ໄຊ​ຍະ​ບູ​ລີ​-​ເລີຍ ຮ່ວມ​ມື​ກັນ​ດ້ານ​ການ​ຄ້າ ແລະ ທ່ອງ​ທ່ຽວ

20.09.2019 8:49     

   ເພື່ອ​ເປັນ​ການ​ສືບຕໍ່​ຈັດ​ຕັ້ງ​ປະຕິບັດ​ເນື້ອ​ໃນ​ຂອງ​ບົດບັນທຶກດ້ານ​ການ​ຄ້າ ແລະ ການ ທ່ອງທ່ຽວ ຂອງ​ທັງ​ສອງ​ແຂວງ​ຄື: ແຂວງ ໄຊ​ຍະ​ບູ​ລີ ສປປ​ລາວ ແລະ ຈັ່ງ​ຫວັດເລີຍ ຣາ​ຊະ​ອານາຈັກ​ໄທ ໃຫ້​ໄດ້ຮັບ​ຜົນ​ສໍາ​ເລັດ​ນັ້ນ, ໃນ​ຕອນ​ບ່າຍ​ຂອງ​ວັນ​ທີ 13 ກັນ​ຍາ​ຜ່ານ​ມາ ທີ່​ຫ້ອງ​ຮັບແຂກ​ຫ້ອງ​ວ່າການ​ແຂວງໄຊ​ຍະ​ບູ​ລີ, ທ່ານ ນາງ ບຸນ​ພັກ ອິນ​ທະ​ປັນຍາ ຮອງ​ເຈົ້າແຂວງໆ​ໄຊ​ຍະ​ບູ​ລີ ໄດ້​ຕ້ອນຮັບ​ການ​ເຂົ້າ​ ຢ້ຽມ​ຂໍ່າ​ນັບ​ຂອງທ່ານ ຊະ​ນາດ ຊັດຊະວານ​ວົງ ຮອງ​ຜູ້​ວ່າຈັງ​ຫວັດ​ເລີຍ ພ້ອມ​ດ້ວຍ​ຄະ​ນະ.

   ການ​ພົບ​ປະກັນ​ຄັ້ງ​ນີ້ ໂດຍ​ ມີ​ຈຸດປະສົງ​ເພື່ອ​ປືກ​ສາຫາລື​ກັນ​ດ້ານ​ການ​ຄ້າ​ຊາຍ​ແດນ ແລະ ການທ່ອງທ່ຽວ ​ເປັນຕົ້ນແມ່ນ ສິນຄ້າ​ທີ່​ຈະ​ສົ່ງ​ອອກ ແລະ ນໍາ​ເຂົ້າ, ຜົນ​ຜະລິດ​ກະ​ສິ​ກໍາ, ສິນຄ້າ​ໂອ​ດ໊ອບ​ທີ່​ເປັນ​ເອກະລັກ​ສະເພາະ​ຂອງ​ແຕ່​ລະ​ຝ່າຍ, ການ​ເຂົ້າ​-​ອອກ ຜ່ານ​ດ່ານ​ຕ່າງໆ​ຂອງ​ແຂວງ​-​ຈັ່ງ​ຫວັດ ຕ້ອງ​ໄດ້​ອໍາ​ນວຍ​ຄວາມ​ສະດວກ​ໃຫ້​ກັບ​ນັກ​ທ່ອງ​ທ່ຽວ, ພໍ່ຄ້າ​ຊາວ​ຂາຍ ແລະ ປະຊາຊົນ​ທັງ​ສອງ​ຝັ່ງ ເພື່ອ​ບໍ່​ເປັນ​ການ​ຖ່ວງດຶງ​ໃຫ້​ເສຍ​ເວລາ ແລະ ບໍ່​ສ້າງ​ຄວາມ​ລໍາ​ຄານ​ໃຫ້​ກຸ່ມ​ຄົນ​ດັ່ງກ່າວ, ປຶກສາ​ຫາລື ສະຖານທີ່​ທ່ອງ​ທ່ຽວ​ຢູ່​ແຂວງ ໄຊ​ຍະ​ບູ​ລີ ເພື່ອ​ຈະ​ດຶງ​ດູດ​ເອົາ​ນັກ​ນັກທຸລະກິດ, ຜູ້​ປະກອບ​ການ​ເຂົ້າ​ມາ​ປະມູນ ແລະ ພັດທະນາ​ແຫຼ່ງ​ທ່ອງ​ທ່ຽວ​ຕ່າງໆ, ເພື່ອ​ຮອງ​ຮັບ​ນັກ​ທ່ອງ​ທ່ຽວ ມາ​ທ່ຽວ​ແລ້ວ​ມີ​ຄວາມ​ປະທັບ​ໃຈ ແລະ ຢາກ​ມາ​ອີກ, ຫາລື​ດ້ານ​ການ​ຮອງ​ຮັບ​ຂອງ​ນັກ​ທ່ອງ​ທ່ຽວ​ເຊັ່ນ: ເຮືອນ​ພັກ, ຮ້ານ​ອາຫານ ແລະ ໂຮມ​ສະ​ເຕ ຕ້ອງ​ຄຸ້ມ​ຄອງ​ດ້ານ​ລາຄາ​ໃຫ້​ຢູ່​ໃນ​ຄວາມ​ເໝາະ​ສົມ, ອາຫານ​ການ​ກິນ​ຕ້ອງ​ໃຫ້​ມີ​ແບບ​ພື້ນ​ບ້ານ, ອາຫານ​ຕາມ​ທໍາ​ມະ​ຊາດ ແລະ ຕ້ອງ​ໃຫ້​ມີ​ການ​ຈໍາ​ລອງ​ວິຖີ​ຊີວິດ​ແບບ​ດັ່ງ​ເດີມ​ໃຫ້​ນັກ​ທ່ອງ​ທ່ຽວ​ໄດ້​ເຫັນ, ສ້າງ​ກິດ​ຈະ​ກໍາ​ໃຫ້​ນັກ​ທ່ອງ​ທ່ຽວ​ໄດ້​ລ່ອງ​ເຮືອ​ຕາມ​ລໍານໍ້າ​ຂອງ​ໂດຍ​ເລີ່ມ​ແຕ່​ທ່າເຮືອ​ເມືອງປາກ​ລາຍ ຫາ ອໍາ​ເພີຊຽງ​ຄານ ແລະ ແຕ່ ຊຽງ​ຄານ ຫາ ປາກ​ລາຍ, ສ້າງ​ໂອກາດ​ໃຫ້​ປະຊາຊົນທັງ​ ສອງ​ແຂວງ​ໄດ້​ໄປ​-​ມາ​ຫາ​ສູ່​ກັນ, ແລກປ່ຽນ​ວັດ​ທະ​ນະ​ທໍາ-​ຮີດຄອງ​ປະເພນີ, ຈັດ​ໃຫ້​ມີ​ຕະຫຼາດນັດ​ສິນຄ້າ​ໂອ​ດ໊ອບ, ສະແດງ​ສິລະ​ປະ​-​ວັນນະຄະດີ​ຊຶ່ງ​ກັນ ແລະ ກັນ ໂດຍ​ຜັດ​ປ່ຽນ​ກັນ​ເປັນ​ເຈົ້າພາບ, ທັງ​ນີ້​ກໍ​ເພື່ອ​ເຮັດ​ໃຫ້​ທັງ​ສອງ​ແຂວງ​ໄດ້​ຮັບ​ຜົນ​ປະໂຫຍດ​ຈາກ​ການ​ຄ້າ ແລະ ການທ່ອງທ່ຽວ​ຮ່ວມ​ກັນ.
  (ໂດຍ: ອຸ່ນ​ເຮືອນ ໂພທິ​ລັກ)