ເປີດການນຳໃຊ້ສຳນັກງານຄະນະກຳມະການ ຮ່ວມມື ລາວ-ຫວຽດນາມ


...

10.09.2019 8:13     

   ໂຄງການປຸກສ້າງສໍານັກງານຄະນະກໍາມະການຮ່ວມມື ລາວ-ຫວຽດນາມ, ພາຍຫຼັງ ເລີ່ມລົງມືກໍ່ສ້າງມາແຕ່ວັນທີ 22 ມິຖຸນາ 2018 ແລະໃນຕອນເຊົ້າວັນທີ 9 ກັນຍານີ້ ໄດ້ເປີດນໍາໃຊ້ຢ່າງເປັນທາງການ ໂດຍແມ່ນບໍລິສັດຫຸ້ນສ່ວນກໍ່ສ້າງບໍລິການ ແລະ ການຄ້າ 36 (ຫວຽດນາມ) ຊຶ່ງເປັນບໍລິສັດຮັບເໝົາກໍ່ສ້າງ, ໂຄງການກໍ່ສ້າງສໍານັກງານຄະນະກໍາມະການຮ່ວມມື ລາວ-ຫວຽດນາມ ແມ່ນໜຶ່ງໂຄງການທີ່ນໍາໃຊ້ທຶນຊ່ວຍເຫຼືອຂອງລັດຖະບານ ສສ ຫວຽດ ນາມໃຫ້ແກ່ລັດຖະບານລາວ ຊຶ່ງມີມູນຄ່າການລົງທຶນທັງໝົດ 60.858.000.000 ດົງ ໃນນັ້ນມີທຶນຊ່ວຍເຫຼືອຂອງລັດຖະບານຫວຽດນາມ ໃຫ້ແກ່ລັດຖະບານລາວ 56.406.000.000 ດົງ ແລະ ທຶນສົມທົບຂອງລັດຖະ ບານລາວ 4,4 ຕື້ກວ່າດົງ ເປັນອາຄານກໍ່ 4 ຊັ້ນ. ເຂົ້າຮ່ວມພິທີເປີດການນໍາໃຊ້ສຳນັກງານດັ່ງກ່າວ ໂດຍມີ ທ່ານ ສຸພັນ ແກ້ວມີໄຊ ກໍາມະການສູນກາງພັກ ລັດຖະມົນຕີກະຊວງແຜນການ ແລະ ການລົງທຶນ ປະທານຄະນະກໍາມະການຮ່ວມມື ລາວ-ຫວຽດນາມ, ທ່ານ ຫງວຽນ ວັນ ຈຸງ ຮອງລັດຖະມົນຕີກະຊວງແຜນການແລະ ການລົງທຶນ ຮອງປະທານ ຄະນະກໍາມະການຮ່ວມມືຫວຽດ ນາມ-ລາວ, ທ່ານ ຫງວຽນ ແທັງ ຕຸງ ເອກອັກຄະລັດຖະທູດ ສສ ຫວຽດນາມ ປະຈໍາ ລາວ, ແຂກຖືກເຊີນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ. ໃນໂອກາດດັ່ງກ່າວ, ຕາງ ໜ້າຄະນະກໍາມະການຮ່ວມມື ຫວຽດນາມ-ລາວ, ກະຊວງແຜນການ ແລະ ການລົງທຶນ ຫວຽດນາມຍັງໄດ້ມອບເງິນຊ່ວຍເຫຼືອບັນເທົາທຸກແກ່ຜູ້ປະ ສົບໄພພິບັດນໍ້າຖ້ວມຈາກໄພທໍາມະຊາດ ຢູ່ບັນດາແຂວງພາກກາງ-ພາກໃຕ້ຂອງລາວ ເປັນຈໍານວນເງິນ 10.000 ໂດລາ ໂດຍແມ່ນທ່ານ ສຸພັນ ແກ້ວມີໄຊ ຕາງໜ້າລັດຖະບານລາວຮັບການຊ່ວຍເຫຼືອດັ່ງກ່າວ. (ຂ່າວ: ແສງຈັນ)