ການ​ນຳ​ຂັ້ນ​ສູງ​ຂອງ​ລາວ ເຂົ້າ​ຮ່ວມ​ສະ­ຫຼອງ
ວັນ­ຊາດ ສປ ຈີນ ຄົບ­ຮອບ 70 ປີ

16.09.2019 9:49     

  ການ​ນຳ​ຂັ້ນ​ສູງ​ຂອງ​ລາວ ນຳ​ໂດຍ ທ່ານ ໄຊ​ສົມ​ພອນ ພົມວິຫານ ກຳມະການ​ກົມ​ການເມືອງ​ສູນ​ກາງ​ພັກ ປະທານ​ແນວ​ລາວ​ສ້າງ​ຊາດ ໄດ້​ເຂົ້າ​ຮ່ວມ​ງານ​ລ້ຽງ​ສະເຫຼີມສະຫຼອງ​ວັນ​ສະຖາປະນາ ສປ ຈີນ ຄົບຮອບ 70 ປີ ຊຶ່ງ​ງານ​ລ້ຽງ​ຄັ້ງ​ນີ້​ໄດ້​ຮັບ​ການ​ຊີ້​ນໍາ​ໂດຍ​ກົງ​ຈາກ ທ່ານ ຈ່ຽງ ຈາ​ຍ​ຕົງ ເອກ​ອັກ​ຄະ​ລັດ​ຖະ​ທູດ​ແຫ່ງ ສປ ຈີນ ປະຈຳ ສປປ ລາວ, ສະມາຄົມ​ຊາວ​ຈີນ​ພົ້ນ​ທະເລ ແລະ ຄະນະ​ນັກ​ທຸລະ​ກິດ​ຈີນ​ປະຈຳ​ລາວ ໄດ້​ເປັນ​ເຈົ້າພາບ​ຈັດ​ຕັ້ງ​ງານ ໂດຍ​ມີ​ສະມາຄົມ​ລວມ​ຈີນ​ດຽວ​ດ້ວຍ​ສັນຕິ, ສະ​ມາຄົມ​ການ​ຄ້າ​ຈີນ ແລະ ສະພາ​ການ​ຄ້າ​ຊາວ​ຈີນ​ຕ່າງ​ດ້າວ​ປະຈຳ ສປປ ລາວ ຈັດ​ງານ​ຂຶ້ນ​ໃນ​ວັນ​ທີ 12 ກັນຍາຜ່ານ​ມາ ທີ່​ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ.
ທ່ານ ເລັ່ງ ສະຫວັນ​ວາລີ ປະທານ​ສະມາຄົມ​ຊາວ​ຈີນ​ພົ້ນ​ທະເລ ປະທານ​ຈັດ​ງານ​ໃນ​ຄັ້ງ​ນີ້ ໄດ້​ກ່າວ​ຫວນ​ຄືນ 70 ປີ​ແຫ່ງ​ການ​ສະຖາປະນາ ສປ ຈີນ ທີ່​ຈະ​ໝູນວຽນ​ມາ​ຄົບຮອບ ໃນ​ວັນ​ທີ 1/10/2019 ຊຶ່ງ​ທ່ານ​ໄດ້​ກ່າວ​ວ່າ: ກ່ອນ​ໜ້າ​ນີ້ ພັກ​ກອມ​ມູ​ນິດ​ຈີນ​ໄດ້​ນຳພາ​ນັກ​ປະຕິວັດ​ຊົນ​ຊັ້ນ​ກຳມາ​ຊີບ​ຮຸ່ນ​ກ່ອນ ແລະ ປະຊາຊົນ​ຈີນ​ທັງ​ຊາດ​ຜາບ​ແພ້​ລັດທິ​ຈັກກະພັດ​ຜູ້​ຮຸກ​ຮານ​ໂຄ່ນ​ລົ້ມ​ການ​ກົດ​ຂີ່​ຂູດ​ຮີດ​ຂອງ​ລັດທິ​ຈັກກະພັດ​ນິຍົມ, ລັດທິ​ສັກ​ດີ​ນາ ແລະ ລັດທິ​ຂຸນ​ເສິກ​ທຶນ​ນິຍົມ​ຍາດ​ມາ​ໄດ້​ໄຊຊະນະ​ແຫ່ງ​ການ​ປະຕິວັດ ສ້າງສາ​ປະເທດ​ຈີນ​ໃໝ່ ເຮັດ​ໃຫ້​ປະຊາຊົນ​ຈີນ​ໄດ້​ເປັນ​ເຈົ້າ​ຂອງ​ປະເທດ​ຊາດ​ຢ່າງ​ແທ້​ຈິງ​ກ້າວ​ສູ່​ສັງຄົມ​ນິຍົມ 70 ປີ ຜ່ານ​ມາ ປະຊາຊົນ​ຈີນ​ໄດ້​ກ້າວ​ເຂົ້າ​ສູ່​ຄວາມ​ເຂັ້ມແຂງ​ຮັ່ງມີ ການ​ພັດທະນາ​ປະເທດ​ຊາດ​ໄດ້​ມີ​ການ​ປ່ຽນແປງ​ປະເທດ​ໃຫ້​ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດທະນາ ໂດຍ​ສະເພາະ 40 ປີ​ແຫ່ງ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍ​ນອກ ປະເທດ​ຈີນ​ໄດ້​ກ້າວ​ກະໂດດ​ກາຍເປັນ​ປະເທດ​ທີ່​ມີ​ເສດຖະກິດ​ໃຫຍ່​ເປັນ​ອັນ​ດັບ​ສອງ​ຂອງ​ໂລກ ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ​ເປັນຕົ້ນ​ມາ ໂດຍ​ພາຍ​ໃຕ້​ການ​ນຳພາ​ຢ່າງ​ເຂັ້ມແຂງ​ຂອງ​ສູນ​ກາງ​ພັກ​ກອມ​ມູ​ນິດ​ຈີນ​ອັນ​ມີ​ປະທານ ສີ ຈິ້ນ​ຜິງ ເປັນ​ແກນ​ນຳ ລະດັບ​ການເມືອງ, ເສດຖະກິດ ການ​ປ້ອງ​ກັນ​ຊາດ, ວິທະຍາ​ສາດ​-​ເຕັກນິກ ແລະ ວັດທະນະທຳ​ຂອງ​ຈີນ ລ້ວນ​ແຕ່​ໄດ້​ຮັບ​ການ​ພັດທະນາ​ໃຫ້​ດີ​ຂຶ້ນ​ກຳລັງ​ແຮງ​ສັງ​ລວມ​ຂອງ​ຊາດ​ໄດ້​ຮັບ​ການ​ຍົກ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ, ຍຸດທະສາດ (ໜຶ່ງ​ແລວ​ໜຶ່ງ​ເສັ້ນທາງ) ໄດ້​ຮັບ​ໝາກຜົນ​ອັນ​ໂດດ​ເດັ່ນ ສປ ຈີນ​ໄດ້​ປະກອບສ່ວນ​ທີ່​ສຳຄັນ​ໃນ​ການ​ສ້າງ​ຄູ່​ຮ່ວມ​ຊາ​ຕາ​ກຳ​ຂອງ​ມວນ​ມະ​ນຸດ. ທ່ານ ຍັັງ​ໄດ້​ກ່າວ​ສະແດງ​ຄວາມ​ຂອບໃຈ​ມາ​ຍັງ​ພັກ​-​ລັດ, ການຈັດຕັ້ງ​ທຸກ​ພາກສ່ວນ​ທີ່​ອຳນວຍ​ຄວາມ​ສະດວກ​ໃຫ້​ຊາວ​ຈີນ​ຕ່າງ​ດ້າວ​ທີ່​ອາໄສ​ຢູ່ ສປປ ລາວ​ໄດ້​ດຳລົງ​ຊີວິດ​ຢ່າງ​ມີ​ຄວາມສຸກ​ປະກອບສ່ວນ​ໃນ​ການ​ສ້າງສາ​ພັດທະນາ​ປະເທດ​ຊາດ​ໃຫ້​ຈະເລີນ​ຮຸ່ງເຮືອງ​ກ້າວໜ້າ​ຂຶ້ນ​ໄປ​ເລື້ອຍໆ.
ສປປ ລາວ- ສປ ຈີນ ເປັນ​ປະເທດ​ເພື່ອນ​ມິດ​ມີ​ທັງ​ແມ່​ນໍ້າ ແລະ ສາຍພູ​ນ້ອຍ​ໃຫຍ່​ຕິດ​ຈອດ​ກັນ​ມີ​ໄມຕີ​ຈິດ​ມິດຕະພາບ​ທີ່​ເປັນ​ມູນເຊື້ອ​ໄດ້​ກ້າວ​ເຂົ້າ​ສູ່​ລວງ​ເລິກ​ໃນ​ຊຸມ​ປີຜ່ານມາ​ພາຍ​ໃຕ້​ການ​ຊຸກຍູ້​ຂອງ​ຜູ້ນຳ​ສູງ​ສຸດ​ທັງ​ສອງ​ປະເທດ​ໄດ້​ເຮັດ​ໃຫ້ການ​ພົວພັນ​ຮ່ວມ​ມື​ດ້ານ​ເສດຖະກິດ​ການ​ຄ້າ, ການ​ລົງທຶນ, ວິທະຍາສາດ, ການ​ສຶກສາ, ວັດທະນະທຳ ແລະ ການທ່ອງທ່ຽວ​ລະຫວ່າງ​ສອງ​ປະເທດ​ໄດ້​ຮັບ​ການ​ພັດທະນາ​ຢ່າງ​ບໍ່​ຢຸດ​ຢັ້ງ, ການ​ພົວພັນ​ແລກປ່ຽນ​ສອງ​ຝ່າຍ​ໄດ້​ຮັບ​ການ​ເພີ່ມ​ພູນ​ຄູນ​ສ້າງ​ກາຍເປັນ​ຄູ່​ຮ່ວມ​ຊາ​ຕາ​ກຳ​ແບບ​ເພື່ອນ​ບ້ານ​ທີ່​ດີ, ເພື່ອນ​ມິດ​ທີ່​ດີ, ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ ຢ່າງ​ແທ້​ຈິງ. ສປປ ລາວ ແລະ ສປ ຈີນ ໄດ້​ ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ໃນ​ວັນ​ທີ 25/4/1961.
ໃນ​ໂອກາດ​ເຂົ້າ​ຮ່ວມ​ງານ​ຄັ້ງ​ນີ້ ທ່ານ ໄຊ​ສົມ​ພອນ ພົມວິຫານ ກໍ​ໄດ້​ຂຶ້ນ​ມອບ​ກະຕ່າ​ດອກ​ໄມ້​ໃຫ້​ຄະນະ​ຈັດ​ງານ ແລະ ອວຍພອນ​ໃຫ້​ຊາວ​ຈີນ​ທີ່​ດຳລົງ​ຊີວິດ​ຢູ່ ສປປ ລາວ ຈົ່ງ​ມີ​ແຕ່​ຄວາມສຸກ​ໃນ​ການ​ສະເຫຼີມສະຫຼອງ​ວັນ​ສະຖາປະນາ ສປ ຈີນ ຄົບຮອບ 70 ປີ ພ້ອມ​ທັງ​ເປັນ​ກຳລັງ​ໜຶ່ງ​ໃນ​ການ​ຮ່ວມ​ມື​ສ້າງສາ​ພັດທະນາ​ປະເທດ​ລາວ - ຈີນ ໃຫ້​ຈະເລີນ​ຮຸ່ງເຮືອງ​ກ້າວໜ້າ​ຂຶ້ນ​ໄປ​ເລື້ອຍໆ.
(ຂ່າວ​-​ພາບ: ທອງ​ດຳ+ສຸກ​ສະຫວັນ)