ລັດຖະມົນຕີກະຊວງການຕ່າງປະເທດ ສືບຕໍ່ເຂົ້າຮ່ວມ ກອງປະຊຸມທີ່ບາງກອກ


...

06.08.2019 10:18     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການ ຕ່າງປະເທດ ໄດ້ສືບຕໍ່ນໍາພາ ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງ ປະເທດ ອາຊຽນບວກສາມ ຄັ້ງທີ 20 ແລະ ກອງປະຊຸມລັດຖະ ມົນຕີຕ່າງປະເທດຂອງກອງ ປະຊຸມສຸດຍອດອາຊີຕາເວັນອອກ ຄັ້ງທີ 9 ແລະ ກອງປະຊຸມເວທີປືກສາຫາລືພາກພື້ນອາຊຽນ ຫຼື ອີເອເອັຟ ຄັ້ງທີ 26 ໃນວັນທີ 2 ສິງຫານີ້ ທີ່ປະເທດໄທ.
ກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 20 ໄດ້ທົບທວນຄືນການຮ່ວມມື ໃນໄລຍະໜຶ່ງປີ ຜ່ານມາ ແລະ ໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າໃນການ ຈັດຕັ້ງປະຕິບັດແຜນປະຕິບັດງານອາຊຽນ ບວກ ສາມ 2018-2020 ໃນຂົງເຂດຕ່າງໆ ໂດຍສະເພາະໃນຂົງເຂດກະສິກໍາ ແລະ ປ່າ ໄມ້, ການພັດທະນາວິສາຫະ ກິດຂະໜາດນ້ອຍ ແລະ ກາງ, ການແລກປ່ຽນວັດທະນະທໍາ, ການເຊື່ອມຈອດ ແລະ ຂໍ້ລິເລີ່ມວ່າດ້ວຍການເຊື່ອມໂຍງອາຊຽນ. ບັນດາປະເທດອາຊຽນບວກສາມ ໄດ້ສືບຕໍ່ຢໍ້າຄວາມໝາຍໝັ້ນໃນການສົ່ງເສີມການຮ່ວມມືຫຼາຍຝ່າຍ ແລະ ລະບົບການຄ້າສາກົນແບບເປີດກວ້າງ, ທ່ຽງທໍາ ແລະ ເລັ່ງລັດການເຈລະຈາສັນຍາການເປັນຄູ່ຮ່ວມເສດຖະກິດແບບຮອບດ້ານ ລະດັບພາກພື້ນ (RCEP) ໃຫ້ສໍາເລັດໃນທ້າຍປີ 2019. ພ້ອມນີ້, ກອງປະຊຸມຍັງໄດ້ກະກຽມໃຫ້ແກ່ກອງປະຊຸມສຸດຍອດອາຊຽນບວກສາມ ຄັ້ງທີ 22 ທີ່ຈະຈັດຂຶ້ນໃນເດືອນພະຈິກ 2019 ທີ່ ບາງກອກ, ປະເທດໄທ ໂດຍສະເພາະຄວາມຄືບໜ້າໃນການຮ່າງຖະແຫຼງການຜູ້ນໍາອາຊຽນບວກສາມ ວ່າດ້ວຍການເຊື່ອມສານບັນດາຂໍ້ລິເລີ່ມການເຊື່ອມຈອດໃນພາກພື້ນ ທີ່ຈະຮັບຮອງໃນກອງປະຊຸມສຸດຍອດດັ່ງກ່າວ. ນອກນີ້, ກອງປະຊຸມ ໄດ້ຮັບຊາບຂໍ້ລິເລີ່ມຂອງໄທ ໃນການສ້າງຕັ້ງສູນອາຊຽນຜູ້ສູງອາຍຸ (active aging) ແລະ ຮັບຮອງເອົາປີ 2019 ເປັນປີນະວັດຕະກໍາ. ກອງປະຊຸມໄດ້ເຫັນດີເພີ່ມທະວີການຮ່ວມມືໃນດ້ານຕ່າງໆນໍາກັນ ເຊັ່ນ: ການຮ່ວມມືດ້ານການຄ້າ, ຄວາມໝັ້ນຄົງດ້ານສະບຽງອາຫານ, ການພັດທະນາເສດຖະກິດດີຈີຕອນ ແລະ ຕົວເມືອງອັດສະລິຍະ, ການເຊື່ອມຈອດ, ການຄຸ້ມຄອງໄພພິບັດ, ການພັດທະນາແບບຍືນຍົງ ແລະ ການຫຼຸດຜ່ອນຄວາມແຕກໂຕນດ້ານການພັດທະນາ ແລະ ອື່ນໆ. ກອງປະຊຸມຄັ້ງນີ້ຍັງໄດ້ເຫັນດີນໍາກັນໃນການສ້າງເວັບໄຊອາຊຽນບວກສາມ ແນໃສ່ສົ່ງເສີມຄວາມຮັບຮູ້ ກ່ຽວກັບ ການຮ່ວມມືໃນຂອບອາຊຽນບວກສາມໃຫ້ກວ້າງຂວາງ ແລະ ພີທີເປີດຕົວເວັບໄຊຈະມີຂຶ້ນໃນກອງປະຊຸມສຸດຍອດ ໃນທ້າຍປີນີ້. ພິເສດ, ກອງປະຊຸມຄັ້ງນີ້ຍັງໄດ້ເຫັນດີຈະອອກແຮງຮ່ວມກັນເພື່ອສາມາດບັນລຸໄດ້ເປົ້າໝາຍສຸດທ້າຍຂອງກອບການຮ່ວມມືອາຊຽນບວກສາມຄືການກ້າວໄປສູ່ການສ້າງປະຊາຄົມອາຊີຕາເວັນອອກໂດຍມີອາຊຽນເປັນແກນກາງ.
ກອງປະຊຸມລັດຖະມົນຕີຕ່າງປະເທດ ຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 9 ໄດ້ຢໍ້າຄືນບົດບາດສຳຄັນຂອງຂອບການຮ່ວມມືກອງປະຊຸມສຸດຍອດອາຊີຕາເວັນອອກ (EAS) ໃນການເປັນເວທີປຶກສາຫາລືລະດັບຜູ້ນໍາ ກ່ຽວກັບບັນຫາຍຸດທະສາດ, ການເມືອງ, ເສດຖະກິດ ແລະ ຄວາມສົມບູນພູນສຸກ ໃນພາກພື້ນອາຊີຕາເວັນອອກ. ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດ ແຜນປະຕິບັດງານການຮ່ວມມືໃນຂອບ EAS 2018-2022 ໃນໄລຍະ 1 ປີຜ່ານມາ ໂດຍສະເພາະຂົງເຂດ : ສິ່ງແວດລ້ອມ ແລະ ພະລັງງານ, ການສຶກສາ, ການເງິນ, ສາທາລະນະສຸກ ແລະ ການຕ້ານພະຍາດລະ ບາດ, ການຄຸ້ມຄອງໄພພິບັດ, ການເຊື່ອມຈອດອາຊຽນ,ເສດ ຖະກິດ ແລະ ການຄ້າ, ຄວາມໝັ້ນຄົງດ້ານສະບຽງອາຫານ, ແລະ ການຮ່ວມມືທາງທະເລ ແລະ ໄດ້ຊຸກຍູ້ໃຫ້ສືບຕໍ່ການ ຈັດຕັ້ງປະຕິບັດແຜນປະຕິບັດງານດັ່ງກ່າວລວມທັງຮ່ວມມືກັນເພື່ອຮັບມືກັບບັນຫາສິ່ງທ້າທາຍຕ່າງໆ. ພ້ອມນີ້, ຍັງໄດ້ສະແດງຄວາມຍິນດີຕໍ່ການຮັບຮອງເອົາ ເອກະສານແນວຄວາມຄິດອາຊຽນ ກ່ຽວກັບ ອິນໂດ-ປາຊີຟິກ ໂດຍຜູ້ນໍາອາຊຽນ ໃນກອງປະຊຸມສຸດຍອດອາຊຽນ ຄັ້ງທີ 34 ຊຶ່ງເອກະສານດັ່ງກ່າວ ໄດ້ສ້າງຂຶ້ນບົນພື້ນຖານຫຼັກການສໍາຄັນຕ່າງໆຂອງອາຊຽນ ແລະ ໄດ້ກໍານົດເອົາ 4 ຂົງເຂດຫຼັກເພື່ອການຮ່ວມມືຢູ່ພາກພື້ນອິນໂດ-ປາຊີຟິກ ຄື: ການເຊື່ອມຈອດ, ການພັດທະນາແບບຍືນຍົງ, ການຮ່ວມມືດ້ານເສດຖະກິດ ແລະ ການຮ່ວມມືທາງທະເລ ແລະ ໄດ້ສົ່ງເສີມໃຫ້ບັນດາປະເທດຄູ່ເຈລະຈາໃຫ້ການສະໜັບສະໜູນໃນການຈັດຕັ້ງປະຕິບັດ ເອກະສານແນວຄວາມຄຳອາຊຽນດັ່ງກ່າວ. ນອກຈາກນີ້, ກອງປະຊຸມ ຍັງໄດ້ກະກຽມໃຫ້ແກ່ ກອງປະຊຸມສຸດຍອດ EAS ຄັ້ງທີ 14 ທີ່ຈະມີຂຶ້ນໃນທ້າຍປີນີ້ທີ່ ປະເທດໄທ ໂດຍສະເພາະການຮ່າງ ສາມ ຖະແຫຼງການຂອງຜູ້ນຳ EAS : ການຮ່ວມມື ໃນການຕ້ານອາຊະຍາກໍາຂ້າມຊາດ, ການຕ້ານການຄ້າຢາເສບຕິດຜິດກົດໝາຍ ແລະ ການເປັນຄູ່ຮ່ວມເພື່ອການພັດທະນາແບບຍືນຍົງ. ພິເສດ,ໃນກອງປະຊຸມນີ້ ຍັງໄດ້ແລກປ່ຽນຄໍາຄິດເຫັນ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ກອງປະຊຸມລັດຖະມົນຕີເວທີປຶກສາຫາລືອາຊຽນ ຄັ້ງທີ 26 (26th ARF) ໃນຕອນບ່າຍຂອງວັນດຽວກັນ, ທ່ານ ລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ສືບຕໍ່ນຳພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີເວທີປຶກສາຫາລືອາຊຽນ ຄັ້ງທີ 26 (26th ARF) ແບບຄົບຄະນະ ແລະ ແບບວົງແຄບ.
ກອງປະຊຸມລັດຖະມົນຕີເວທີພາກພື້ນອາຊຽນແບບຄົບຄະນະ ຄັ້ງທີ 26 ນີ້ ໄດ້ຕີລາຄາສູງຜົນການຈັດຕັ້ງປະຕິບັດການຮ່ວມມືຂອງ ເອອາເອັຟ ໃນໜຶ່ງປີຜ່ານມາ ແລະ ໄດ້ຮັບຮອງເອົາບັນດາກິດຈະກໍາ ສຳລັບປີ 2019-2020. ພ້ອມກັນນີ້, ກອງປະຊຸມ ຍັງໄດ້ເຫັນດີຮັບຮອງເອົາ 4 ເອກະສານຄື: 1. ແຜນວຽກຂອງເວທີພາກພື້ນອາຊຽນ ກ່ຽວກັບການຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ ສຳລັບປີ 2019-2021; 2. ຖະແຫຼງການຮ່ວມກ່ຽວກັບການສົ່ງເສີມແມ່ຍິງ, ສັນຕິພາບ ແລະ ຄວາມໝັ້ນຄົງໃນເວທີພາກພື້ນອາຊຽນ; 3. ຖະແຫຼງການ ເອອາເອັຟ ວ່າດ້ວຍການເປັນຄູ່ຮ່ວມດ້ານການບິນ ແລະ 4. ຖະແຫຼງການ ເອອາເອັຟ ວ່າດ້ວຍ ການປົກປ້ອງ ແລະ ສະກັດກັ້ນລັດທິຫົວຮຸນແຮງ. ນອກນັ້ນ, ກໍ່ໄດ້ອອກຖະແຫຼງການປະທານຂອງກອງປະຊຸມລັດຖະມົນຕີເວທີພາກພື້ນອາຊຽນ ຄັ້ງທີ 26. ສ່ວນກອງປະຊຸມລັດຖະ ມົນຕີເວທີປຶກສາຫາລືອາຊຽນ ແບບວົງແຄບ, ບັນດາລັດຖະ ມົນຕີໄດ້ແລກປ່ຽນຄວາມຄິດເຫັນຢ່າງກົງໄປກົງມາ ແລະ ສ້າງສັນ ກ່ຽວກັບ ບັນຫາພົ້ນເດັ່ນຢູ່ພາກພື້ນ ແລະ ສາກົນ ເປັນຕົ້ນ: ບັນຫາຕ້ານລັດທິຫົວຮຸນແຮງ, ບັນຫາຕາເວັນອອກກາງ, ແຫຼມເກົາຫຼີ, ທະເລຈີນໃຕ້, ບັນຫາການປ່ຽນແປງດິນຟ້າອາກາດ, ບັນຫາຜົນກະທົບຈາກສົງຄາມການຄ້າ ຈີນ - ສະຫະ ລັດ, ບັນຫາຄວາມໝັ້ນຄົງທາງຄອມພິວເຕີ ແລະ ອື່ນໆ.
ຫຼັງຈາກນັ້ນ ໃນວັນທີ 3 ສິງຫາ 2019, ທ່ານ ສະເຫຼີມໄຊ ກົມມະສິດ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ແມ່ນຳ້ຂອງ-ສ.ເກົາຫຼີ ຄັ້ງທີ 9 ແລະ ຂອບການຮ່ວມມືແມ່ນຳ້ຂອງ-ຍີ່ປຸ່ນ ຄັ້ງທີ 12 ທີ່ບາງກອກ ປະເທດ ໄທ ຊຶ່ງມີບັນດາ ລັດຖະມົນຕີ ແລະ ຄະນະຜູ້ແທນ ຈາກປະເທດແມ່ນຳ້ຂອງ (ກໍາປູເຈຍ, ລາວ, ມຽນມາ, ໄທ, ຫວຽດນາມ) ແລະ ບັນດາຄູ່ ຮ່ວມພັດທະນາ (ສ. ເກົາຫຼີ ແລະ ຍີ່ປຸ່ນ) ເຂົ້າຮ່ວມຢ່າງພ້ອມພຽງ.
ກອງປະຊຸມລັດຖະມົນຕີຕ່າງປະເທດ ແມ່ນຳ້ຂອງ-ສ.ເກົາຫຼີ ຄັ້ງທີ 9 ພາຍໃຕ້ການເປັນປະທານຮ່ວມລະຫວ່າງ ທ່ານລັດຖະມົນຕີຕ່າງປະເທດ ສ.ເກົາຫຼີ ແລະ ລັດຖະມົນຕີຕ່າງປະເທດໄທ. ກອງປະຊຸມໄດ້ທົບທວນຄືນຄວາມຄືບໜ້າ ການຈັດຕັ້ງປະຕິບັດ ແລະ ຜັນ ຂະຫຍາຍຖະແຫຼງການຮ່ວມ ກອງປະຊຸມລັດຖະມົນຕີຕ່າງ ປະເທດ ແມ່ນຳ້ຂອງ-ສ.ເກົາຫຼີ ຄັ້ງທີ 8 ແລະ ແຜນປະຕິບັດ ງານແມ່ນໍ້າຂອງ-ສ.ເກົາຫຼີ 2017-2020, ເປັນຕົ້ນແມ່ນ ການຮ່ວມມືໃນ 6 ຂະແໜງ ການບຸລິມະສິດ ເຊັ່ນ: ເຕັກໂນໂລຊີ, ຂໍ້ມູນຂ່າວສານ ແລະ ການສື່ສານ, ການປັບປຸງພື້ນ ຖານໂຄງລ່າງ, ສິ່ງແວດລ້ອມ- ປ່າໄມ້ ເພື່ອເລັ່ງໃສ່ການພັດ ທະນາສີຂຽວ, ຊັບພະຍາກອນ ນຳ້, ກະສິກຳ ແລະ ການພັດ ທະນາຊັບພະຍາກອນມະນຸດ ເພື່ອສະໜັບສະໜູນ 3 ແຜນງານຂອງຂອບການຮ່ວມມືດັ່ງກ່າວ (ເສີມຂະຫຍາຍການເຊື່ອມຈອດອາຊຽນ, ການພັດ ທະນາແບບຍືນຍົງ, ການພັດ ທະນາທີ່ໃຊ້ທ່າແຮງຂອງຄົນ), ພ້ອມດຽວກັນນີ້, ກອງປະຊຸມຍັງໄດ້ທົບທວນຄວາມຄືບໜ້າ ການຈັດຕັ້ງປະຕິບັດໂຄງການ ແລະ ການຮັບຮອງເອົາໂຄງ ການໃໝ່ ທີ່ໄດ້ຮັບການຊ່ວຍ ເຫຼືອຈາກກອງທຶນແມ່ນໍ້າຂອງ- ສ.ເກົາຫຼີ ປີ 2019; ສຳລັບ ສປປ ລາວ ແມ່ນກຳລັງຈັດຕັ້ງປະຕິບັດຢູ່ 2 ໂຄງການມີມູນ ຄ່າ 773.493 ໂດລາ ແລະ ອີກ 1 ໂຄງການໄດ້ຮັບໃໝ່ມູນຄ່າ 490.000 ໂດລາ. ນອກຈາກນີ້, ກອງປະຊຸມໄດ້ຮ່ວມກັນ ປຶກສາຫາລືແຜນການຮ່ວມມືໃນຕໍ່ໜ້າ ໂດຍສະເພາະ ແມ່ນກະກຽມໃຫ້ແກ່ກອງປະຊຸມສຸດຍອດຄັ້ງປະຖົມມະລືກໃນ ທ້າຍເດືອນພະຈິກ 2019 ທີ່ ສ.ເກົາຫຼີ ແລະ ໄດ້ຮັບຮອງເອົາ ຖະແຫຼງການຮ່ວມຂອງກອງ ປະຊຸມລັດຖະມົນຕີຕ່າງປະ ເທດແມ່ນຳ້ຂອງ - ສ.ເກົາຫຼີ ຄັ້ງທີ 9.
ໃນວັນດຽວກັນ, ທ່ານ ສະເຫຼີມໄຊ ກົມມະສິດ ຍັງໄດ້ເຂົ້າຮ່ວມກອງປະຊຸມລັດ ຖະມົນຕີຕ່າງປະເທດ ແມ່ນຳ້ຂອງ-ຍີ່ປຸ່ນ ຄັ້ງທີ 12, ພາຍໃຕ້ການເປັນປະທານຮ່ວມ ລະຫວ່າງ ທ່ານລັດຖະມົນຕີຕ່າງປະເທດ ຍີ່ປຸ່ນ ແລະ ທ່ານລັດຖະມົນຕີຕ່າງປະເທດໄທ. ກອງປະຊຸມໄດ້ທົບທວນຄືນຄວາມຄືບໜ້າການຈັດຕັ້ງປະຕິບັດວຽກງານຕ່າງໆພາຍໃຕ້ຂອບການຮ່ວມມືດັ່ງກ່າວ ໃນໄລຍະ 1 ປີຜ່ານມາ ໂດຍສະເພາະແມ່ນການຈັດຕັ້ງປະຕິບັດບັນດາໂຄງການພາຍໃຕ້ຍຸດທະສາດໂຕກຽວ 2018 ທີ່ບັນດາຜູ້ນຳໄດ້ຮັບຮອງເອົາໃນກອງປະຊຸມສຸດຍອດ ແມ່ນຳ້ຂອງ-ຍີ່ປຸ່ນ ຄັ້ງທີ 10 ໃນປີ 2018. ສປປ ລາວ ໄດ້ສະແດງຄວາມຂອບໃຈຕໍ່ ຍີ່ປຸ່ນ ທີ່ໄດ້ໃຫ້ການຊ່ວຍເຫຼືອບັນດາໂຄງການການເຊື່ອມຈອດພື້ນຖານໂຄງລ່າງ ແລະ ໂຄງບົນ ເຊັ່ນ: ການພັດທະນາຊັບພະຍາກອນມະນຸດ, ການຊ່ວຍເຫຼືອດ້ານເຕັກນິກ ແລະ ການພັດທະນາພື້ນຖານໂຄງລ່າງຕາມແລວເສດຖະກິດຕາ ເວັນອອກ-ຕາເວັນຕົກ ແລະ ແລວເສດຖະກິດພາກໃຕ້. ນອກຈາກນີ້ ກອງປະຊຸມຍັງ ໄດ້ສະແດງຄວາມຊົມເຊີຍຕໍ່ຂໍ້ລິເລີ່ມຄວາມເປັນຫຸ້ນສ່ວນຍີ່ປຸ່ນ-ສ.ອາເມຣິກາ ທີ່ໄດ້ປະ ກາດຈະໃຫ້ການຊ່ວຍເຫຼືອມູນຄ່າ 29,5 ລ້ານ ໂດລາໃຫ້ແກ່ ບັນດາປະເທດພາກພື້ນແມ່ ນຳ້ຂອງ ເພື່ອພັດທະນາ ຂະ ແໜງການພະລັງງານ ແລະ ໂຄງລ່າງ. ພ້ອມດຽວກັນນີ້, ກອງປະຊຸມຍັງໄດ້ປຶກສາຫາລືແລກປ່ຽນຄຳຄິດເຫັນກ່ຽວກັບການຮ່ວມມືໃນອະນາຄົດ, ການກະກຽມໃຫ້ແກ່ກອງປະຊຸມ ສຸດຍອດແມ່ນຳ້ຂອງ-ຍີ່ປຸ່ນ ຄັ້ງທີ 11 ຊຶ່ງຈະຈັດຂຶ້ນໃນ ເດືອນພະຈິກ 2019 ທີ່ປະ ເທດໄທ ແລະ ໄດ້ຮັບຮອງເອົາ ຖະແຫຼງການປະທານຮ່ວມ ຂອງກອງປະຊຸມລັດຖະມົນຕີຕ່າງປະເທດ ແມ່ນຳ້ຂອງ-ຍີ່ປຸ່ນ ຄັ້ງທີ 12.
(ພາບ-ຂ່າວ: ກະຊວງການຕ່າງປະເທດ)