ໂຄງ­ການ​ທາງ​ລົດ­ໄຟ ລາວ​-​ຈີນ ຈັດ​ງານ​ສະ­ແດງ​ສິ­ລະ​ປະ ວັນ­ນະ­ຄະ­ດີ

26.09.2019 9:58     

   ໂຄງການທາງ​ລົດໄຟ ​ລາວ​-​ຈີນໄດ້​ ຈັດ​ງານ​ສະແດງ​ສິລະ​ປະໃນ​ຫົວຂໍ້ ທາງ​ລົດໄຟ​ລາວ​-​ຈີນ ຊ່ວຍ​ບັນລຸ​ຄວາມ​ຝັນ​ສືບຕໍ່​ເພີ່ມ​ທະວີ​ມິດ ຕະພາບ​ລາວ​-​ຈີນ ຂຶ້ນ​ໃນ​ວັນ​ທີ 24 ກັນຍາຜ່ານ​ມາ ທີ່​ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ, ເນື່ອງ​ໃນ​ໂອກາດ​ວຽກ​ງານ​ກໍ່ສ້າງ​ພື້ນຖານ​ທາງ​ລົດໄຟ​ລາວ​-​ຈີນ​ຢູ່​ໃນ​ໄລຍະ​ບາດ​ລ້ຽວ​ບາດ​ຕໍ່​ໃນ​ການ​ບັນລຸ​ວຽກ​ງານ​ເພື່ອ​ບົ່ງ​ບອກ​ເຖິງ​ຜົນ​ສຳເລັດ​ຂອງ​ການ​ກໍ່​ສ້າງ ໂດຍ​ເປັນ​ກຽດ​ເຂົ້າ​ຮ່ວມຂອງ​ທ່ານ ສັນຕິ​ສຸກ ສິມ​ມະ​ລາ​ວົງ ຮອງ​ລັດຖະມົນຕີ ກະຊວງ​ໂຍທາ​ທິ​ການ ແລະ ຂົນສົ່ງ (ຍທຂ), ທ່ານ ຈ້າວ​ເສີງ​ກ່າງ ຕ່າງ​ໜ້າ​ສະຖານທູດ​ຈີນ​ປະຈຳ ສປປ ລາວ, ທ່ານ ຫຼີ​ປີງ​ສວນ ອຳ​ນວຍ​ການ​ບໍລິສັດ​ທາງ​ລົດໄຟ​ລາວ​-​ຈີນ ຈຳ ກັດ ພ້ອມ​ແຂກ​ຖືກ​ເຊີນ​ເຂົ້າ​ຮ່ວມ.

   ທ່ານ ສັນຕິ​ສຸກ ສິມ​ມະ​ລາ​ວົງ ໄດ້​ກ່າວ​ວ່າ: ການສະແດງ​ສິລະ​ປະ​ຄັ້ງ​ນີ້ ແມ່ນ​ມີ​ຄວາມ​ໝາຍ​ຄວາມ​ສຳຄັນ​ຂອງ​ການ​ກໍ່ສ້າງ​ໂຄງການ​ທາງ​ລົດໄຟ ລາວ​-​ຈີນ ເນື່ອງ​ໃນ​ໂອກາດ​ວຽກ​ງານ​ການ​ກໍ່ສ້າງ​ພື້ນຖານ​ທາງ​ລົດໄຟ ລາວ​-​ຈີນ ໄດ້​ບັນລຸ​ໃນ​ຫຼາຍ​ໜ້າ​ວຽກ. ການ​ກໍ່ສ້າງ​ເສັ້ນທາງ​ລົດໄຟ ລາວ​-​ຈີນ ທີ່​ກຳລັງ​ເລັ່ງ​ການ​ກໍ່ສ້າງ​ແມ່ນ​ໄດ້​ກາຍເປັນ​ສັນຍາ​ລັກ​ແຫ່ງ​ມິດຕະພາບ​ທີ່​ມີ​ມູນເຊື້ອ​ຂອງ ລາວ​-​ຈີນ ໃນ​ຍຸກ​ສະໄໝ​ໃໝ່, ເປັນ​ຕົວ​ຂັບ​ເຄື່ອນ​ໃນ​ການ​​ພັດທະນາ​ສັງຄົມ​ທີ່​ທັນ​ສະໄໝ​ຂອງ ສປປ ລາວ.ໂຄງການທາງ​ລົດໄຟ ລາວ​-​ຈີນ ເປັນ​ໂຄງການຮ່ວມ​ມື​ຂອງ​ສອງ​ລັດຖະບານ​ທີ່​ການ​ນໍາ​ສູງ​ສຸດ​ທັງ​ສອງ​ພັກ​-​ສອງ​ລັດ ລາວ ແລະ ຈີນ​ໄດ້​ລົງ​ຊຸກຍູ້​ຢ່າງ​ໃກ້ຊິດ, ເປັນ​ໂຄງການ​ເຊື່ອມ​ໂຍງ​ລະຫວ່າງ ຂໍ້​ລິ​ເລີ່ມ "ໜຶ່ງ​ແລວ ໜຶ່ງ​ເສັ້ນທາງ" ຂອງ ສປ​ ຈີນ​ແລະ ຍຸດທະສາດ"ຫັນ​ປະເທດ​ລາວ​ຈາກ​ປະເທດ​ບໍ່​ມີ​ຊາຍ​ແດນ​ຕິດ​ກັບ​ທະເລ​ໃຫ້​ເປັນ​ປະເທດ​ເຊື່ອມ​ຕໍ່" ຂອງ ສປປ ລາວ.

   ລາຍການ​ທີ່​ນຳ​ມາສະ​ແດງ​ຄັ້ງ​ນີ້ ມີ​ທັງ​ໝົດ 20 ລາຍການປະກອບ​ມີບົດ​ຟ້ອນ, ບົດ​ຮ້ອງ, ລະຄອນ​ເວທີ, ກາ​ຍະ​ສິນ, ໃນ​ແຕ່​ລະລາຍ​ການ​ສະທ້ອນ​ໃຫ້​ເຫັນ​ຄວາມ​ຈູບ​ຈ້າວ​ຫ້າວ ຫັນ ແລະ ຄວາມ​ເບີກບານ​ມ່ວນຊື່ນ​ໃນ​ການ​ປະຕິບັດ​ໜ້າທີ່​ວຽກ​ງານ​ໃນ​ການ​ກໍ່ສ້າງ​ທາງ​ລົດໄຟ ໂດຍ​ແມ່ນ​ຄະນະ​ສິລະ​ປະ​ຈາກ​ກຸ່ມ​ບໍລິສັດ​ທາງ​ເລກ 8 ສປ ຈີນ ຈຳກັດ, ກຸ່ມ​ບໍລິສັດ​ວິ​ສະ​ວະ​ກໍາ​ທາງ​ລົດໄຟ ສາກົນ ສປ ຈີນ, ກຸ່ມ​ບໍລິສັດ​ວິ​ສະ​ວະ​ກໍາ​ທາງ​ລົດໄຟ​ເລກ 2 ສປ ຈີນ, ກຸ່ມ​ບໍ​ລິ​ສັດ​ທາງ​ລົດ​ໄຟ​ເລກ 5 ສ​ປ ຈີນ ຈຳ​ກັດ, ກຸ່ມ​ບໍ​ລິ​ສັດ​ວິ​ສະວະ​ ກຳອອກ​ແບບ​ເລກ 2 ສ​ປ ຈີນ, ວິທະ ຍາ»ໄລ​ວິຊາ​ຊີບ​ສິລະ​ປະ​ເສສວນ, ກຸ່ມ ​ບໍລິສັດ​ກໍ່ສ້າງ​ພະລັງງານ​ໄຟຟ້າ ສປ ຈີນ, ຄະນະ​ຟ້ອນ​ບ້ານ​ລາວ​ແດນ​ຈຳ ປາ, ກຸ່ມ​ບໍລິ ສັດ​ວິ​ສະ​ວະ​ກໍາ​ທາງ​ລົດ ໄຟ​ກວາງ​ໂຈວ ສປ ຈີນ ຈຳ​ກັດ.
(ຂ່າວ: ມະ​ລິ; ພາບ: ຍຸ​ພິນທອງ)