ລາວ​-​ຝຣັ່ງ ປຶກ­ສາ​ຫາ­ລື​ການ​ຮ່ວມ​ມືດ້ານ​ໄອ​ຊີ​ທີ

16.09.2019 9:51     

  ທ່ານ ທັນ​ສະໄໝ ກົມ​ມະ​ສິດ ລັດຖະມົນຕີກະຊວງ​ໄປສະນີ, ໂທລະ​ຄົມມະນາຄົມ ແລະ ການ​ສື່ສານ (ປທສ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ ທ່ານ ນາງ ຟ​ລໍ​ຣອ​ງ ຊອງ​ບ​ລອງ ຣິ​ສ​ແລກ ເອກ​ອັກ​ຄະ​ລັດ​ຖະ​ທູດ ຝຣັ່ງ ປະ​ຈໍາ ສປປ ລາວ ພ້ອມ​ດ້ວຍ​ຄະນະ ເມື່ອ​ອາ​ທິດ​ຜ່ານ​ມາ​ ເນື່ອງ​ໃນ​ໂອກາດດໍາ​ລົງ​ຕໍາ​ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດຄົນ​ໃໝ່ ປະ​ຈໍາ ສປປ ລາວ
ໃນ​ໂອກາດ​ນີ້, ທ່ານ ທັນ​ສະໄໝ ກົມ​ມະ​ສິດ ໄດ້​ສະແດງ​ຄວາມ​ຍິນດີ​ຕ້ອນຮັບ, ຊົມເຊີຍ ພ້ອມ​ທັງ​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຂໍ່າ​ນັບ ແລະ ພົບ​ປະ​ຂອງ ທ່ານ​ທູດ​ຄົນ​ໃໝ່. ພ້ອມ​ນີ້, ທັງ​ສອງ​ຝ່າຍ ກໍໄດ້​ມີ​ການ​ປຶກສາ​ຫາລື​ກ່ຽວ​ກັບ​ແຜນການ​ຮ່ວມ​ມື​ໃນ​ຫຼາຍ​ດ້ານ ໂດຍ​ສະເພາະຂົງເຂດ​ວຽກ​ງານ​ ໄອ​ຊີ​ທີ ເພື່ອ​ພັດທະນາເສີມ​ສ້າງ ສາຍ​ພົວພັນ ລະຫວ່າງ ສປປ ລາວ ແລະ ຝຣັ່ງ ໃຫ້​ນັບ​ມື້​ຂະ ຫຍາຍຕົວຂຶ້ນ​ເລື້ອຍໆ​ ແລະ ກວ້າງຂວາງ​ອອກ​ຢ່າງ​ຕໍ່​ເນື່ອງ.
ທ່ານ ນາງ ຟ​ລໍ​ຣອ​ງ ຊອງ​ ບລອງ ຣິ​ສ​ແລກ ໄດ້​ສະແດງ​ຄວາມຂອບໃຈ ທີ່​ທ່ານລັດ ຖະມົນຕີ ກະຊວງ ປທສ ໄດ້​ຕ້ອນຮັບ​ການ​ເຂົ້າ​ຢ້ຽມຂໍ່າ​ນັບ​ໃນ​ຄັ້ງ​ນີ້ຢ່າງ​ອົບ​ອຸ່ນ ແລະ ໃຫ້​ຄຳ​ສັນ​ຍາ​ວ່າ​ຈະ​ປະ​ສານ​ງານ​ກັບ​ລັດ​ຖະ​ບານ​ຝ​ຣັ່ງ ເພື່ອ​ການ​ຮ່ວມ​ມື​ກັບ ສ​ປ​ປ ລາວ ໃນ​ວຽກ​ງານ ໄອ​ຊີ​ທີ.
(ຂ່າວ: ຫ້ອງການ, ພະ​ແນ​ກ​ເລຂາ​ນຸ​ການ​-​ພິທີ​ການ)