວາມສໍາຄັນ ແລະ ສອດຄ່ອງກັບສະພາບການຕົວຈິງຂອງທັງ ສອງພັກ, ສອງປະເທດ, ຊຶ່ງຈະເປັນໂອກາດອັນດີໃຫ້ແກ່ນັກຄົ້ນຄວ້າທິດສະດີຂອງສອງພັກໄດ້ແລກປ່ຽນຖອດຖອນບົດຮຽນນໍາກັນ ເພື່ອໝູນໃຊ້ເຂົ້າໃນການສ້າງສາພັດທະນາປະເທດຊາດໃນຍຸກໃໝ່ຂອງສອງພັກ, ສອງລັດຖະບານລາວ -ຈີນ. ສະຫາຍ ຈັນສີ ໂພສີຄໍາ ໄດ້ຊົມເຊີຍ ແລະ ຕີລາຄາສູງຕໍ່ຜົນສໍາເລັດອັນໃຫຍ່ຫຼວງ, ຮອບດ້ານທີ່ພັກ, ລັດຖະບານ ແລະ ປະຊາຊົນຈີນອ້າຍນ້ອງ ຍາດມາໄດ້ໃນການສ້າງສາພັດ ທະນາປະເທດຊາດ ພາຍໃຕ້ການນໍາພາທີ່ຖືກຕ້ອງຂອງພັກກອມມູນິດຈີນ ທີ່ມີສະຫາຍ ເລຂາທິການໃຫຍ່ ສີຈິ້ນຜິງ ເປັນແກນນໍາ, ພ້ອມທັງໄດ້ແຈ້ງສະພາບການທີ່ພົ້ນເດັ່ນຂອງ ສປປ ລາວ ໃຫ້ສະຫາຍ ຮວງຄຸນມິງ ໄດ້ຮັບຊາບ. ສະຫາຍ ຮວງຄຸນມິງ ໄດ້ສະແດງຄວາມຍິນດີຕ້ອນຮັບ ສະຫາຍ ຈັນສີ ໂພສີຄໍາ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມສໍາມະນາທິດສະດີ 2 ພັກ ລາວ-ຈີນ ໃນຄັ້ງນີ້, ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງສອງຝ່າຍທີ່ໄດ້ຮັບການເສີມຂະຫຍາຍຢູ່ ໃນລະດັບທີ່ດີທີ່ສຸດ ໃນປະ ຫວັດສາດການພົວພັນ ລາວ-ຈີນ ແລະ ຢືນຢັນຈະຮ່ວມກັບຝ່າຍລາວ ສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຕັ້ງໜ້າຊຸກຍູ້ການ ຈັດຕັ້ງປະຕິບັດແຜນແມ່ບົດວ່າດ້ວຍຄູ່ຮ່ວມຊາຕາກໍາ ລາວ-ຈີນ ໃຫ້ປະກົດຜົນເປັນຈິງ ເພື່ອນໍາເອົາຜົນປະໂຫຍດຕົວຈິງ ມາ ສູ່ປະຊາຊົນສອງຊາດຫຼາຍຂຶ້ນກວ່າເກົ່າ. ໃນໄລຍະຢູ່ຢ້ຽມຢາມ, ນອກຈາກເຄື່ອນໄຫວຢ້ຽມຢາມຢູ່ນະຄອນເຊັ້ຍເມິນ ແຂວງຟູຈ້ຽນແລ້ວ, ຄະນະຍັງໄດ້ໄປຢ້ຽມຢາມແຂວງອານຮຸຍເພື່ອຊອກຮູ້ສະພາບການພັດທະນາເສດຖະກິດ-ສັງຄົມ ກໍ່ຄືບົດຮຽນໃນການກໍ່ສ້າງຮາກຖານພັກ ຢູ່ທ້ອງຖິ່ນດັ່ງກ່າວອີກດ້ວຍ. (ຂ່າວ-ພາບ: ຄຕພ)