ອີຟັດ ສຸມໃສ່ປັບປຸງດ້ານສະບຽງອາຫານ ແລະ ໂພຊະນາການຢູ່ລາວ


...

26.07.2019 9:08     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ ຕ້ອນຮັບ ທ່ານ ກີວເບີດ ຮຸ່ງໂບ ປະທານອົງ ການກອງທຶນສາກົນ ເພື່ອການພັດທະນາກະສິກຳ ພ້ອມຄະນະ ໃນວັນທີ 25 ກໍລະກົດນີ້ ທີ່ ສຳນັກງານນາຍົກລັດຖະມົນຕີ, ໃນໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມ ສປປ ລາວ ແຕ່ວັນທີ 22-25 ກໍລະກົດນີ້. ໃນຂະນະທີ່ອົງການກອງທຶນສາກົນ ເພື່ອການພັດທະນາກະສິກໍາ (IFAD) ກຳລັງດຳເນີນ 3 ໂຄງການຢູ່ ສປປ ລາວ ເປັນຕົ້ນແມ່ນໂຄງການປັບປຸງການຄ້ຳປະກັນດ້ານສະບຽງອາຫານ ແລະ ໂພຊະນາການຂອງຄົວເຮືອນ.
    ໃນໂອກາດດັ່ງກ່າວ ທ່ານນາຍົກລັດຖະມົນຕີໄດ້ກ່າວສະແດງຄວາມຕ້ອນຮັບ ແລະ ສະແດງຄວາມຂອບໃຈຕໍ່ການຊ່ວຍເຫຼືອຂອງອົງການກອງທຶນສາກົນເພື່ອການພັດທະນາກະສິກຳ ຊຶ່ງນັບແຕ່ປີ 1978 ເປັນຕົ້ນມາ, ອົງການດັ່ງກ່າວໄດ້ເລີ່ມປະຕິບັດໃນ ສປປ ລາວມີ 15 ໂຄງການ, ມີມູນຄ່າລົງທຶນທັງໝົດ 156 ລ້ານໂດລາ ແລະ ມີຜູ້ໄດ້ຮັບຜົນປະໂຫຍດໂດຍກົງ 329.775 ຄົວເຮືອນ, ປັດຈຸບັນແມ່ນມີ 3 ໂຄງການທີ່ກຳລັງດຳເນີນຢູ່ ສປປ ລາວ.
    ທ່ານ ກີວເບີດ ຮຸ່ງໂບ ຕາງ ໜ້າຄະນະໄດ້ກ່າວສະແດງຄວາມຂອບໃຈຕໍ່ການຕ້ອນຮັບຂອງທ່ານນາຍົກລັດຖະມົນຕີໃນຄັ້ງນີ້ ພ້ອມທັງປຶກສາຫາລືການລົງທຶນທີ່ສາມາດປັບປຸງການຄ້ຳປະກັນສະບຽງອາຫານ ແລະ ໂພຊະນາການ, ການສ້າງວຽກເຮັດງານທຳ ແລະ ຫຼຸດຜ່ອນຜົນກະທົບຈາກການປ່ຽນແປງສະພາບດິນຟ້າອາກາດໃນເຂດຊົນນະບົດ.
    ການຢ້ຽມຢາມຂອງປະ ທານອົງການກອງທຶນສາກົນເພື່ອການພັດທະນາກະສິກຳຄັ້ງນີ້ ຈະສຸມໃສ່ພາລະບົດບາດຂອງຊາວກະສິກອນຂະໜາດນ້ອຍ ເພື່ອປັບປຸງການຄ້ຳປະ ກັນດ້ານສະບຽງອາຫານ ແລະ ໂພຊະນາການຂອງຄົວເຮືອນ, ອົງການກອງທຶນສາກົນເພື່ອການພັດທະນາກະສິກຳ ໄດ້ລົງທຶນສະໜັບສະໜູນຊາວກະສິກອນໃນເຂດຊົນນະບົດ, ສົ່ງເສີມຄວາມເຂັ້ມແຂງໃຫ້ເຂົາເຈົ້າເພື່ອຫຼຸດຜ່ອນຄວາມທຸກຍາກ, ເພີ່ມການຄ້ຳປະກັນສະບຽງອາຫານ, ປັບປຸງໂພຊະນາການ ແລະ ມີຄວາມສາມາດໃນການປັບຕົວຕໍ່ສະພາບການປ່ຽນແປງຂອງດິນຟ້າອາກາດ.
    ອົງການກອງທຶນສາກົນເພື່ອການພັດທະນາກະສິກຳ ແມ່ນສະຖາບັນການເງິນສາກົນ ແລະ ເປັນໜ່ວຍງານສະເພາະດ້ານອາຫານ ແລະ ການກະສິກຳ ຂອງອົງການສະຫະປະຊາຊາດມີສຳນັກງານໃຫຍ່ຕັ້ງຢູ່ໃນນະຄອນຫຼວງໂຣມ.
(ຂ່າວ:ພູວຽງຄຳ-ພາບ: ສນຍ)