ສະ­ຫະ­ພາບ​ເອີ​ຣົບ ສືບ­ຕໍ່​ສະ­ໜັບ­ສະ­ໜູນ ສປປ ລາວ

17.09.2019 9:12     

  ເມື່ອບໍ່​ດົນຜ່ານມາ ທີ່​ສຳ ນັກງານ​ນາຍົກລັດຖະມົນຕີ, ທ່ານ   ສົມ​ດີ   ດວງດີ   ຮອງນາຍົກ ລັດຖະມົນຕີ  ລັດຖະມົນຕີ​ກະ ຊວງ​ການ​ເງິນໄດ້​ໃຫ້​ກຽດ​ຕ້ອນ ຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ​ທ່ານ ເນ​ເວັນ ມີ​ມິ​ຊາ (Neven Mimica) ຄະ​ນະ​ກໍາ​ມາ​ທິ​ການ​ເພື່ອ​ການ​ຮ່ວມ​ມື ແລະ ພັດທະນາ​ສາກົນ​ຂອງ​ສະຫະພາບ​ເອີ​ຣົບ (EU) ພ້ອມ​ດ້ວຍ​ຄະນະ​ເນື່ອງ​ໃນ​ໂອກາດເດີນທາງ​ມາ​ຢ້ຽມຢາມ ສປປ ລາວ ແລະ ເຂົ້າ​ຮ່ວມ​ພິທີ​ເປີດ 2 ໂຄງການ​ທີ່ສະຫະ ພາບ​ເອີ​ຣົບໄດ້​ໃຫ້ການ​ສະໜັບ​ສະ​ໜູນ​ສປປ ລາວ.
ໂອກາດ​ນີ້, ທ່ານ ເນ​ເວັນ ມີ​ມິ​ຊາ (Neven Mimica) ມີ​ຄໍາ​ເຫັນ​ວ່າ: ການ​ຢ້ຽມ​ຢາມ​ສປປ ລາວ​ຂອງຄະ​ນະ​ກໍາ​ມາ​ທິ​ການ​ເພື່ອ​ການ​ຮ່ວມ​ມື ແລະ ພັດທະນາ​ສາກົນ​ຂອງ​ສະຫະພາບ​ເອີ​ຣົບຖື​ວ່າ​ເປັນ​ຄັ້ງ​ທຳອິດ, ພິເສດ​ເຂົ້າ​ຮ່ວມ​ພິທີ​ເປີດ 2 ໂຄງການ​ທີ່​ໄດ້​ຮັບ​ການ​ສະໜັບສະໜູນ​ຈາກ​ອີ​ຢູ​ເຊັ່ນ: ແຜນການ​ສະໜັບສະໜູນ​ງົບ​ປະ​ມານ​ ສໍາ​ລັບ​ວຽກ​ງານ​ໂພຊະ​ນາ​ການ (Budget Support) ມູນ​ຄ່າ 54 ລ້ານ​ເອີ​ໂຣ ແລະ ໂຄງການ​ຊ່ວຍເຫຼືອ​ວຽກ​ງານ​ການ​ຄ້າ​ໃຫ້​ແກ່ ສປປ ລາວ​ພາຍ​ໃຕ້​ແຜນ​ງານ​ເຊື່ອມ​ໂຍງ​ພາກ​ພື້ນ​ອາ​ຊຽນ​ມູນ​ຄ່າ 5 ລ້ານ​ເອີ​ໂຣ.
ດ້ານ​ການ​ຮ່ວມ​ມື​ລະ​ຫວ່າງ​ ສປປ ລາວ ແລະ ສະຫະ ພາບ​ເອີ​ຣົບ​ ມາ​ຮອດ​ປັດຈຸ​ບັນ​ເຫັນ​ວ່າ​ມີ​ການ​ເພີ່ມ​ຂຶ້ນ​ຢ່າງ​ຕໍ່​ເນື່ອງ  ຊຶ່ງ​ນັບ​ແຕ່​ປີ 2014-2020 ສະຫະພາບ​ເອີ​ຣົບ​ໄດ້​ປະກາດ​ໃຫ້ການ​ຊ່ວຍເຫຼືອ​ແກ່​ສປປ ລາວ ​ໃນ​ມູນ​ຄ່າ​ປະມານ 207 ລ້ານ​ເອີ​ໂຣ​ ໂດຍ​ເນັ້ນ​ໃສ່​ວຽກ​ງານ​ທາງ​ດ້ານ​ການ​ພັດທະ ນາ​ຊັບພະຍາກອນ​ມະນຸດ, ການ​ ສຶກສາ​ຂັ້ນ​ພື້ນຖານ, ດ້ານສາ ທາລະນະ​ສຸກ,  ດ້ານ​ວຽກງານ​ສິດທິ​ມະນຸດ ແລະ ກົດໝາຍ, ດ້ານ​ການ​ປົກຄອງ ແລະ ອື່ນໆ.
ພ້ອມ​ດຽວ​ກັນ​ນີ້, ຍັງ​ສືບຕໍ່ ສະໜັບສະໜູນ​ແຜນ​ພັດທະນາ​ເສດ​ຖະ​ກິດ​-​ສັງຄົມ 5 ປີ​ ຄັ້ງ​ທີ IX ເພື່ອ​ບັນລຸ​ເປົ້າໝາຍ​ສະຫັດ​ສະ​ວັດ  ເພື່ອ​ຫຼຸດ​ພົ້ນ​ອອກ​ຈາກ​ສະຖານະ​ພາບ​ດ້ອຍ​ພັດທະນາ​ໃນ​ປີ 2024; ສືບຕໍ່​ຊ່ວຍເຫຼືອ​ແຜນ​ງົບ​ປະມານ​ແຫ່ງ​ລັດ ເພື່ອ​ຮັບປະກັນ​ການ​ສະໜອງ​ງົບ ປະມານ​ໃນ​ຂົງ​ວັດທະນະທຳ-ສັງຄົມ​ໃຫ້​ບັນລຸ​ຕາມ​ຈຸດປະສົງ​ເປົ້າ​ໝາຍ​ຂອງ​ລັດ​ຖະ​ບານ.
ໂອກາດ​ດຽວ​ກັນ, ທ່ານ ສົມ​ດີ ດວງ​ດີ  ໄດ້ມີ​ຄຳ​ເຫັນ​ ຊຶ່ງ​ທ່ານໄດ້​ຕີລາຄາການຮ່ວມ​ ມື​ຮອບດ້ານລະຫວ່າງ​ລາວ​-​ສະຫະພາບ​ເອີຣົບ​ ໃນ​ໄລຍະ ​ຜ່ານມາ​ເຖິງ​ປັດຈຸບັນ ໂດຍສະ ເພາະ​ແມ່ນໂຄງການ​ຕ່າງໆ​ ທີ່ EU ໄດ້​ຮັບ​ການ​ສະໜັບ ສະໜູນ ​ເປັນຕົ້ນ ໂຄງການສະ ໜັບສະໜູນ​ຂະແໜງການ​ຄ້າ, ແຜນ​ງານ​ຄໍ້າ​ປະກັນ​ສະບຽງ​ອາຫານ ແລະ ໂພຊະ​ນາ​ການ, ແຜນ​ງານ​ພັດທະນາ​ເນີດ​ເນີນ ​ສູງ​ພາກ​ເໜືອ, ໂຄງການ​ພັດ ທະນາ​ການ​ສຶກສາ​ຂັ້ນ​ພື້ນຖານ,  ແຜນການ​ສະໜັບສະໜູນ​ງົບ​ປະ​ມານ​  ສໍາ​ລັບ​ວຽກ​ງານ​ໂພຊະ​ນາ​ການ ແລະ ອື່ນໆ​ມີ​ຄວາມ​ສໍາ​ຄັນ​ຫຼາຍ​ເພາະວ່າ​ເປັນ​ໂຄງການ​ບຸລິມະສິດ​ຂອງ​ລັດ​ຖະ​ບານ.
ຫວັງ​ຢ່າງ​ຍິງ​ວ່າ​ ໃນ​ຕໍ່​ໜ້າ​ ສປປ ລາວ ​ຈະ​ໄດ້​ຮັບການ​ສະ ໜັບສະໜູນ​ຫຼາຍ​ຂຶ້ນ​ຈາກ EU ພ້ອມ​ທັງ​ຍິນດີ​ໃຫ້ການພົວພັນ​ຮ່ວມ​ມື​ກັບ​ບັນດາ​ປະເທດ​ສະ ມາຊິກ​ສະຫະພາບ​ເອີ​ຣົບ ເພື່ອ​ຍາດ​ແຍ່ງ​ການ​ຊ່ວຍເຫຼືອ ແລະ ດຶງ​ດູດ​ນັກ​ລົງທຶນ​ຈາກ​ບັນດາ​ປະເທດ​ດັ່ງກ່າວ​ເຂົ້າ​ມາ​ລົງທຶນ​ຢູ່​ ສປປ ລາວ​ ຫຼາຍ​ຂຶ້ນ​ກວ່າ​ເກົ່າ.
(ຂ່າວ​-​ພາບ: ກະຊວງ​ການ​ເງິນ)