ລາວ​-​ຫວຽດ­ນາມ ສຳ­ເລັດ​ການ​ພົບ​ປະ​ແລກ­ປ່ຽນ​ສິ­ລະ​ປະວັນ­ນະ­ຄະ­ດີ ແລະ ກິ­ລາ

26.09.2019 9:20     

   ສານ​ປະຊາຊົນ​ສູງ​ສຸດ ແຫ່ງ ສປປ ລາວ ໄດ້​ສຳເລັດ​ການ​ພົບ​ປະ ​ແລກປ່ຽນ​ກິ​ລາ​-​ສິລະປະ​ວັນນະຄະດີ ຮ່ວມ​ກັບສານ​ປະຊາຊົນສູງ​ສຸດ ສສ ຫວຽດນາມ ພ້ອມ​ທັງ​ເຂົ້າ​ຮ່ວມ​ພິທີ​ສະເຫຼີມສະຫຼອງວັນ​ສ້າງຕັ້ງ​ສານ​ປະຊາຊົນ (ວັ​ນທີ 13 ກັນຍາ 1945-13 ກັນ​ຍາ 2019) ຄົບຮອບ 74 ປີ ຂອງ ສສ ຫວຽດນາມ ທີ່ ແຂວງເຫງະ​ອານ ສສ ຫວຽດນາມ ລະຫວ່າງ ວັນ​ທີ 11-15 ກັນຍາ ຜ່ານ​ມາ ໂດຍ​ການ​ເຂົ້າ​ຮ່ວມ​ຂອງ ທ່ານ ຫງວຽນ ຮວ່າ​ບິງ ເລຂາທິການ​ສູນ​ກາງ​ພັກ ປະທານ​ ສານ​ປະຊາຊົນ​ສູງ​ສຸດ ແຫ່ງ ສສ ຫວຽດນາມ, ທ່ານ ຄຳ​ພາ ແສງ​ດາ​ຣາ ປະທານ​ສານ​ປະຊາຊົນ​ສູງ​ສຸດ ແຫ່ງ ສ​ປ​ປ ລາວ ພ້ອມ​ດ້ວຍ​ພະນັກງານ​ເຂົ້າ​ຮ່ວມ.

   ການ​ແຂ່ງຂັນ​ກິລາ ແລະ ສິລະ​ປະ​ວັນນະຄະດີ ມິດຕະພາບ ຄັ້ງ​ນີ້ ສຸດ​ທີ່​ມີ​ຄວາມ​ໝາຍ​ຄວາມ​ສຳຄັນ ມັນ​ໄດ້​ເປັນ​ຂີດ​ໝາຍ​ປະຫວັດສາດ​ຂອງ​ສອງ​ຂະແໜງການ​ສານ​ປະຊາຊົນ​ທັງ 2 ປະເທດ, ເປັນ​ການ​ເພີ່ມ​ພູນ​ຄູນ​ສ້າງ​ໃຫ້​ຄວາມ​ສາມັກຄີ​ແບບ​ພິເສດ​ຂອງ​ສອງ​ຊາດ ລາວ​-​ຫວຽດນາມ ນັບ​ມື້​ໃສ​ແຈ້ງ​ຂຶ້ນ ຊຶ່ງ​ໃນ​ປີ​ນີ້​ສານ​ປະຊາຊົນ​ລາວ​-​ຫວຽດນາມ, ຫວຽດນາມ​-​ລາວ ຊຶ່ງ​ເປັນ​ປີ​ທີ່​ສານ​ປະຊາຊົນ​ລາວ​ສ້າງ​ຂະບວນ​ການ​ເພື່ອ​ສະເຫຼີມສະຫຼອງ​ວັນ​ສ້າງຕັ້ງ​ສານ​ປະຊາຊົນ​ລາວ​ຄົບ ຮອບ 37 ປີ ທີ່​ຜ່ານ​ມາ ແລະ ພິເສດ​ກໍ​ແມ່ນ​ວັນ​ສ້າງຕັ້ງ​ສານ​ປະຊາຊົນ ແຫ່ງ ສສ ຫວຽດນາມ ຄົບຮອບ 74 ປີ ໃນ​ຂະບວນ​ການ​ແລກປ່ຽນ​ກິລາ ແລະ​ສິລະປະ​ວັນນະຄະດີ​ໃນ​ຄັ້ງ​ນີ້​ມີ​ນັກ​ກິລາ ແລະ ສິລະ​ປະ ເຂົ້າ​ຮ່ວມ​ທັງ​ໝົດ 200 ກວ່າ​ທ່ານ ຊຶ່ງ​ປະກອບ​ດ້ວຍ​ກິລາ ເຕະບານ, ຕີ​ບານ, ດອກ​ປີກ​ໄກ່, ປິງປ໋ອງ, ດຶງ​ເຊືອກ ແລະ ກິລາ​ຕີ​ກ໋ອບ. ຕະຫຼອດ​ໄລຍະການ​ແຂ່ງຂັນ​ເຫັນ​ໄດ້​ວ່າ​​ຄູ​ຝຶກ, ນັກ​ກິລາ ໄດ້​ພ້ອມ​ກັນ​ເອົາໃຈໃສ່​ຝືກ​ຊ້ອມ ແລະ ທຸ້ມເທ​ເຫື່ອແຮງ​ຂອງ​ຕົ້ນ​ເຂົ້າ​ໃນ​ກິລາ​ແຫ່ງ​ມິດຕະພາບ​ໃນ​ຄັ້ງ​ນີ້, ດ້ວຍ​ຄວາມ​ຮັບຜິດຊອບ​ສູງ, ມີ​ຄວາມ​ສາມັກຄີ, ເຄົາລົບ​​ຊຶ່ງກັນ ແລະ ກັນ ອັນ​ໄດ້​ເຮັດ​ໃຫ້​​ຂະ​ບວນ​ການ​ແ​ຂ່ງ​ຂັນ​ມີ​ບັນຍາກາດ​ຟົດຟື້ນ ແລະ ເຕັມ​ໄປ​ດ້ວຍ​ມິດ​ຕະ​ພາບ.

   ທັງ​ສອງ​ຂະແໜງການ​ສານ​ໄດ້​ຕີ​ລາຄາ​ສູງ​ຕໍ່​ການ​ແລກປ່ຽນ​ກິ ລາ ແລະ ສິລະປະ​ວັນນະຄະດີ​ໃນ​ ຄັ້ງ​ນີ້ ​ເພື່ອ​ເປັນ​ການສ້າງ​ສາຍ​ພົວ ພັນ, ຄວາມ​ສາມັກຄີ​ແບບ​ພິເສດ​ຮອບດ້ານ​ຂອງ​ສອງ​ພັກ​-​ສອງ​ລັດ ແລະ ປະຊາຊົນ​ສອງ​ຊາດ ລາວ​-​ຫວຽດນາມ, ຫວຽດນາມ​-​ລາວ, ເວົ້າ​ລວມ​ເວົ້າ​ສະເພາະ​ແມ່ນ​ເຮັດ​ໃຫ້ການ​ພົວພັນ​ລະຫວ່າງ ສານ​ປະຊາຊົນ ແຫ່ງ ສປປ ລາວ ແລະ ສານ​ປະຊາຊົນ ສສ ຫວຽດນາມ, ນັບ​ມື້​ແຕກ​ດອກ​ອອກ​ຜົົນທາງ​ກວ້າງ ແລະ ​​ທາງເ​ລິກ, ສຶກ​ສາ​ໄດ້​ມູນເຊື້ອ​ຮີດຄອງ​ປະເພນີທີ່​ມີ​ມາ​ແຕ່​ດຶກ​ດຳ​ບັນ ທັງ​ເປັນ​ການ​ສືບຕໍ່​ສ້າງ​ລະບົບ​ສານ​ຂອງ​ສອງ​ປະເທດ​ເພື່ອ​ຮອງ​ຮັບ​ກັບ​ພາກ​ພື້ນ.
(ຂ່າວ​-​ພາບ: ສານ​ປະຊາຊົນ​ສູງ​ສຸດ)