ປະ­ທານ ສນຊ ຕ້ອນ­ຮັບ​ທູດ​ຝຣັ່ງ

24.09.2019 8:43     

   ທ່ານ ໄຊ​ສົມ​ພອນ ພົມວິຫານ ກໍາ​ມະ​ການ​ກົມ​ການເມືອງ​ສູນ​ກາງພັກ ປະທານ ສູນ​ກາງ​ແນວ​ລາວ​ສ້າງ​ຊາດ (ສນຊ ) ​ໄດ້ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ​ທ່ານ ​ນາງ ຟລໍ​ຣ້ອ​ງ ຊັອ​ງບ​ລັອ​ງ - ​ຣິ​ສ​ແລກ ເອກ​ອັກ​ຄະ​ລັດ​ຖະ​ທູດຝຣັ່ງ ປະ​ຈໍາ ສປປ ລາວ ຄົນ​ໃໝ່ ໃນ​ວັນ​ທີ 20 ກັນຍາ​ຜ່ານ​ມາ ທີ່​ຫ້ອງ​ຮັບແຂກ ສນຊ ມີ​ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ .

   ໃນ​ໂອກາດ​ນີ້, ທ່ານປະ ທານ ສນຊ ໄດ້​ສະແດງ​ຄວາມ​ຍິນດີ​ຕ້ອນຮັບ ທ່ານ ເອກ​ອັກ​ຄະ​ລັດ​ຖະ​ທູດ​ຄົນໃໝ່ ປະ​ຈໍາ ສປປ ລາວ ຊຶ່ງ​ທ່ານ​ໄດ້​ລາຍ​ງານ​ສະພາບ ໂດຍ​ຫຍໍ້​ໃຫ້​ທ່ານ​ທູດ​ໄດ້​ຮັບ​ຊາບ​ວ່າ : ສນຊ ໄດ້​ມີ​ບົດບາດ​ໃນ​ການ​ສຶກສາ​ອົບຮົມ​ເຕົ້າໂຮມ​ຄວາມ​ສາມັກຄີ​ປອງ​ດອງ​ຂອງ​ປະຊາຊົນ​ລາວ​ບັນດາເຜົ່າ, ສາສະໜາ, ເພດ​ໄວ. ພ້ອມ​ກັນ​ນີ້, ສນຊ ໄດ້​ມີ​ການ​ຮ່ວມ​ມື​ກັບ​ກະຊວງ​ຊັບ​ພະຍາ​ກອນ​ທໍາ​ມະ​ຊາດ ແລະ ສິ່ງແວດລ້ອມ ທາງ​ດ້ານ​ໂຄງການ​ປົກ​ປັກ​ຮັກສາ​ສິ່ງແວດລ້ອມ, ຮ່ວມ​ມື​ກັບ​ກະຊວງ​ສາທາລະນະ​ສຸກ ທາງ​ດ້ານ​ໂພຊະ​ນາ​ການ, ການ​ສັກ​ຢາ​ປ້ອງ​ກັນ​ພະຍາດ​ຂອງ​ປະຊາຊົນ​ລາວ​ບັນດາເຜົ່າ, ໄດ້​ຮ່ວມ​ມື​ກັບ​ອົງການ​ອາຫານ​ໂລກ​-​ອົງການ​ອຸຍນີ​ເຊັບ ແລະ ຮ່ວມ​ມື​ກັບ​ບັນດາ​ປະເທດ​ອ້ອມ​ຂ້າງ ຮ່ວມ​ມື​ກັບ​ທະນາ​ຄານ​ພົງ​ສະຫວັນ​ໃນ​ການ​ເຮັດ​ທົດ​ລອງ​ໂຄງການ​ສ້າງ​ຄອບຄົວ ແລະ ບ້ານ​ສາມັກຄີ​ປອງ​ດອງ ຢູ່​ແຂວງ​ໄຊ​ສົມບູນ ແລະ ແຂວງ ສະຫວັນ​ນະ​ເຂດ ພ້ອມ​ກັນ​ນີ້ ອົງການ​ແນວ​ລາວ​ສ້າງ​ຊາດ ຍັງ​ໄດ້​ຕິດຕາມ​ກວດກາ​ເກັບ​ກໍາ​ຫາງ​ສຽງ​ສັງຄົມ​ຂໍ້​ຂັດຂ້ອງ​ໝອງ​ໃຈ​ເພື່ອ​ສົ່ງ​ໃຫ້​ພາກສ່ວນ​ຕ່າງໆ​ແກ້​ໄຂ.

   ທ່ານເອກ​ອັກ​ຄະ​ລັດ​ຖະ​ທູດ ຝຣັ່ງ ປະ​ຈໍາ ສປປ ລາວ ຄົນ​ໃໝ່ ໄດ້​ສະແດງ​ຄວາມ​ຂອບໃຈ​ຕໍ່​ກັບ​ການ​ຕ້ອນຮັບ​ອັນ​ອົບ​ອຸ່ນ​ຂອງ​ທ່ານ ປະທານ ສນຊ ພ້ອມ​ທັງ​ແຈ້ງ ຈຸດປະສົງ​ຂອງ​ການ​ເຂົ້າ​ຢ້ຽມ​ພົບ​ປະ​ຄັ້ງ​ນີ້ ເພື່ອ​ເປັນ​ການ​ສືບຕໍ່​ສາຍ​ພົວພັນ​ການ​ຮ່ວມ​ມື​ລະຫວ່າງ ລາວ​-​ຝຣັ່ງ.
(ຂ່າວ​-​ພາບ: ສນຊ)