ມາ​ເລ​ເຊຍ ສະ­ຫຼອງ​ວັນ­ຊາດ ແລະ ວັນ​ສ້າງ­ຕັ້ງ​ກອງ­ທັບ

17.09.2019 9:34     

   ງານ​ລ້ຽງ​ສະເຫຼີມສະຫຼອງ​ວັນຊາດ​ມາ​ເລ​ເຊຍ ​ຄົບຮອບ 62 ປີ  31/8/1957 - 31/8/2019) ແລະ ວັນ​ສ້າງຕັ້ງ​ກອງທັບ​ມາ​ເລ​ເຊຍ ຄົບຮອບ 86 ປີ (16/9/1933 - 16/9/2019) ໄດ້​ຈັດ​ຂຶ້ນ​ໃນ​ຕອນ​ຄໍ່າ​ຂອງ​ວັນ​ທີ 13 ກັນຍາ ຜ່ານ​ມາ ທີ່​ໂຮງແຮມແລນ​ມາກ ນະຄອນຫຼວງ​ວຽງ​ຈັນ ໂດຍ​ມີ ທ່ານ ທັນ​ສະໄໝ ກົມ​ມະ​ສິດ ລັດຖະມົນຕີ​ກະຊວງ​ໄປສະນີ, ໂທລະ​ຄົມມະນາຄົມ ແລະ ການ​ສື່ສານ; ມີ​ບັນດາ​ລັດຖະມົນຕີ, ຮອງ​ລັດຖະມົນຕີ, ບັນດາ​ທ່ານ​ທູຕານຸທູດ​ປະເທດ​
ເພື່ອນ​ມິດ ພ້ອມ​ດ້ວຍ​ຊາວ​ມາ​ເລ​ເຊຍ​ທີ່​ອາໄສ​ຢູ່ ສປປ ລາວ ເຂົ້າ​ຮ່ວມ.
ໃນ​ງານ​ລ້ຽງ​ຄັ້ງ​ນີ້ ທ່ານ ໂມ​ຮາ​ມັດ ໄອ​ນີ ອາ​ຕັນ ເອກ​ອັກ​ຄະ​ລັດ​ຖະ​ທູດ​ວິສາມັນ ຜູ້​ມີ​ອໍາ​ນາດ​ເຕັມ​ ແຫ່ງ ​ມາ​ເລ​ເຊຍ ປະຈຳ ສປປ ລາວ ໄດ້​ກ່າວ​ສະແດງ​ຄວາມ​ຕ້ອນຮັບ​ອັນ​ອົບ​ອຸ່ນມາ ຍັງ​ບັນດາ​ທ່ານ​ທີ່​ໃຫ້​ກຽດ​ມາ​ຮ່ວມ​ງານ  ຊຶ່ງ​ປີ​ນີ້​ ປະເທດ​ມາ​ເລ​ເຊຍກຳລັງ​ສະເຫຼີມສະຫຼອງ​ວັນຊາດ​ ຄົບຮອບ 62 ປີ ແລະ ວັນ​ສ້າງຕັ້ງ​ກອງທັບ​ມາ​ເລ​ເຊຍ ຄົບຮອບ 86 ປີ ພາຍ​ໃຕ້​ຄຳ​ຂວັນ “ຮັກ​ປະເທດ​ມາ​ເລ​ເຊຍ​ຂອງ​ຂ້ອຍ: ມາ​ເລ​ເຊຍ​ຂາວ​ສະອາດ” ຄໍາ​ຂວັນ​ດັ່ງກ່າວ​ເນັ້ນ​ເຖິງ​ຄວາມ​ສໍາ​ຄັນ​ຂອງ​ຄວາມ​ສາມັກຄີ ແລະ ຄວາມ​ຮັກ​ຊາດ ເພື່ອ​ຄວາມ​ເປັນ​ຢູ່​ທີ່​ດີ ແລະ ຄວາມ​ຈະເລີນ​ຮຸ່ງເຮືອງ​ຂອງປະ ​ເທດ. ນອກ​ນີ້​ຍັງ​ສະແດງ​ໃຫ້​ເຫັນ​ເຖິງ​ຄວາມ​ມີ​ຄຸນ​ນະ​ທໍາ​ຂອງ​ຊາວ​ມາ​ເລ​ເຊຍ ແລະ ປາ ສະຈາກ​ການ​ສໍ້​ລາດ​ບັງ​ຫຼວງ.
ທ່ານທູດ​ຍັງ​ໄດ້​ກ່າວ​ວ່າ:  ປີ​ນີ້​ຍັງ​ເປັນ​ປີ​ສະຫຼອງ​  ຄົບຮອບ 53 ປີ ແຫ່ງ​ການ​ສ້າງຕັ້ງ​ສາຍ​ພົວພັນ​ການ​ທູດ ລະຫວ່າງ ສປປ ລາວ ແລະ ມາ​ເລ​ເຊຍ ຊຶ່ງ​ສ້າງ ຕັ້ງ​ຂຶ້ນ​ເມື່ອ​ວັນ​ທີ 1 ກໍລະກົດ 1966, ຕັ້ງແຕ່​ນັ້ນ​ມາ​ສອງ​ຊາດ​ ໄດ້​ຮັກສາ​ສາຍ​ພົວພັນ ບົນ​ພື້ນ ຖານ​ຄວາມ​ໄວ້​ວາງໃຈ, ເຄົາ ລົບ, ມີ​ຄວາມ​ປາຖະໜາ​ດີ ແລະ ຄວາມ​ເຂົ້າໃຈ​ຊຶ່ງ​ກັນ ແລະ ກັນ. ມາ​ເລ​ເຊຍ​ໄດ້​ເລີ່ມ​ໂຄງການ​ຮ່ວມ​ມື​ທາງ​ດ້ານ​ວິຊາ​ການ​ ໃນ​ເດືອນ​ກັນຍາ 1980 ແລະ ໄດ້​ຈັດ​ໂຄງການ ແລະ ຫຼັກສູດ​ໃຫ້​ກັບ​ລັດຖະກອນ​ ແຫ່ງ ສປປ ລາວ ແຕ່​ປີ 1986 ຕັ້ງແຕ່​ນັ້ນ​ມາ​ມີ​ລັດຖະກອນ​ຈາກ ສປປ ລາວ ຈຳນວນ 1.543 ຄົນ ໄດ້​ເຂົ້າ​ຮ່ວມ ແລະ ໃນ​ປີ 2019 ນີ້ ມີ​ລັດຖະກອນ​ລາວ ໄດ້​ເຂົ້າ​ຮ່ວມ ​ຫຼັກສູດ​ໄລຍະ​ສັ້ນ   ພາຍ​ໃຕ້​ໂຄງ ການ​ດັ່ງກ່າວ​ຈຳນວນ 35 ຄົນ. ນອກ​ນີ້, ການ​ໄປມາຫາສູ່​ຂອງ​ປະຊາຊົນ​ຍັງ​ມີ​ທ່າ​ອ່ຽງ​ເພີ່ມ​ຂຶ້ນ ຊຶ່ງ​ໄລຍະ​ ໃນ​ເດືອນ​ກໍລະກົດ 2019 ຊາວ​ລາວ​ເດີນທາງ​ໄປ​ມາ​ເລ​ເຊຍ ​ຈໍາ​ນວນ 15.881 ເທື່ອ​ຄົນ, ເພີ່ມ​ຂຶ້ນ 11,4% ເມື່ອ​ທຽບໃສ່​ປີ​ຜ່ານ​ມາ.
ໃນ​ໂອກາດ​ນີ້, ທ່ານທູດ ຍັງ​ໄດ້​ກ່າວ​ສົ່ງ​ຄຳ​ອວຍພອນ​ໄຊ​ແດ່ປະທານ​ປະເທດ ແຫ່ງ ສປປ ລາວ, ອວຍພອນ​ໄຊແດ່ ທ່ານ ສົມເດັດ ຣາ​ຊາ​ທິ​ບໍດີ ແຫ່ງ​ປະເທດ​ມາ​ເລ​ເຊຍ ແລະ ປະຊາຊົນ​ທັງ​ສອງ​ປະເທດ ສປປ ລາວ ແລະ ມາ​ເລ​ເຊຍ ຈົ່ງ​ມີ​ສຸຂະພາບ​ເຂັ້ມແຂງ ແລະ ມີ​ຄວາມ​ຈະເລີນ​ຮຸ່ງ​ເຮືອງ.
(ຂ່າວ - ພາບ: ສຸກ​ສະຫວັນ)