ສາຍ­ຮູບ­ເງົາ​ດອກ​ຈຳ­ປາ​ບານ, ຜົນ​ການ​ຮ່ວມ​ມື​ລາວ​-​ຈີນ

20.09.2019 9:14     

   ກົມ​ຮູບເງົາ ກະຊວງ​ຖະແຫຼງ​ຂ່າວ,ວັດ​ທະ​ນະ​ທໍາ ແລະ ທ່ອງ​ທ່ຽວ ຮ່ວມ​ມື​ກັບ​ບໍລິສັດ ຈົງ​ສື້​ຢາ​ໄທ້ ປັກ​ກິ່ງ ຈັດ​ພິທີ​ສາຍຮູບເງົາ "ເລື່ອງ​ດອກ​ຈໍາ​ປາ​ບານ" ຢ່າງ​ເປັນ​ທາງ​ການ ໃນວັນທີ 18 ກັນຍາ​ນີ້ ທີ່​ໂຮງ​ຮູບເງົາ​ສູນ​ການ ​ຄ້າ​ວຽງ​ຈັນ​ເຊັນ​ເຕີ, ຈຸດປະສົງ​ເພື່ອ​ເປັນ​ການ​ສະເຫຼີມສະຫຼອງ​ສາຍ​ພົວ ພັນ​ການ​ຮ່ວມ​ມື​ມິດຕະພາບ​ລາວ​-​ຈີນ​ແລະ ພິເສດ​ປີ​ນີ້​ກໍ​ເປັນ​ປີ​ທ່ອງ​ທ່ຽວ​ລາວ​-​ຈີນ ໃນ​ປີ 2019 ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ບົວ​ເງິນ ຊາ​ພູ​ວົງ ຮອງ​ລັດຖະມົນຕີ​ກະຊວງ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ (ຖວທ), ທ່ານ ນາງ ຕິ່ງ​ຊິງ ຫົວໜ້າສູນ​ ວັດ​ທະ​ນະ​ທໍາ​ຈີນ ປະ​ຈໍາ ລາວ; ມີຕາງ ໜ້າ​ຈາກ​ພະແນກການ​ຕ່າງໆທີ່​ກ່ຽວ ຂ້ອງ, ແຂກ​ຖືກ​ເຊີນ ພ້ອມ​ດ້ວຍ​ສື່​ ມວນ​ຊົນ​ເຂົ້າ​ຮ່ວມ.

   ທ່ານ ວິທູນ ສູນ​ດາ​ຣາ ຫົວໜ້າ​ກົມ​ຮູບເງົາ ໄດ້​ກ່າວ​ວ່າ: ຍ້ອນ​ເຫັນ​ໄດ້​ເຖິງ​ບົດບາດ ແລະ ຄວາມ​ສໍາ​ຄັນ​ຂອງ​ຮູບເງົາ, ມາ​ໃນ​ວັນ​ທີ 25 ເມສາ 2016 ກົມ​ຮູບເງົາ ຖວທ ແຫ່ງ ສປປ ລາວ ຈຶ່ງ​ໄດ້​ເຊັນ​ສັນຍາ​ການ​ຮ່ວມ​ມື​ກັບບໍລິສັດ ຈົງ​ສື້​ຢາ​ໄທ້ ສື່​ວັດ​ທະ​ນະ​ທໍາ​ສາ​ກົນ​ຈໍາ​ກັດ ແຫ່ງ ສາທາລະນະ​ລັດ​ປະຊາຊົນ​ຈີນ ໃນ​ການ​ຮ່ວມ​ມື​ຜະລິດ​ຮູບເງົາ​ເລື່ອງ "ດອກ​ຈໍາ​ປາ​ບານ"ເພື່ອ​ສະເຫຼີມສະຫຼອງ​ສາຍ​ພົວພັນ​ການ​ທູດ​ລະຫວ່າງ​ລາວ​-​ຈີນ ຄົບຮອບ 55 ປີ (25 ເມສາ 1961-25 ເມສາ 2016) ໂດຍ​ສະເພາະ​ເພື່ອ​ເປັນ​ການ​ສ້າງ​ຂະບວນ​ການ​ຂາໍ່​ນັບ​ຮັບ​ຕ້ອນ​ວັນ​ສໍາ​ຄັນ​ຂອງ​ພັກ ຂອງ​ຊາດ ກໍ​ຄື​ປີ​ທ່ອງ​ທ່ຽວ​ລາວ​-​ຈີນ ພິເສດ​ແມ່ນ​ເພື່ອ​ຂາໍ່​ນັບ​ຮັບ​ຕ້ອນ​ວັນຊາດ ສປ ຈີນ ໃນ​ວັນ​ທີ 1 ຕຸລາ ຄົບຮອບ 70 ປີ. ຮູບເງົາ "ດອກ​ຈໍາ​ປາ​ບານ" ເປັນຮູບເງົາ​ປະ​ຫວັດ​ສາດ​ທີ່​ຮ່ວມ​ມື​ກັນ​ສ້າງ​ຄັ້ງ​ທໍາ​ອິດ​ລະຫວ່າງ​ລາວ​-​ຈີນ ຊຶ່ງ​ເປັນ​ຮູບເງົາ​ທີ່​ມີ​ເນື້ອ​ໃນ​ສະແດງ​ໃຫ້​ເຫັນ​ສາວ​ລາວ ແລະ ບ່າວ​ຈີນ ເປັນ​ນັກສະແດງ​ຫຼັກ​ທີ່​ຈະ​ນໍາ​ພາ​ທ່ານ​ຜູ້​ຊົມ​ໄປ​ສໍາ​ຜັດ​ເຖິງ​ຄວາມ​ຮັກ, ຄວາມ​ຄິດ​ຮອດ, ຄວາມຜູກພັນ​ທີ່​ແຊກ​ຊ້ອນ​ດ້ວຍ​ເນື້ອ​ໃນ​ທີ່​ມີ​ ຄວາມ​ໝາຍ​ທາງ​ປະ​ຫວັດ​ສາດ​ແຫ່ງ​ສາຍ​ພົວພັນ​ມິດຕະພາບ ແລະ ຄວາມ​ສາມັກຄີ​ຮັກແພງ​ລະຫວ່າງ​ສອງ​ຊາດ​ລາວ​-​ຈີນ, ຈີນ​-​ລາວ, ພິເສດ​ຮູບເງົາ​ເລື່ອງ​ນີ້​ແມ່ນ​ເຕັມ​ໄປ​ດ້ວຍ​ສະຖານທີ່​ທ່ອງ​ທ່ຽວທີ່​ສວຍ​ງາມ​ທາງ​ດ້ານ​ທໍາມະ ​ຊາດ, ປະ​ຫວັດ​ສາດ ແລະ ວັດ​ທະ​ນະ​ທໍາ​ຊອງ​ປະເທດ​ລາວ​ອີກ​ດ້ວຍ.

   ຮູບເງົາ​ດັ່ງກ່າວ​ແມ່ນ​ຈະ​ເຂົ້າ ສາຍຢູ່​ໂຮງ​ຮູບເງົາ​ເມ​ເຈີ (ສູນ​ການ​ຄ້າ​ວຽງ​ຈັນ​ເຊັນ​ເຕີ) ໃນ​ວັນ​ທີ 18 ກັນຍາ 2019 ແມ່ນ​ສາຍ​ຮອບ​ສື່​ມວນ​ຊົນ ແລະ ໃນ​ວັນ​ທີ 19 ກັນຍາ 2019 ແມ່ນ​ສາຍ​ພ້ອມ​ກັນ​ທົ່ວ​ປະ​ເທດ.

   (ຂ່າວ: ຍຸ​ພິນ​ທອງ)