ງານ​ບຸນ­ມະ­ໂຫ­ລານ​ອຸຍ​ມາ​ນິ​ເຕ ຄັ້ງ​ທີ 84 ທີ່​ນະ­ຄອນ­ຫຼວງ​ປາ​ຣີ

19.09.2019 8:41     

  ເມື່ອບໍ່​ດົນ​ຜ່ານ​ມາ ໄດ້​ມີ​ພິທີ​ເປີດ​ງານ​ບຸນມະໂຫລານ ອຸຍ​ມາ​ນິ​ເຕ ຄັ້ງ​ທີ 84 ຂຶ້ນ​ທີ່​ປາ​ຣີ ແຫ່ງ ສາ​ທາ​ລະ​ນະ​ລັດຝຣັ່ງ ຊຶ່ງ​ໃນ​ໂອກາດ​ດັ່ງກ່າວ ສະຖານທູດ​ລາວ ທີ່ ປາ​ຣີ ໂດຍ​ການ​ປະສານ​ສົມທົບ​ຂອງ​ສຳພັນ​ຄົນ​ລາວ​ທີ່​ປະເທດ​ຝຣັ່ງ ໄດ້​ມີ​ການ​ເປີດ​ຮ້ານ​ວາງສະແດງ​ມູນເຊື້ອ​ຂະບວນ​ການ​ປະຕິວັດ​ຕໍ່ສູ້​ກູ້​ຊາດ​ຂອງ​ປະຊາຊົນ​ລາວ ໂດຍ​ຜ່ານ​ການ​ໂຄສະນາ ໃນ​ໜ້າ​ໜັງສືພິມ​ປະຊາຊົນ ​ສະ​ບັບທໍາ​ອິດ, ກະບອກ​ສຽງ​ຂອງ​ແນວ​ລາວ​ອິດສະຫຼະ ກໍ​ຄືສູນ​ກາງ​ພັກ​ປະຊາຊົນ ​ປະຕິວັດ​ລາວ ໃນ​ປັດ​ຈຸ​ບັນ. ງານ​ບຸນ ມະໂຫລານ ອຸຍ​ມາ​ນິ​ເຕ ໃນ​ຄັ້ງ​ນີ້​ມີ​ການ​ເຂົ້າ​ຮ່ວມ​ຂອງ ທ່ານ ຢົງ ຈັນທະ​ລັງສີ ເອກ​ອັກ​ຄະ​ລັດ​ຖະ​ທູດ ແຫ່ງ ສປປ ລາວ ປະຈຳ ສ.ຝຣັ່ງ; ທ່ານ ຫ​ງວຽນ ທຽບ ເອກ​ອັກ​ຄະ​ລັດ​ຖະ​ທູດ ແຫ່ງ ສສ. ຫວຽດນາມ ປະຈຳ ສ.ຝຣັ່ງ; ທ່ານ ເລ ຄາຍ ຮ່ວນ ຮອງ​ບັນນາທິການ​ໜັງສືພິມ​ເຍິນ​ເຢິ​ນ​ຫວຽດນາມ; ມີ​ແຂກ​ຖືກ​ເຊີນ ແລະ ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

  ໃນ​ງານ​ບຸນ​ດັ່ງກ່າວ, ທ່ານ​ເອກ​ອັກ​ຄະ​ລັດ​ຖະ​ທູດ ແຫ່ງ ສປປ ລາວ ໄດ້​ກ່າວ​ຈຸດປະສົງ ແລະ ປະຫວັດ​ຄວາມ​ເປັນ​ມາ​ໃນ​ການ​ເຂົ້າ​ຮ່ວມ​ງານ​ໃນ​ຄັ້ງ​ນີ້, ພ້ອມ​ທັງ​ໄດ້​ເລົ່າຄືນ​ປະຫວັດ​ມູນເຊື້ອ​ການ​ກຳເນີດ ແລະ ການ​ເຕີບ​ໃຫຍ່​ຂະຫຍາຍຕົວ​ຂອງ​ຂະບວນ​ການ​ຕໍ່ສູ້​ກູ້​ຊາດ​ຂອງ​ປະຊາຊົນ​ລາວ​ໂດຍ​ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ຕະຫຼອດ​ໄລຍະ​ຜ່ານ​ມາ, ໂດຍ​ຍົກ​ໃຫ້​ເຫັນ​ມູນເຊື້ອ​ອັນ​ປີ​ຊາ​ສາມາດ​ສະຫຼາດ​ສ່ອງ​ໃສ​ຂອງ​ພັກ ທີ່​ໄດ້​ນຳພາ​ກອງທັບ ແລະ ປະຊາຊົນ​ລາວ​ບັນດາເຜົ່າ​ລຸກຂຶ້ນ​ຕໍ່ສູ້​ຕ້ານ​ແອກ​ຄອບຄອງ​ຂອງ​ຕ່າງ​ຊາດ ແລະ ຍາດ​ເອົາ​ເອກະລາດ, ອຳນາດ​ອະທິປະ​ໄຕ ແລະ ຄວາມ​ມີ​ອິດສະຫຼະພາບ​ມາສູ່​ປະຊາຊົນ​ລາວ​ບັນດາ​ເຜົ່າ.

  ງານ​ບຸນມະໂຫລານ ອຸຍ​ມາ​ນິ​ເຕ ໄດ້​ຈັດ​ຂຶ້ນ​ທຸກໆ​ປີ​ ໂດຍ​ການ​ເຊື້ອ​ເຊີນ​ເອົາ​ບັນດາ​ຜູ້ຕາງໜ້າ​ສຳນັກ​ຂ່າວສານ, ໜັງສືພິມ​ກອມ​ມູ​ນິດ ແລະ ໜັງສືພິມ​ກ້າວໜ້າ​ທີ່​ເປັນ​ກະບອກ​ສຽງ​ຂອງ​ຊົນ​ຊັ້ນ​ກຳມະກອນ ແລະ ຊາວ​ຜູ້​ອອກແຮງ​ງານ​ຈາກ​ທົ່ວ​ໂລກ ລວມ​ທັງ​ບັນດາ​ອົງການ​ຈັດ​ຕັ້ງ​ທີ່​ກ້າວໜ້າ​ທີ່​ໃຫ້ການ​ສະໜັບສະໜູນ​ລະບອບ​ການເມືອງ​ກອມ​ມູ​ນິດ ຊຶ່ງ ສປປ ລາວ ແມ່ນ​ໄດ້​ເຂົ້າ​ຮ່ວມ​ໃນ​ນາມ​ໜັງສືພິມ​ປະຊາຊົນ ທີ່​ເປັນ​ກະບອກ​ສຽງ​ຂອງ​ພັກ​ປະຊາຊົນ​ປະຕິວັດ​ລາວ. ສຳລັບ​ປີ​ນີ້, ສະຖານທູດ​ລາວ​ໄດ້​ນຳ​ຜະລິດ​ຕະ​ພັນ ​ຊຶ່ງ​ເປັນ​ສີມື​ຂອງ​ຄົນ​ລາວ​ຫຼາຍ​ຢ່າງ​ມາ​ວາງສະແດງ​ເຊັ່ນ: ຮູບ​ພາບ​ການເຄື່ອນ​ໄຫວ​ຂອງ​ພັກ​ໃນ​ໄລຍະ​ຕໍ່ສູ້​ກູ້​ຊາດ ແລະ ໄລຍະ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ, ເຄື່ອງ​ຫັດຖະກຳ​ຈັກສານ ແລະ ແຜ່ນແພ​ບັນດາເຜົ່າ, ບັນດາ​ເອກະສານ​ສົ່ງເສີມ​ການ​ລົງທຶນ ແລະ ແຜ່ນ​ພັບ​ໂຄສະນາ​ການທ່ອງທ່ຽວ​ລາວ. ນອກຈາກ​ນັ້ນ, ກໍ​ໄດ້​ມີ​ການ​ຈໍາ​ໜ່າຍ​ອາຫານ​ພື້ນເມືອງ​ຂອງ​ລາວ​ຈຳນວນ​ໜຶ່ງ ຊຶ່ງ​ເປັນ​ການ​ສ້າງ​ສີສັນ ແລະ ໄດ້​ຮັບ​ຄວາມ​ນິຍົມ​ສົນໃຈ​ຈາກ​ຜູ້​ເຂົ້າ​ຮ່ວມ​ງານ​ຢ່າງ​ຫຼວງ​ຫຼາຍ.
(ຂ່າວ: ກົມ​ການ​ຂ່າວ)