ປະ­ດັບ​ຫຼຽນ​ກາ​ມິດ­ຕະ­ພາບ​ໃຫ້ທູດ​ຣັດ​ເຊຍ

20.09.2019 8:47     

   ຕອນ​ເຊົ້າ​ຂອງ​ວັນ​ທີ 19 ກັນຍາ​ນີ້ ທີ່​ກະຊວງ​ການ​ຕ່າງປະເທດ ໄດ້​ມີ​ພິທີ​ປະດັບ​ຫຼຽນ​ກາ​ມິດຕະພາບ ໃຫ້​ທ່ານ ມີ​ຄາ​ອິນ ບາ​ຣານົບ ເອກ​ອັກ​ ຄະ​ລັດ​ຖະ​ທູດ​ວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສະຫະພັນ ຣັດ​ເຊຍ ປະ​ຈໍາ ສປປ ລາວ ໃນໂອ ກາດທ່ານ​ສໍາ​ເລັດ​ການປະຕິບັດ​ ໜ້າທີ່​ການ​ທູດ ຢູ່ ສປປ ລາວ. ຕະຫຼອດ​ໄລຍະ​ເວລາ 5 ປີ ຜ່ານມາ, ທ່ານ​ເອກອັກ​ຄະ​ລັດ​ ຖະ​ທູດ ຣັດ​ເຊຍ ໄດ້​ປະກອບ ສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ເສີມ​ຂະຫຍາຍ​ການ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ ສປປ ລາວ ແລະ ສະຫະພັນ ຣັດ​ເຊຍ ດ້ວຍ​ການ​ເອົາໃຈໃສ່​ໃນ​ການ​ປະສານ​ງານ, ຊຸກຍູ້​ການ​ແລກປ່ຽນ​ການ​ຢ້ຽມຢາມ​ຂອງ​ຄະນະ​ຜູ້​ແທນ​ຂັ້ນ​ສູງ ໃນ​ລະດັບ​ຕ່າງໆ ນັບ​ແຕ່​ລະດັບ​ການ​ນໍາ​ຂອງ​ພັກ ແລະ ລັດ ຈົນ​ເຖິງ​ອົງການ​ຈັດ​ຕັ້ງ​ມະຫາຊົນ, ຊຸກຍູ້​ການ​ນໍາ ຣັດ​ເຊຍ ອະນຸມັດ​ເຄື່ອງ​ຊ່ວຍເຫຼືອ​ບັນເທົາ​ທຸກ ໃຫ້​ແກ່​ປະຊາຊົນ​ລາວ ທີ່​ໄດ້​ຮັບ​ຜົນ​ກະທົບ​ຈາກ​ເຫດການ​ໄພ​ນໍ້າ​ຖ້ວມ ຢູ່ ແຂວງ​ອັດ​ຕະ​ປື ໃນ​ປີ 2018 ຊຶ່ງ​ມີ​ມູນ​ຄ່າ​ທັງ​ໝົດ 330.000 ໂດ​ລາ​. ນອກຈາກ​ນີ້, ພາຍ​ໃຕ້​ການ​ນໍາ​ພາ​ຂອງ​ທ່ານ​ເອກ​ອັກ​ຄະ​ລັດ​ຖະ​ທູດ, ສະຖານທູດ ຣັດ​ເຊຍ ປະ​ຈໍາ ສປປ ລາວ ໄດ້​ຕັ້ງໜ້າ​ປະກອບສ່ວນ​ເຂົ້າ​ຮ່ວມ​ບັນດາ​ກິດຈະ​ກໍາຕ່າງໆ​ຂອງ​ສອງ​ປະເທດ ທີ່​ຈັດ​ຂຶ້ນ​ໃນ​ແຕ່​ລະ​ປີ ອັນ​ໄດ້​ເຮັດ​ໃຫ້ການ​ພົວພັນ​ຮ່ວມ​ມື​ສອງ​ຝ່າຍ​ມີ​ບາດກ້າວ​ຂະຫຍາຍຕົວ​ຫຼາຍ​ຂຶ້ນ​ກວ່າ​ເກົ່າເຊັ່ນ: ຂະແໜງການສຶກ ສາ, ການ​ລົງທຶນ, ການ​ທະ ຫານ, ການທ່ອງທ່ຽວ ແລະ ຂະ ແໜງການ​ອື່ນໆ.

   ສະນັ້ນ, ເພື່ອ​ເປັນ​ການ​ຍ້ອງຍໍ​ສັນລະເສີນ ແລະ ຊົມ ເຊີຍ​ຄຸນງາມຄວາມດີ ກໍຄື​ຜົນ ງານ​ຂອງ​ທ່ານ​ທູດ​ດັ່ງກ່າວ, ນາຍົກລັດຖະມົນຕີ ແຫ່ງ ສປປ ລາວ  ຈຶ່ງ​ໄດ້​ຕົກລົງ​ປະດັບ​ຫຼຽນ​ກາ​ມິດຕະພາບ​ໃຫ້​ແກ່ ທ່ານ ມີ​ຄາ​ອິນ ບາ​ຣາ​ນົບ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສະຫະພັນ ຣັດ​ເຊຍ ປະ​ຈໍາ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ໂດຍ​ແມ່ນທ່ານ ສະເຫຼີມໄຊ ກົມ​ມະ​ສິດ ລັດຖະມົນຕີ​ກະ ຊວງ​ການ​ຕ່າງປະເທດໄດ້​ຕາງ ໜ້າລັດຖະບານ ແຫ່ງ  ສປປ ລາວ ໃຫ້​ກຽດ​ປະດັບ​ຫຼຽນ​ກາ​ມິດຕະພາບ​ດັ່ງ​ກ່າວ.