ທ່ານ ສະເຫຼີມໄຊ ກົມມະສິດ ເຂົ້າຮ່ວມສະຫຼອງ 20 ປີ ວັນລົງປະຊາມະຕິ ຕີມໍ-ເລສເຕ


...

03.09.2019 9:36     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ເປັນຜູ້ຕາງໜ້າພິເສດຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ນໍາພາຄະນະຜູ້ ແທນ ສປປ ລາວ ເຂົ້າຮ່ວມພິທີສະເຫຼີມສະຫຼອງວັນລົງປະຊາມະຕິ ຄົບຮອບ 20 ປີ ແຫ່ງ ສາ ທາລະນະລັດ ປະ ຊາທິປະໄຕ ຕີມໍ-ເລສເຕ ຕາມການເຊື້ອເຊີນ ຂອງ ທ່ານ ຕາອູ ມາຕານ ຣູອັກ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ຕີມໍ-ເລສເຕ.
    ພິທີດັ່ງກ່າວໄດ້ຈັດຂຶ້ນ ໃນທ້າຍເດືອນສິງຫາຜ່ານມານີ້ ທີ່ນະຄອນຫຼວງດີລີ, ຕີມເລສເຕ ໂດຍມີການນຳຂັ້ນສູງ ຂອງ ປະເທດອາຊຽນ, ອົສຕຣາລີ, ປະເທດເພື່ອນມິດ ຂອງຕີມໍ- ເລສເຕ ແລະ ຜູ້ຕາງໜ້າ ຈາກອົງການສະຫະປະຊາຊາດ ເຂົ້າຮ່ວມເປັນກຽດ ແລະ ສະ ແດງຄວາມຊົມເຊີຍມາຍັງລັດ ຖະບານ ແລະ ປະຊາຊົນຕີມໍ-ເລສເຕ ຕໍ່ເອກະລາດ ແລະ ຜົນສຳເລັດໃນການສ້າງສາ ແລະ ພັດທະນາປະເທດຊາດ ຕະຫຼອດໄລຍະ 20 ປີ ທີ່ຜ່ານມາ.
    ປະທານາທິບໍດີ ຕີມໍ-ເລສເຕ ໄດ້ໃຫ້ກຽດກ່າວເປີດພິທີ ເພື່ອຫວນລໍາລຶກເຖິງມູນເຊື້ອ ອັນພິລະອາດຫານຂອງປະຊາຊົນຕີມໍ-ເລສເຕ ໃນການຍາດເອົາເອກະລາດ ແລະ ສິດເປັນເຈົ້າຕົນເອງ ແລະ ປະດັບຫຼຽນແກ່ບຸກຄົນສຳຄັນ ທີ່ໄດ້ປະກອບສ່ວນແກ່ການຍາດເອົາເອກະລາດມາໃຫ້ ຕີມໍ-ເລສເຕ. ພ້ອມນີ້, ເຈົ້າພາບ ຍັງໄດ້ຈັດການສະແດງສິລະປະ, ວັດທະນະທຳພື້ນເມືອງຂອງຊາວຕີມໍ-ເລສເຕ ແລະ ຍິງບັ້ງໄຟດອກ ເພື່ອສະເຫຼີມສະຫຼອງພິທີດັ່ງກ່າວຢ່າງຟົດຟື້ນ ແລະ ມີຄວາມໝາຍສຳຄັນ.
    ວັນລົງປະຊາມະຕິ ເປັນວັນທີ່ມີຄວາມໝາຍສຳຄັນ ຂອງ ປະເທດຕີມໍ-ເລສເຕ ແລະ ຖືກຈັດໃຫ້ເປັນວັນພັກທາງລັດຖະການໃນແຕ່ລະປີ ເພື່ອລະນຶກເຖິງປະຫວັດສາດກ່ອນໜ້ານີ້ 20 ປີ ຊຶ່ງປະຊາຊົນຕີມໍ ໄດ້ພ້ອມໃຈກັນລົງປະຊາມະຕິແຍກຕົວເປັນເອກະລາດໃນວັນທີ 30 ສິງຫາ 1999. ປະເທດຕີມໍ-ເລສເຕ ຕັ້ງຢູ່ໃນຂົງເຂດອາຊີຕາເວັນອອກສ່ຽງໃຕ້, ມີຊາຍແດນຕິດຈອດກັບຕີມໍຕາເວັນຕົກ ຂອງອິນໂດເນເຊຍ ແລະ ມີຊາຍແດນທາງນໍ້າ ຕິດກັບປະເທດອົສຕຣາລີ ທາງທິດເໜືອ ໂດຍມີທະເລຕີມໍ ຂັ້ນກາງ, ມີເນື້ອທີ່ທັງໝົດ 15.007 ກິໂລຕາແມັດ, ມີປະຊາກອນທັງໝົດ 1, 06 ລ້ານຄົນ (ປີ 2010), ໃນນັ້ນປະຊາຊົນປະມານ 90% ຖືສາສະໜາກາໂຕລິກ ແລະ ປະກອບມີ 13 ເມືອງ.
    ສປປ ລາວ ແລະ ສປ ຕີມໍ-ເລສເຕ ສ້າງຕັ້ງສາຍພົວພັນການທູດນຳກັນໃນວັນທີ 29 ກໍລະກົດ 2002 ແລະ ໄດ້ມີການພົວພັນຮ່ວມມືກັນດີ ຢ່າງເປັນປົກກະຕິ ຕະຫຼອດໄລຍະເວລາ 17 ປີກວ່າຜ່ານມາ. ຫຼ້າສຸດ, ໃນລະຫວ່າງວັນທີ 5-8 ມິຖຸນາ 2019, ລັດຖະມົນຕີຕ່າງປະເທດ ແລະ ການຮ່ວມ ມືຂອງ ຕີມໍ-ເລສເຕ ໄດ້ເດີນ ທາງມາຢ້ຽມຢາມທາງການ ທີ່ ສປປ ລາວ ເພື່ອສືບຕໍ່ຮັດແໜ້ນ ແລະ ສົ່ງເສີມສາຍພົວ ພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະ ເທດໃຫ້ເຂົ້າສູ່ລວງເລິກ ແລະ ຂະຫຍາຍຕົວຍິ່ງໆຂຶ້ນ. ການເຂົ້າຮ່ວມພິທີສຳຄັນຄັ້ງນີ້ຂອງ ຄະນະຜູ້ແທນລາວ ເປັນການສືບຕໍ່ເຈດຕະນາລົມອັນສະເໝີຕົ້ນສະເໝີປາຍ ໃນການສົ່ງ ເສີມການພົວພັນຮ່ວມມືທີ່ດີ ລະຫວ່າງ ສປປ ລາວ ກັບບັນດາປະເທດຕ່າງໆ ໃນພາກພື້ນ ແລະ ໃນໂລກ ລວມທັງປະເທດ ຕີມໍ-ເລສເຕ ທັງຍັງເປັນການນໍາເອົາການສະໜັບສະໜູນຢ່າງຈິງໃຈຈາກລັດຖະບານ ແລະ ປະຊາຊົນ ແຫ່ງ ສປປ ລາວ ມາຍັງລັດຖະບານ ແລະ ປະຊາຊົນ ແຫ່ງ ຕີມໍ-ເລສເຕ ໃນໂອກາດທີ່ມີຄວາມໝາຍສຳຄັນຄັ້ງນີ້ ແລະ ຖືໂອກາດນີ້ສະແດງຄວາມຍິນດີ ແລະ ຊົມເຊີຍ ຕໍ່ຜົນສຳເລັດ ໃນການສ້າງສາ ແລະ ພັດທະນາປະເທດຕີມໍ-ເລສເຕ ຕະຫຼອດໄລຍະເວລາ 20 ປີຜ່ານມາ ອີກດ້ວຍ.
(ຂ່າວ-ພາບ: ກະຊວງການຕ່າງປະເທດ)