ລັດ­ຖະ­ມົນ­ຕີ​ກະ­ຊວງ ຖວທ ຕ້ອນ­ຮັບທູດ​ໄທ

27.09.2019 9:46     

   ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ ກະຊວງຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ໄດ້​ຕ້ອນຮັບ ທ່ານ ກຽດ​ຕິ​ຄຸນ ຊາດ​ປຣະ​ເສີດ ເອກ​ອັກ​ຄະ​ຣາ​ຊະ​ທູດ ແຫ່ງ ຣາ​ຊະ​ອານາຈັກ​ໄທ ປະຈຳ ສປປ ລາວ ເຂົ້າ​ຢ້ຽມ​ຂໍ່າ​ນັບ​ອຳ​ລາ ເມື່ອ​ວັນ​ທີ 26 ກັນຍາ ທີ່​ຫ້ອງ​ຮັບແຂກ ກະຊວງ​ດັ່ງກ່າວ ໃນ​ໂອກາດ ທີ່​ທ່ານ ທູດ​ສຳເລັດ​ການ ປະຕິບັດ​ໜ້າທີ່​ການ​ທູດ ປະຈຳ ​ລາວ.

   ໃນ​ໂອກາດ​ດັ່ງກ່າວ ທ່ານ ລັດຖະມົນຕີ ກະຊວງ ຖວທ ໄດ້​ສະແດງ​ຄວາມ​ຕ້ອນຮັບ​ຊົມເຊີຍ ຕໍ່ ທ່ານ ກຽດ​ຕິ​ຄຸນ ຊາດ​ປຣະ​ເສີດ ທີ່​ປະສົບ​ຜົນສຳເລັດ​ໃນ​ການ​ປະຕິບັດ​ໜ້າທີ່​ການທູດ ປະຈຳ​ ສປປ ລາວ ​ໃນ​ຄັ້ງ​ນີ້ ຕະຫຼອດ​ໃນ​ໄລ​ຍະ​ການ​ປະຕິບັດ​ໜ້າທີ່ ທ່ານ ທູດ​ໄດ້​ເອົາໃຈໃສ່​ຢ່າງ​ຕັ້ງໜ້າ​ເຂົ້າ​ໃນ​ການ​ປະກອບສ່ວນ​ເສີມ​ສ້າງ​ສາຍ​ພົວພັນ​ຮ່ວມ​ມື ແລະ ຊ່ວຍເຫຼືອ​ຊຶ່ງ​ກັນ ແລະ ກັນ ຖານ​ບ້ານ​​ໃກ້​ເຮືອນ​ຄຽງ​ທີ່​ດີ​ຕໍ່​ກັນ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ນັບ​ມື້​ເພີ່ມ​ພູນ​ຄູນ​ສ້າງ​ຍິ່ງໆ​ຂຶ້ນ, ທ່ານ​ລັດຖະມົນຕີ ຍັງ​ໄດ້​ອວຍ​ພອນ​ໃຫ້ ທ່ານ​ທູດ​ຈົ່ງ​ປະສົບ​ຜົນສຳເລັດ​ໃນ​ໜ້າທີ່​ໃໝ່ ແລະ ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ.

   ທ່ານທູດ​ກໍ​ໄດ້​ສະແດງ​ຄວາມ​ຂອບໃຈຕໍ່ທ່ານລັດຖະ ມົນຕີກະຊວງ ຖວທ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ແລະ ສະແດງ​ຄວາມ​ຂອບໃຈ​ຕໍ່​ອົງ ການ​ຈັດ​ຕັ້ງ​ທຸກ​ຂັ້ນ​ຂອງ ສປປ ລາວ ທີ່​ໄດ້​ສ້າງ​ເງື່ອນໄຂ​ຄວາມ​ສະດວກ ໃນ​ການ​ປະຕິບັດ​ໜ້າທີ່​ການ​ທູດປະຈຳ​ລາວ​ຄັ້ງ​ນີ້ ຈົນ​ໄດ້​ຮັບ​ຜົນສຳເລັດ​ເປັນ​ຢ່າງ​ດີ.
(ຂ່າວ: ສຳ​ນານ)