ກະຊວງ ຍທຂ ລາວ-ມາເລເຊຍ ປຶກສາຫາລື ການປະຕິບັດງານທາງລົດໄຟສິງກະໂປ-ຄຸນໝິງ


...

06.09.2019 9:08     

   ກະຊວງໂຍທາທິການ ແລະ ຂົນສົ່ງ (ຍທຂ) ຮ່ວມກັບ ກະຊວງຄົມມະນາຄົມມາເລເຊຍ ຈັດກອງປະຊຸມກອງເລຂາໜ່ວຍປະຕິບັດງານເສັ້ນທາງລົດໄຟ ສິງກະໂປ-ຄຸນໝິງ ຄັ້ງທີ 21(The 21st Special Working Group Meeting On The Singapore - Kunming Rail Link (SWG-SKRL) ຂຶ້ນໃນລະຫວ່າງວັນທີ 5-6 ກັນຍານີ້ ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ທ່ານ ໂມຮາມັດ ຄາຍຣູ ອາດິບ ອັບດູນ ລາມັນ ຫົວໜ້າຫ້ອງການຄົມມະນາຄົມມາເລເຊຍ ແລະ ເຈົ້າໜ້າທີ່ບັນດາປະເທດສະມາຊິກ SKRL ທີ່ກ່ຽວຂ້ອງເຂົ້າຮ່ວມ.
ຈຸດປະສົງກອງປະຊຸມຄັ້ງນີ້ ເພື່ອລາຍງານຄວາມຄືບໜ້າ ແລະ ຂໍ້ມູນໃໝ່ຂອງໂຄງການທາງລົດໄຟ SKRL ຂອງແຕ່ລະປະເທດສະມາຊິກ, ປຶກສາຫາລືໂຄງການຕ່າງໆທີ່ນອນຢູ່ໃນເສັ້ນທາງລົດໄຟ SKRL ແລະ ວາງແຜນວຽກງານໃນຕໍ່ໜ້າ, ສົ່ງຕໍ່ເຈົ້າພາບຈັດກອງປະຊຸມກອງເລຂາໜ່ວຍປະຕິບັດງານເສັ້ນທາງລົດໄຟ ສິງກະໂປ-ຄູນໝິງ ຄັ້ງທີ 22 ລະຫວ່າງ ສປປ ລາວ ແລະ ມຽນມາ; ສືບຕໍ່ຈາກການປະຊຸມເດືອນສິງຫາ ປີ 2018 ທີ່ປະເທດມາເລເຊຍທີ່ຜ່ານມາ ແລະ ຜ່ານການປຶກສາຫາລືກັບປະເທດສະມາຊິກ; ໃນກອງປະຊຸມຜູ້ເຂົ້າຮ່ວມໄດ້ຮັບຟັງບົດສະເໜີກ່ຽວກັບຜົນໄດ້ຮັບຂອງຮູບແບບການຂົນສົ່ງທາງລົດໄຟຂອງ SKRL, ການວິເຄາະດ້ານການເງິນ ແລະ ເສດຖະກິດຂອງເສັ້ນທາງລົດໄຟທີ່ເປັນບຸລິມະສິດຂອງລະບົບທາງລົດໄຟຂອງ SKRL, ປຶກສາຫາລືກ່ຽວກັບໂຄງການຕ່າງໆທີ່ເປັນບຸລິມະສິດຂອງລະບົບທາງລົດໄຟ ແລະ ເສັ້ນທາງລົດໄຟອື່ນໆທີ່ເຊື່ອມຈອດກັນ; ຮັບຟັງບົດສະເໜີຄວາມຄືບໜ້າ ແລະ ແຜນພັດທະນາເສັ້ນທາງລົດໄຟຂອງແຕ່ລະປະເທດສະມາຊິກ SKRL; ບົດສະເໜີກ່ຽວກັບຮ່າງບົດລາຍງານສັນຍາຂອບການຂົນສົ່ງທາງລົດໄຟຂ້າມແດນ; ບົດສຶກສາຄວາມຕ້ອງການຂົນສົ່ງ ແລະ ຮູບແບບການຂົນສົ່ງທາງລົດໄຟໃນພາກພື້ນແມ່ນ້ຳຂອງ.
(ຂ່າວ-ພາບ: ຍຸພິນທອງ)