ລາວ​-​ຫວຽດ­ນາມ ສືບ­ຕໍ່​ຮ່ວມ​ມື​ຢ່າງ​ແໜ້ນ​ແຟ້ນ

27.09.2019 10:59     

   ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ນາງ ຫງວຽນ ທິ ກິມ ເງິນ ກໍາມະການກົມການເມືອງສູນກາງພັກ ປະທານສະພາແຫ່ງຊາດແຫ່ງ ສສ.ຫວຽດນາມ ພ້ອມດ້ວຍຄະນະ ໃນວັນທີ 26 ກັນຍານີ້ ທີ່ສໍານັກງານນາຍົກລັດຖະມົນຕີ.
    ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍຕ້ອນຮັບອັນອົບອຸ່ນຕໍ່ທ່ານ ປະທານສະພາແຫ່ງຊາດຫວຽດນາມ ພ້ອມດ້ວຍຄະນະ ທີ່ໄດ້ເດີນ ທາງມາຢ້ຽມຢາມ ແລະ ເຮັດວຽກຢູ່ ສປປ ລາວໃນຄັ້ງນີ້, ອັນໄດ້ນໍາເອົາໄມຕີຈິດມິດຕະພາບອັນດູດດື່ມ,ຄວາມສາມັກຄີຮັກແພງ ຖານສະຫາຍອ້າຍນ້ອງ ອັນໃກ້ຊິດສະໜິດສະໝົມມາສູ່ ສປປ ລາວ ເວົ້າລວມ, ເວົ້າສະເພາະ ກໍແມ່ນສອງສະພາແຫ່ງຊາດລາວ-ຫວຽດນາມ ຊຶ່ງເປັນການສືບຕໍ່ປະກອບສ່ວນສໍາຄັນເຂົ້າໃນການເສີມຂະຫຍາຍມູນເຊື້ອອັນດີງາມ ແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຂະຫຍາຍຕົວກ້າວສູ່ລວງເລິກ ແລະ ມີປະສິດທິຜົນຍິ່ງໆຂຶ້ນ.
    ໃນໂອກາດນີ້, ທ່ານປະ ທານສະພາແຫ່ງຊາດຫວຽດ ນາມ ໄດ້ສະແດງຄວາມ ຂອບໃຈຕໍ່ທ່ານນາຍົກລັດຖະມົນຕີ ທີ່ໄດ້ໃຫ້ການ ຕ້ອນຮັບອັນອົບອຸ່ນ ພ້ອມທັງນຳເອົາຄໍາຢ້ຽມຢາມຖາມຂ່າວຂອງ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງສສ.ຫວຽດນາມ ມາຍັງທ່ານນາຍົກລັດຖະມົນຕີ ແຫ່ງ ສປປ ລາວ. ຈາກນັ້ນ, ທ່ານປະທານສະພາແຫ່ງຊາດຫວຽດນາມ ກໍໄດ້ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ກັບທ່ານນາຍົກລັດຖະມົນຕີ ໄດ້ຮັບຊາບ.
    ໃນວັນດຽວກັນ ທີ່ສະພາແຫ່່ງຊາດ ໄດ້ມີກອງປະຊຸມພົບປະສອງຝ່າຍ, ຝ່າຍລາວ ຊຶ່ງນໍາໂດຍ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ປະທານສະພາແຫ່ງຊາດ, ຝ່າຍຫວຽດນາມ ຊຶ່ງນໍາໂດຍ ທ່ານນາງ ຫງວຽນ ທິ ກິມ ເງິນ ກໍາມະການກົມການເມືອງສູນກາງພັກ ປະທານສະພາແຫ່ງຊາດແຫ່ງ ສສ.ຫວຽດນາມ. ທັງສອງຝ່າຍ ໄດ້ແຈ້ງສະພາບການເຄື່ອນໄຫວວຽກງານໃຫ້ກັນ ແລະ ກັນຊາບໂດຍຫຍໍ້ ເປັນຕົ້ນແມ່ນທິດທາງການຮ່ວມມືກັນໃນປີ 2020 ແລະ ປຶກສາຫາລືວຽກອື່ນໆ ທີ່ສອງຝ່າຍມີຄວາມສົນໃຈນຳກັນ.
(ຂ່າວ: ແສງຈັນ)