ທ່ານ ເພັດ ພົມພິພັກ ຕ້ອນຮັບ ທູດຣັດເຊຍອຳລາ


...

13.08.2019 8:38     

   ທ່ານ ເພັດ ພົມພິພັກ ລັດ ຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຂໍ່ານັບອຳລາຂອງ ທ່ານ ມິຄາອິນ ບາຣານົບ (Mikhail BARANOV) ເອກອັກຄະລັດຖະທູດ ແຫ່ງ ສະຫະພັນຣັດເຊຍ ປະຈຳ ສປປ ລາວ ໃນວັນທີ 12 ສິງຫານີ້ ທີ່ສຳນັກງານນາຍົກ ລັດຖະມົນຕີ ໃນໂອກາດທີ່ສຳ ເລັດໜ້າທີ່ການທູດຢູ່ ສປປ ລາວ.
    ໃນໂອກາດພົບປະໂອ້ລົມ ກັນທ່ານ ເພັດ ພົມພິພັກ ກໍໄດ້ ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ມິຄາ ອິນ ບາຣານົບ ທີ່ໄດ້ປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະ ພາບ ແລະ ການຮ່ວມມືລະ ຫວ່າງ ສປປ ລາວ ແລະ ຣັດເຊຍ ທີ່ມີມາແຕ່ດົນນານແລ້ວໃຫ້ ຂະຫຍາຍ ຕົວຍິ່ງໆຂຶ້ນ, ສປປ ລາວ ແລະ ຣັດເຊຍໄດ້ມີການ ແລກປ່ຽນຄະນະຜູ້ແທນໃນທຸກໆລະດັບ ເພື່ອເສີມຂະຫຍາຍ ການພົວພັນ ແລະ ການຮ່ວມມືສອງຝ່າຍ ແລະ ຫຼາຍຝ່າຍ ພ້ອມທັງສະແດງຄວາມຂອບ ໃຈມາຍັງສະຫະພັນຣັດເຊຍ ທີ່ໄດ້ໃຫ້ການຊ່ວຍເຫຼືອດ້ານ ຕ່າງໆ ໂດຍສະເພາະແມ່ນໄດ້ ໃຫ້ການຊ່ວຍເຫຼືອທຶນການສຶກ ສາແກ່ ສປປ ລາວ ເພື່ອໄປສຶກ ສາໃນລະດັບຕ່າງໆ ພ້ອມທັງອວຍພອນໃຫ້ທ່ານທູດ ຈົ່ງເດີນ ທາງກັບປະເທດດ້ວຍຄວາມສະ ຫວັດດີພາບ ແລະ ປະສົບຜົນ ສຳເລັດໃນໜ້າທີ່ໃໝ່ຂອງທ່ານທູດ.
    ໃນໂອກາດດຽວກັນ ທ່ານ ມິຄາ ອິນ ບາຣານົບ ກໍໄດ້ສະ ແດງຄວາມຂອບອົກຂອບ ໃຈຕໍ່ທ່ານ ເພັດ ພົມພິພັກ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້.
(ພາບ-ຂ່າວ: ບຸນຕອມ)