ຫວຽດ­ນາມ ໃຫ້​ທຶນ​ສ້າງ​ໂຮງ­ຮຽນ​ມັດ­ທະ­ຍົມ​ຕອນ​ຕົ້ນ ເມືອງ​ຊຳ​ໃຕ້

18.09.2019 12:21     

  ເມື່ອບໍ່​ດົນ​ຜ່ານ​ມາ ຢູ່​ບ້ານຫາງ ເມືອງຊຳ​ໃຕ້ ແຂວງ ຫົວພັນ ໄດ້​ຈັດ​ພິທີ​ມອບ-ຮັບ​ໂຮງຮຽນ​ມັດທະຍົມ​ຕອນ​ຕົ້ນ​ໂພນ​ໄຊ ເມືອງຊຳ​ໃຕ້ ແຂວງ ຫົວພັນ ຢ່າງ​ເປັນ​ທາງ​ການ ໂດຍ​ການ​ເປັນ​ປະທານ​ຮ່ວມ​ຂອງ​ທ່ານ ທອງ​ຫວັງ ຄູນ​ທອນ​ຮຸ່ງ​ມີ​ໄຊ ຄະນະ​ປະຈຳ​ພັກ​ເມືອງ ຮອງ​ເຈົ້າເມືອງໆຊຳ​ໃຕ້ ແຂວງ ຫົວພັນ ແລະ ທ່ານ ຮ່າ​ວັນ​ກາ ຮອງ​ເລຂາ​ພັກ​ຜູ້​ປະຈຳການ​ພັກ​ ເມືອງ​ລ່າງ​ແຈ້ງ ແຂວງແທັງ​ຮວາ ສສ ຫວຽດນາມ ພ້ອມ​ດ້ວຍ​ ແຂກ​ຖືກ​ເຊີນ​, ​ຄູ​-ອາຈານ ແລະ ​ນັກຮຽນ​ເຂົ້າ​ຮ່ວມ.

  ໂຄງການ​ກໍ່ສ້າງ​ໂຮງຮຽນ​ມັດທະຍົມ​ຕອນ​ຕົ້ນ​ໂພນ​ໄຊ ເລີ່ມ​ລົງມື​ກໍ່ສ້າງ​ ໃນ​ວັນ​ທີ 30 ເມສາ ແລະ ສຳເລັດ​ການ​ກໍ່ສ້າງ 100% ໃນ​ວັນ​ທີ 10 ສິງຫາ ປີ 2019 ນີ້ ໂຮງຮຽນ​ຫຼັງ​ດັ່ງກ່າວມີ​ ຫ້ອງ​ຮຽນ 4 ຫ້ອງ ແຕ່​ລະ​ຫ້ອງ​ສາມາດ​ບັນຈຸ​ນັກຮຽນ​ໄດ້ 30 ຄົນ, ຫ້ອງການ​ຄູ 1 ຫ້ອງ, ຫ້ອງ​ນ້ຳ 2 ຫ້ອງ ນອກ​ນັ້ນ​ຍັງ​ມີ​ໂຕະ, ຕັ່ງນັກຮຽນ​ຈຳນວນ 60 ຊຸດ ແລະ ໂຕະ, ຕັ່ງຄູ​ຈຳນວນ 5 ຊຸດ ຊຶ່ງ​ໂຄງການ​ດັ່ງກ່າວ​ແມ່ນ​ໄດ້​ຮັບ​ທຶນ​ຊ່ວຍເຫຼືອ​ຈາກ​ພະ ນັກງານ ແລະ ປະຊາຊົນຊາວ ​ເມືອງລ່າງ​ແຈ້ງ ແຂວງແທັງຮວາ ສສ ຫວຽດນາມ ໃນ​ຈຳນວນ​ເງິນ 700 ລ້ານ​ດົງ, ຄິດໄລ່​ເປັນ​ສະກຸນ​ເງິນ​ກີບ​ເທົ່າ​ກັບ 267 ລ້ານກວ່າ​ກີບ, ລວມ​ມູນ​ຄ່າ ການ​ກໍ່ສ້າງ​ທັງ​ໝົດ 337 ລ້ານ​ກວ່າກີບ ໃນ​ນີ້​ມີ​ທຶນ​ຊຸມ​ຊົນ​ປະ ກອບສ່ວນ​ຈຳນວນ 70 ລ້ານ​ກວ່າ​ກີບ. ໂຮງຮຽນ​ຫຼັງ​ດັ່ງກ່າວ​ແມ່ນ​ປະກອບ​ມີ 5 ບ້ານ​ທີ່ຢູ່​ໃນ​ເຂດ​ບໍລິການມີ​ປະຊາກອນ​ທັງ​ໝົດ 797 ຄົນ, ຍິງ 359 ຄົນ, ມີ​ຄູ​ສອນ​ທັງ​ໝົດ 6 ຄົນ, ຍິງ 1 ຄົນ. ເປັນ​ກຽດ​ກ່າວ​ມອບ​ໂດຍ​ທ່ານ ຮ່າ​ວັນ​ກາ ຮອງ​ເລຂາພັກ ​ຜູ້​ປະຈຳການ​ພັກ ເມືອງລ່າງ​ແຈ້ງ ແຂວງແທັ​ງຮວາ ຕາງໜ້າ​ຮັບ​ໂດຍ​ທ່ານ ທອງ​ຫວັງ ຄູນ​ທອນ​ຮຸ່ງ​ມີ​ໄຊ ຄະນະ​ປະຈຳພັກ​ ເມືອງ ຮອງ​ເຈົ້າເມືອງໆຊຳໃຕ້ ແຂວງຫົວພັນ ແລະ ມອບ​ຕໍ່ໃຫ້​ຫ້ອງການ​ສຶກສາ​ທິ​ການ ແລະ ກິລາ ເມືອງກໍຄືປະຊາຊົນທີ່ນອນ ​ຢູ່​ໃນ​ເຂດ​ບໍລິການ ​ຈົ່ງ​ພ້ອມ​ກັນ​ຈັດ​ຕັ້ງ​ປະຕິບັດ​ຕາມ​ຂໍ້​ແຂ່ງຂັນ​ທີ່​ກະຊວງ​ສຶກສາ​ທິ​ການ ແລະ ກິລາ​ວາງ​ອອກ, ປົກ​ປັກ​ຮັກສາ ແລະ ຊົມໃຊ້​ໃຫ້​ເກີດ​ປະໂຫຍດ​ສູງ​ສຸດ, ເປັນ​ເຈົ້າ​ການ​ໃນ​ການ​ຊຸກຍູ້ ແລະ ສົ່ງເສີມ​ໃຫ້​ລູກ​ຫຼານ​ພາຍ​ໃນ​ບ້ານ​ຂອງ​ຕົນ​ທີ່​ມີ​ອາຍຸ​ໃນ​ເກນ​ເຂົ້າ​ຮຽນ​ໃຫ້​ເຂົ້າ​ໂຮງຮຽນ​ນັບ​ມື້​ເພີ່ມ​ຫຼາຍ​ຂຶ້ນ.
(ຂ່າວ-ພາບ: ໂອ​ທອນ ໄຊ​ຍະ​ບັນດິດ)