ທ່ານ ສະເຫຼີມໄຊ ກົມມະສິດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນ ຄັ້ງທີ 52


...

02.08.2019 9:27     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງ ການຕ່າງປະເທດ ແຫ່ງ ສປປ ລາວ ພ້ອມຄະນະ ໄດ້ເຂົ້າຮ່ວມ ກອງປະຊຸມຄະນະກຳມາທິການ ວ່າດ້ວຍ ເຂດປອດອາ ວຸດນິວເຄລຍອາຊີ ຕາເວັນອອກສ່ຽງໃຕ້ (SEANWFZ Commission), ໃນວັນທີ 30 ກໍລະກົດ ຜ່ານມາ ທີ່ບາງກອກ ປະເທດໄທ, ກອງປະຊຸມຄັ້ງນີ້ ໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າການຈັດຕັ້ງປະຕິບັດແຜນປະຕິບັດງານຂອງສົນທິສັນຍາ ວ່າດ້ວຍ ເຂດປອດອາວຸດນິວເຄລຍໃນອາຊີຕາເວັນອອກສ່ຽງໃຕ້ ໄລຍະ 2018-2022 ແລະ ຮັບຊາບຜົນກອງປະຊຸມເຄືອຂ່າຍອົງການພະລັງງານປະລາມະນູອາຊຽນ ຄັ້ງທີ 6 (6th ASEANTOM). ພ້ອມນີ້, ໃນຕອນບ່າຍຂອງວັນດຽວກັນ ລັດຖະມົນຕີຕ່າງປະເທດເຮົາ ກັບບັນດາລັດຖະມົນຕີອາຊຽນ ອືື່ນໄດ້ພົບປະກັບຜູ້ຕາງໜ້າຄະນະກໍາມາທິການລະຫວ່າງຊາດອາຊຽນ ວ່າດ້ວຍ ສິດທິມະນຸດ (AICHR), ຊຶ່ງໄດ້ຮັບຊາບບົດລາຍງານປະຈໍາປີ 2019 ແລະ ຖະແຫຼງການສະເຫຼີມສະຫຼອງຄົບຮອບ 10 ປີ ຂອງ AICHR.
ໃນຕອນຄ່ຳຂອງວັນດຽວກັນ, ທ່ານ ສະເຫຼີມໄຊ ກົມມະສິດ ໄດ້ເຂົ້າຮ່ວມກອງປະຊຸມອາ ຫານຄ່ຳແບບເຮັດວຽກ, ຊຶ່ງໄດ້ປຶກສາຫາລື 3 ບັນຫາ: 1. ຜົນຂອງກອງປະຊຸມ G 20 ຢູ່ ເມືອງ ໂອສະກະ ຍີ່ປຸ່ນ; 2. ຜັນຂະຫຍາຍເອກະສານແນວ ຄວາມ ຄິດອາຊຽນຕໍ່ຂອບການຮ່ວມມືອິນໂດປາຊີຟິກ; ແລະ 3. ການແກ້ໄຂບັນຫາຄວາມຫຍຸ້ງຍາກ ຢູ່ ລັດຣະຄາຍ, ມຽນມາ.
ໃນຕອນເຊົ້າຂອງວັນທີ 31 ກໍລະກົດ ຜ່ານມາ ທ່ານ ສະເຫຼີມໄຊ ກົມມະສິດ ໄດ້ນຳ ພາຄະນະ ເຂົ້າຮ່ວມພິທີເປີດ ກອງປະຊຸມລັດຖະມົນຕີຕ່າງ ປະເທດອາຊຽນ ຄັ້ງທີ 52 ຢ່າງເປັນທາງການ ແລະ ສືບຕໍ່ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາຊຽນແບບຄົບຄະນະ ຄັ້ງທີ 52 ແລະ ກອງປະຊຸມແບບວົງແຄບ. ກອງປະຊຸມລັດຖະມົນຕີຕ່າງປະເທດຄົບຄະນະ ຄັ້ງທີ 52 ໄດ້ຕີລາຄາສູງຕໍ່ການຈັດຕັ້ງປະຕິບັດຜົນກອງປະຊຸມສຸດຍອດອາຊຽນ ຄັ້ງທີ 34 ຜ່ານມາ ໂດຍສະເພາະ ການສືບຕໍ່ສ້າງປະຊາຄົມອາຊຽນໃຫ້ມີຄວາມເຂັ້ມແຂງ ທີ່ ປິ່ນອ້ອມບັນດາບຸລິມະສິດການເປັນປະທານອາຊຽນຂອງ ໄທ ປີ 2019 ພາຍໃຕ້ຄຳຂວັນ: "ຮ່ວມແຮງຮ່ວມໃຈ ກ້າວໄກຍືນຍົງ" ເຊັ່ນ: ການພັດທະນາແບບຍືນຍົງ, ການເຊື່ອມສານລະຫວ່າງ ວິໄສທັດອາຊຽນ 2025 ແລະ ເປົ້າໝາຍການພັດທະນາແບບຍືນຍົງ 2030 ຂອງ ສປຊ. ພ້ອມນີ້, ກອງປະຊຸມຍັງໄດ້ເອກະ ພາບກັນຕໍ່ການກະກຽມດ້ານເນື້ອໃນ ແລະ ພິທີການໃຫ້ແກ່ ກອງປະຊຸມລັດຖະມົນຕີກັບຄູ່ເຈລະຈາ (PMC) ໃນວັນທີ 1-2 ສິງຫາ 2019, ກອງປະຊຸມ ສະມັດຊາໃຫຍ່ ອົງການ ສປຊ ຄັ້ງທີ 74 ແລະ ກອງປະຊຸມສຸດຍອດອາຊຽນ ຄັ້ງທີ 35 ໃນເດືອນ ກັນຍາ ແລະ ເດືອນ ພະຈິກ 2019 ຕາມລຳດັບ.
ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52 ນີ້ໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດ ຖະມົນຕີຕ່າງປະເທດ ຄັ້ງທີ 52; ຮັບຊາບບົດລາຍງານການປະເມີນຄວາມຄືບໜ້າໃນການຮັດແຄບຄວາມແຕກໂຕນພາຍໃນອາຊຽນ ແລະ ໄດ້ຮັບຮອງເອົາແຜນງານໂຄງການບຸລິມະສິດ ແລະ ແຜນງົບປະມານປະຈຳປີ 2020 ຂອງຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ຫຼື ໄອຈາ (AICHR).
ໃນກອງປະຊຸມລັດຖະ ມົນຕີຕ່າງປະເທດອາຊຽນແບບວົງແຄບ ບັນດາລັດຖະມົນຕີ ໄດ້ແລກປ່ຽນທັດສະນະນຳກັນຢ່າງກົງໄປກົງມາ ຕໍ່ບັນຫາພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນເຊັ່ນ:ບັນຫາແຫຼມເກົາຫຼີ, ທະເລຈີນໃຕ້, ບັນຫາອາຊະຍາກຳຂ້າມຊາດ, ການຕ້ານການກໍ່ການຮ້າຍ ແລະ ລັດທິຫົວຮຸນແຮງ, ສະພາບການຢູ່ຕາເວັນອອກກາງ, ການປ່ຽນແປງດິນຟ້າອາກາດ ແລະ ອື່ນໆ.
ໃນຕອນບ່າຍຂອງວັນດຽວກັນ, ບັນດາລັດຖະມົນຕີຕ່າງປະເທດອາຊຽນ ໄດ້ຮ່ວມລົງນາມເພື່ອຮັບເອົາ ປະເທດ ເປຣູ ເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືອາຊີຕາເວັນອອກສ່ຽງໃຕ້ (TAC) ແລະ ເຂົ້າຮ່ວມພິທີເປີດທຶນການສຶກສາຜູ້ນໍາໜຸ່ມນ້ອຍ ອາຊຽນ-ຈີນ ແລະ ພິທີປະກາດຂໍ້ລິເລີ່ມອາຊຽນ-ອົສຕຣາລີ ກ່ຽວກັບ ການຕ້ານການຄ້າມະນຸດ.
ພາຍຫຼັງສຳເລັດການເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52, ທ່ານ ສະເຫຼີມໄຊ ກົມມະສິດ ໄດ້ສືບຕໍ່ນໍາພາຄະນະຜູ້ແທນລາວເຂົ້າຮ່ວມກອງປະຊຸມລັດ ຖະມົນຕີຕ່າງປະເທດລະຫວ່າງ ອາຊຽນ ກັບ ບັນດາປະເທດຄູ່ ເຈລະຈາ ຊຶ່ງລວມມີ ກອງປະ ຊຸມລັດຖະມົນຕີຕ່າງປະເທດອາຊຽນ-ຈີນ, ອາຊຽນ-ຣັດເຊຍ ແລະ ອາຊຽນ-ນິວຊີແລນ.
ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ໄດ້ສະແດງຄວາມຍິນດີຕໍ່ຜົນສໍາເລັດຂອງການຮ່ວມມືອາຊຽນ- ຈີນ ໃນໄລຍະໜຶ່ງປີຜ່ານມາ ໂດຍສະເພາະ ການຈັດຕັ້ງປະ ຕິບັດປີນະວັດຕະກໍາອາຊຽນ-ຈີນ 2018, ການຜັນ ຂະຫຍາຍຜົນກອງປະຊຸມ ສຸດຍອດອາ ຊຽນ-ຈີນ ຄັ້ງທີ 21, ການຈັດຕັ້ງປະຕິບັດຖະແຫຼງການວິໄສທັດຄູ່ຮ່ວມຍຸດທະສາດອາຊຽນ-ຈີນ 2030, ຖະແຫຼງການຮ່ວມ ອາຊຽນ-ຈີນ ວ່າດ້ວຍການຮ່ວມມື ດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ, ແລະ ການຈັດຕັ້ງປະຕິບັດ ບັນດາກິດຈະກຳສຳລັບ ປີແລກປ່ຽນສື່ມວນຊົນອາຊຽນ-ຈີນ 2019. ພ້ອມນີ້, ກອງປະຊຸມ ສະແດງຄວາມເພິ່ງພໍໃຈຕໍ່ຄວາມຄືບໜ້າ ໃນການຈັດຕັ້ງປະຕິບັດແຜນປະຕິບັດງານ ອາຊຽນ-ຈີນ 2016-2020 ແລະ ເຫັນດີເພີ່ມທະວີການຮ່ວມມືໃນຂົງເຂດທີ່ເປັນບູລິມະສິດ ແລະ ມີທ່າແຮງຮ່ວມກັນ ເຊັັ່ນ: ການພັດທະນາຕົວເມືອງອັດສະລິຍະ, ການສຶກສາ, ການເຊື່ອມຈອດ, ການເຊື່ອມໂຍງ ເສດຖະກິດ, ການພົວພັນລະຫວ່າງປະຊາຊົນ ກັບ ປະຊາຊົນ ແລະ ອື່ນໆ. ກອງປະຊຸມ ໄດ້ຮັບຊາບຄວາມຄືບໜ້າການກະກຽມ ໃຫ້ແກ່ກອງປະຊຸມສຸດຍອດອາຊຽນ- ຈີນ ຄັ້ງທີ 22, ຊຶ່ງຈະຈັດຂຶ້ນ ໃນເດືອນພະຈິກ 2019 ທີ່ ບາງກອກ ປະເທດໄທ ໂດຍສະ ເພາະການຮ່າງເອກະສານຜົນ ໄດ້ຮັບກອງປະຊຸມສຸດຍອດດັ່ງກ່າວ ເຊັ່ນ: ຖະແຫຼງການຮ່ວມວ່າດ້ວຍການຮັດແໜ້ນການແລກປ່ຽນດ້ານສື່ມວນຊົນ, ຖະແຫຼງການວ່າດ້ວຍການເຊື່ອມສານລະຫວ່າງ ຂໍ້ລິເລີ່ມໜຶ່ງແລວໜຶ່ງເສັ້ນທາງ ແລະ ແຜນແມ່ບົດ ວ່າດ້ວຍ ການເຊື່ອມຈອດອາຊຽນ 2025, ຖະແຫຼງການວ່າດ້ວຍການເປັນຄູ່ຮ່ວມເສດຖະກິດສີຟ້າ, ຖະແຫຼງການຮ່ວມມືຕົວເມືອງ ອັດສະລິຍະອາຊຽນ-ຈີນ, ການກຳນົດເອົາປີ 2020 ເປັນປີການຮ່ວມມືເສດຖະກິດດີຈີຕອນອາຊຽນ-ຈີນ ແລະ ການປະກາດ ການສ້າງແຜນປະຕິບັດງານອາຊຽນ-ຈີນ ສະບັບໃໝ່ ສໍາລັບປີ 2021-2025. ພິເສດ, ກອງປະຊຸມ ໄດ້ສະແດງຄວາມຍິນດີຕໍ່ການສໍາເລັດການເຈລະຈາ ຮ່າງກົດແຫ່ງການປະພຶດ ໃນທະເລຈີນໃຕ້ ຮອບທໍາອິດ ແລະ ພິທີເປີດໂຄງການທຶນການສຶກ ສາຜູ້ນຳໜຸ່ມນ້ອຍ ອາຊຽນ-ຈີນ. ສຸດທ້າຍ, ກອງປະຊຸມ ຍັງໄດ້ແລກປ່ຽນຄວາມຄິດເຫັນ ຕໍ່ ບັນຫາເດັ່ນຢູ່ພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.
ກອງປະຊຸມລັດຖະມົນຕີຕ່າງປະເທດອາຊຽນ-ຣັດເຊຍ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດຜົນກອງປະຊຸມສຸດຍອດອາຊຽນ-ຣັດເຊຍ ຄັ້ງທີ 3 ຜ່ານມາ ໂດຍສະເພາະການຜັນຂະຫຍາຍຖະແຫຼງການຜູ້ນໍາອາຊຽນ-ຣັດເຊຍ ວ່າດ້ວຍການເປັນຄູ່ຮ່ວມຍຸດທະສາດ, ຖະແຫຼງການຜູ້ນໍາອາຊຽນ-ຣັດເຊຍ ວ່າດ້ວຍການຮ່ວມມືດ້ານຄວາມໝັ້ນຄົງ ແລະ ການນຳໃຊ້ເຕັກໂນໂລຊີຂໍ້ມູນຂ່າວສານ ແລະ ບົດບັນທຶກຄວາມເຂົ້າໃຈ ລະຫວ່າງ ອາຊຽນ ແລະ ຄະນະກຳມາທິການອົງການຮ່ວມມືເສດຖະກິດຢູເຣເຊຍ ເພື່ອສົ່ງເສີມການຮ່ວມມືດ້ານເສດຖະກິດ (EEC) ໃຫ້ເປັນຮູບປະທຳ. ພ້ອມນີ້, ກອງປະຊຸມໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າການ ຈັດຕັ້ງປະຕິບັດ ແຜນປະ ຕິ ບັດງານອາຊຽນ-ຣັດເຊຍ 2016-2020 ລວມທັງການເລີ່ມຮ່າງແຜນປະຕິບັດງານ ສະບັບໃໝ່ ສຳລັບປີ 2021-2025. ສອງຝ່າຍ ໄດ້ເຫັນດີສືບຕໍ່ຮ່ວມມືກັນດ້ານຕ່າງໆ ເຊັ່ນ: ການຕ້ານອາຊະຍາກໍາຂ້າມຊາດ ແລະ ການຕ້ານຢາເສບຕິດ, ເຕັກໂນໂລຊີຂໍ້ມູນຂ່າວສານ (ICT), ການຄ້າ ແລະ ການລົງທຶນ, ການແລກປ່ຽນລະຫວ່າງພາກທຸລະກິດ ລວມທັງຜ່ານສະພາທຸລະກິດອາຊຽນ-ຣັດເຊຍ ແລະ ການພົວພັນລະຫວ່າງປະຊາຊົນ ກັບ ປະຊາຊົນ ໂດຍສະເພາະການຈັດກອງປະຊຸມສຸດຍອດຊາວໜຸ່ມອາຊຽນ-ຣັດເຊຍ ຄັ້ງທີ 5 ໃນທ້າຍປີ 2019 ທີ່ ຟີລິບປິນ, ແລະ ການຮ່ວມມື ດ້ານການສຶກສາ. ນອກນີ້, ກອງປະຊຸມຍັງໄດ້ແລກປ່ຽນ ກ່ຽວກັບ ບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ.
ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານ ອາຊຽນ-ນິວຊີແລນ 2016-2020 ໃນໄລຍະໜຶ່ງປີຜ່ານມາ ໂດຍສະເພາະ ການຈັດຕັ້ງປະຕິບັດ ຂໍ້ລິເລີ່ມ ເພື່ອການພົວພັນ ລະຫວ່າງປະຊາຊົນ ແລະ ຂໍ້ລິເລີ່ມເພື່ອຄວາມສົມບູນພູນສຸກ ຊຶ່ງໄດ້ຮັດແໜ້ນການຮ່ວມມືລະຫວ່າງອາຊຽນ ແລະ ນິວຊີແລນ ແລະ ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ. ກອງປະຊຸມ ໄດ້ສະແດງຄວາມຍິນດີຕໍ່ການເລີ່ມຂະບວນການປຶກສາຫາລື ເພື່ອສ້າງແຜນປະຕິບັດງານອາຊຽນ-ນິວຊິແລນ ສະບັບໃໝ່ ສໍາລັບປີ 2021-2025 ແນໃສ່ຮັດແໜ້ນການຮ່ວມມືການເປັນຄູ່ຮ່ວມ ຍຸດທະສາດອາຊຽນ-ນິວຊີແລນ. ກອງປະຊຸມ ໄດ້ຮັບຊາບ ຂໍ້ສະເໜີຂອງນິວຊີແລນ ເພື່ອຈັດກອງປະຊຸມສຸດຍອດອາຊຽນ-ນິວຊີແລນ ເພື່ອສະເຫຼີມສະຫຼອງ ຄົບຮອບ 45 ປີແຫ່ງການພົວພັນ ອາຊຽນ-ນິວຊີແລນ ໃນປີ 2020. ກອງປະຊຸມ ໄດ້ເຫັນດີຮັດແໜ້ນ ການຮ່ວມມືດ້ານຕ່າງໆທີ່ມີຄວາມສົນໃຈຮ່ວມກັນ ເຊັ່ນ: ການຄ້າ ແລະ ການລົງທຶນ, ການຄຸ້ມຄອງໄພພິບັດ, ການເຊື່ອມຈອດ, ແລະ ການຫຼຸດຜ່ອນຄວາມແຕກໂຕນດ້ານການພັດທະນາ. ກອງປະຊຸມຍັງໄດ້ແລກປ່ຽນ ກ່ຽວກັບ ບັນຫາພາກພື້ນ ແລະ ສາກົນທີ່ສອງຝ່າຍ ມີຄວາມສົນໃຈຮ່ວມກັນ.
(ຂ່າວ-ພາບ: ກະຊວງການຕ່າງປະເທດ)