ລາວ-ຫວຽດນາມ ເພີ່ມທະວີການຮ່ວມມື ວຽກງານຍຸຕິທຳ


...

03.09.2019 9:31     

   ທ່ານ ໄຊສີ ສັນຕິວົງ ລັດຖະມົນຕີກະຊວງ ຍຸຕິທຳ ໄດ້ຕ້ອນຮັບຄະນະຜູ້ແທນສະຖາບັນຍຸຕິທຳ ຫວຽດນາມ ນຳໂດຍ ທ່ານ ເຈື່ອງ ເຖ ໂກນ ຮອງຜູ້ອຳນວຍການ ສະຖາບັນຍຸຕິທຳ ຫວຽດນາມ ເຂົ້າຢ້ຽມຂໍ່ານັບ ເມື່ອວັນທີ 30 ສິງຫາຜ່ານມາທີ່ກະຊວງດັ່ງກ່າວ ເນື່ອງໃນໂອກາດທີ່ທ່ານພ້ອມຄະນະເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 27-30 ສິງຫາຜ່ານມານີ້.
    ໂອກາດດັ່ງກ່າວ ທ່ານ ລັດຖະມົນຕີກະຊວງຍຸຕິທຳ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານ ເຈື່ອງ ເຖ ໂກນ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສ ປ ປ ລາວ ໃນຄັ້ງນີ້ ຊຶ່ງເປັນການປະກອບສ່ວນ ເສີມສ້າງສາຍພົວພັນຮ່ວມມື ແລະ ຊ່ວຍເຫຼືອຊຶ່ງກັນ ແລະ ກັນ ລະຫວ່າງ ລາວຫວຽດນາມ ເວົ້າລວມ ເວົ້າສະເພາະ ກໍຄືກະຊວງ ຍຸຕິທຳ ແຫ່ງ ສ ປ ປ ລາວ ແລະ ສະຖາບັນຍຸຕິທຳ ຫວຽດນາມ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ
    ທ່ານຮອງຜູ້ອໍານວຍການ ສະຖາບັນຍຸຕິທໍາ ຫວຽດນາມ ກໍໄດ້ກ່າວສະແດງຄວາມຂອບໃຈຕໍ່ ທ່ານລັດຖະມົນຕີກະຊວງ ຍຸຕິທຳ ທີ່ໄດ້ໃຫ້ການຕ້ອນ ຮັບຢ່າງອົບອຸ່ນ ພ້ອມນີ້ຍັງໄດ້ລາຍງານ ສະພາບການຈັດຕັ້ງປະຕິບັດບັນດາກິດຈະກຳຂອງໂຄງ-ການຊ່ວຍໜູນສະຖາບັນຍຸຕິທຳລາວໃນໄລຍະຜ່ານມາ, ລາຍງານໝາກຜົນຂອງກອງປະຊຸມ ປະກອບຄໍາເຫັນກ່ຽວກັບຮ່າງຫຼັກສູດວິຊາກໍ່ສ້າງ ແລະ ສາລະບານປະມວນເອກະສານຝຶກອົບຮົມທີ່ຈັດຂຶ້ນໃນລະຫວ່າງ ວັນທີ 27-29 ສິງຫາຜ່ານມາ ທີ່ແຂວງວຽງຈັນ ພາຍໃຕ້ໂຄງການຊ່ວຍໜູນສະຖາບັນຍຸຕິທຳລາວ ແລະ ລາຍງານຄາດໝາຍສູ້ຊົົນວຽກງານໃນຕໍ່ໜ້າໃຫ້ ທ່ານລັດຖະມົນຕີໄດ້ຮັບຊາບອີກດ້ວຍ.
(ຂ່າວ: ສຳນານ)