ສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 92 ປີ


...

02.08.2019 9:27     

   ສະຖານທູດ ແຫ່ງ ສປ ຈີນ ປະຈຳລາວ ໄດ້ຈັດງານລ້ຽງສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 92 ປີ (1/8/1927-1/8/2019) ຂຶ້ນໃນວັນທີ 31 ກໍລະກົດນີ້ ທີ່ໂຮງແຮມ ດອນຈັນ ພາເລດ ໂດຍການເຂົ້າຮ່ວມຂອງທ່່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ຈຽງຈ້າຍຕົງ ເອກອັກຄະລັດຖະທູດ ສປ ຈີນ ປະຈຳ ລາວ ພ້ອມດ້ວຍແຂກຖືກເຊີນເຂົ້າຮ່ວມ.
ໃນພິທີພາຍຫຼັງບັນເລງເພງຊາດລາວ-ຈີນຕາມລຳດັບ ແລ້ວ ທ່ານ ເສິນ ຢົງຈິ້ງ ທູດທະຫານ ແຫ່ງ ສປ ຈີນ ປະຈໍາ ລາວໄດ້ຂຶ້ນກ່າວຄວາມເປັນມາຂອງວັນດັ່ງກ່າວວ່າ: ການລຸກຮື້ຂຶ້ນຢູ່ເມືອງໜານຊາງວັນທີ 1 ສິງຫາ 1927, ເປັນຂີດໝາຍສຳຄັນແຫ່ງການກໍາເນີດຂອງກອງທັບປະຊາຊົນຈີນ ແບບໃໝ່ທີ່ແຕ່ງຕັ້ງ ແລະ ນໍາພາໂດຍພັກກອມມູນິດຈີນ, ເລີ່ມຈາກນັ້ນມາ, ພາຍໃຕ້ການຊີ້ນຳ-ນຳພາຂອງພັກກອມມູນິດຈີນ ກອງທັບປະຊາຊົນຈີນ ໄດ້ອຸທິດຢ່າງອົງອາດກ້າຫານເພື່ອການປົດປ່ອຍ ແລະ ຄວາມຜາສຸກຂອງປະຊາຊົນຈີນ ແລະ ສະແຫວງຫາຄວາມເປັນເອ ກະລາດ ແລະ ການຟື້ນຟູຄວາມຮຸ່ງເຮືອງຂອງຊາດຈີນ ຊຶ່ງໄດ້ຜູກມັດຊາຕາກຳກັບປະຊາຊົນຈີນ ແລະ ປະເທດຊາດໄວ້ນຳກັນ.
ຕະຫຼອດ 92 ປີຜ່ານມາ, ກອງທັບປະຊາຊົນຈີນໄດ້ຜ່ານຜາແປວໄຟສົງຄາມ ແລະ ອຸ ປະສັກທີ່ລະອິດລະອ້ຽວທີ່ສຸດ ແລະ ໄດ້ເສຍສະຫຼະຊິວິດເລືອດເນື້ອຢ່າງໃຫຍ່ຫຼວງ ແຕ່ໄດ້ຮັບໄຊຊະນະຢ່າງສະຫງ່າງາມເປັນໄລຍະມາ ຊຶ່ງໄດ້ສ້າງຄຸນ ງາມຄວາມດີອັນຍິ່ງໃຫຍ່ໃຫ້ແກ່ພັກແລະປະຊາຊົນ.
ໃນຊຸມປີຜ່ານມາ, ກອງ ທັບຈີນ ພາຍໃຕ້ການຊີ້ນຳ-ນຳ ພາຂອງສູນກາງພັກ ແລະ ຄະ ນະກຳມະການທະຫານສູນກາງ ໂດຍມີສະຫາຍ ສີ ຈິ້ນຜິງ ເປັນແກນນໍານັ້ນ, ໄດ້ຢຶດໝັ້ນບົດບາດຊີ້ນໍາຂອງແນວຄິດສ້າງກອງທັບເຂັ້ມແຂງຂອງສະຫາຍ ສີ ຈິ້ນຜິງ ດ້ານວຽກງານປ້ອງກັນຊາດ ແລະ ການກໍ່ສ້າງກອງ ທັບ, ບໍ່ລືມຕົ້ນກຳເນີດ, ຈົດຈຳພາລະກຳ, ຢຶດໝັ້ນບໍ່ປ່ຽນ ແປງເດີນຕາມເສັ້ນທາງສ້າງກອງທັບເຂັ້ມແຂງ, ຢຶດໝັ້ນກໍ່ ສ້າງກອງທັບດ້ວຍລະບອບການເມືອງ, ປະຕິຮູບກອງທັບໃຫ້ມີຄວາມເຂັ້ມແຂງ, ກອງທັບທີມີເຕັກນິກວິທະຍາສາດ, ຄຸ້ມຄອງກອງທັບດ້ວຍກົດໝາຍ, ສາມາດຕີເອົາຊະນະ, ຕັ້ງໜ້າຊຸກຍູ້ກໍ່ສ້າງວຽກງານປ້ອງກັນຊາດ ແລະ ກອງທັບໃຫ້ທັນສະ ໄໝ, ພະຍາຍາມບັນລຸເປົ້າ ໝາຍໃຫ້ເປັນກອງທັບເຂັ້ມແຂງໃນຍຸກໃໝ່ຂອງພັກ, ກໍ່ສ້າງກອງ ທັບປະຊາຊົນຟັງການບັນຊາຂອງພັກ, ສາມາດຕີເອົາຊະນະ, ມີລະບຽບແບບແຜນດີເລີດ ແລະ ສ້າງໃຫ້ເປັນກອງທັບປະ ຊາຊົນຢູ່ອັນດັບແຖວໜ້າຂອງໂລກ. ທັງໝົດເຫຼົ່ານັ້ນກໍເພື່ອຄໍ້າປະກັນຍຸດທະສາດໃຫ້ແກ່ການປັບປຸງການນຳພາຂອງພັກກອມມູນິດຈີນ ແລະ ລະບອບສັງຄົມນິຍົມ ແລະ ການປົກປ້ອງອຳນາດອະທິປະໄຕຂອງຊາດ, ການໂຮມແຜ່ນດິນ ແລະ ຜືນແຜ່ນດິນອັນຄົບຖ້ວນ, ການປົກປ້ອງຜົນປະໂຫຍດຂອງຊາດຢູ່ນອກປະເທດ, ການສົ່ງເສີມສັນຕິພາບ ແລະ ການພັດທະນາຂອງໂລກ.
ສອງປະເທດ ຈີນ-ລາວມີ ສາຍພູ-ສາຍນ້ຳຕິດຈອດກັນ, ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ, ສອງປະ ເທດໄດ້ສ້າງຕັ້ງການພົວພັນແບບຄູ່ຮ່ວມຍຸດທະສາດຮອບ ດ້ານຄົບຮອບ 10 ປີ. ໃນເດືອນເມສາປີນີ້, ສະຫາຍ ສີ ຈິ້ນຜິງ ເລຂາທິການໃຫຍ່ ປະທານປະເທດ ແຫ່ງ ສປ ຈີນ ແລະ ສະຫາຍ ບຸນຍັງ ວໍລະຈິດ ເລ ຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ຮ່ວມກັນລົງນາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳຈີນ-ລາວ, ຊຸກຍູ້ຄູ່ຮ່ວມຊາຕາກຳຈາກທິດສະດີກາຍເປັນຮູບປະທຳ ແລະ ຈາກວິໄສທັດຫັນເປັນຕົວຈິງ ຊຶ່ງເປັນທິດທາງ ແລະ ຕາຕະລາງແຜນການພັດທະນາສາຍພົວພັນຈີນ-ລາວໃນໄລຍະຍາວ ທີ່ມີບົດບາດໃນການບຸກ ເບີກເຍືອງທາງ ແລະ ເປັນແບບ ຢ່າງໃນການສ້າງປະຊາຄົມຮ່ວມຊາຕາກຳຂອງມວນມະນຸດ. ອັນນີ້ມັນສອດຄ່ອງກັບຜົນປະໂຫຍດຕົ້ນຕໍ ແລະ ຄວາມມຸ້ງມາດປາຖະໜາຮ່ວມຂອງສອງພັກ-ສອງລັດ ແລະ ປະຊາຊົນສອງຊາດຂອງພວກເຮົາ, ທັງເປັນຜົນດີຕໍ່ສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ ໃນຂົງເຂດພາກພື້ນ ແລະ ໃນໂລກ.
ທ່ານທູດທະຫານຍັງກ່າວອີກວ່າ: ສອງກອງທັບຈີນ-ລາວ ໄດ້ຖະນຸຖະໜອມໄມຕີຈິດມິດຕະພາບອັນເລິກເຊິ່ງ ຕະຫຼອດມາ, ເສີມຂະຫຍາຍຄວາມສາມັກຄີທີ່ເປັນມູນເຊື້ອຊ່ວຍເຫຼືອຊຶ່ງກັນ ແລະ ກັນ, ພາຍໃຕ້ການຊຸກຍູ້ ແລະ ເອົາ ໃຈໃສ່ຂອງການນຳສອງຝ່າຍນັ້ນ, ໄດ້ຕັ້ງໜ້າເປີດກວ້າງ ການແລກປ່ຽນທາງດ້ານການທະຫານ, ລົງເລິກພາກປະຕິບັດຕົວຈິງ ເປັນຕົ້ນການປົກປ້ອງຊາຍແດນໃຫ້ມີສັນຕິພາບ, ສະຖຽນລະພາບຕະຫຼອດມາ ແລະ ການຮ່ວມມື ໃນໂຄງການ ໜຶ່ງແລວ ໜຶ່ງເສັ້ນທາງ ໃຫ້ມີ ຄວາມປອດໄພ, ວຽກງານກໍ່ ສ້າງກອງທັບ, ການຝຶກຊ້ອມຮ່ວມ, ການຮ່ວມມືໃນວຽກງານ ໂຮງຮຽນ, ຝຶກອົບຮົມບຸກຄະ ລາກອນ ແລະ ອື່ນໆ ຊຶ່ງໄດ້ຮັບໝາກຜົນຢ່າງໂດດເດັ່ນເປັນກ້າວໆມາ.
ກອງທັບປົດປ່ອຍປະຊາຊົນຈີນຍິນດີຮ່ວມກັບກອງທັບປະຊາຊົນລາວຖານອ້າຍນ້ອງ ສືບຕໍ່ຊ່ວຍເຫຼືອຊຶ່ງກັນ ແລະ ກັນ, ສ້າງແນວປ້ອງກັນຄວາມປອດໄພຄູ່ຮ່ວມຊາຕາກຳຈີນ-ລາວ, ເພີ່ມທະວີການຮ່ວມມືເຂົ້າສູ່ລວງເລິກ, ສົ່ງເສີມການຮ່ວມມືທາງດ້ານການທະຫານ ແລະ ແລກປ່ຽນວຽກງານປ້ອງກັນຊາດລະຫວ່າງຈີນ-ອາຊຽນ ເພື່ອປົກປ້ອງສັນຕິພາບ, ສະຖຽນລະພາບຢູ່ຂົງເຂດພາກພື້ນ ແລະ ໃນໂລກໃຫ້ຍືນຍົງ.
(ຂ່າວ-ພາບ: ພູວຽງຄຳ)