ກອງ​ປະ­ຊຸມ​ສຸດ​ຍອດ​ວ່າ​ດ້ວຍ​ການ​ປ່ຽນ­ແປງ ດິນ​ຟ້າ​ອາ­ກາດ 2019

27.09.2019 9:50     

   ໃນ​ວັນ​ທີ 23 ກັນຍາຜ່ານ ​ມາ ຄະນະ​ຜູ້​ແທນ ສປປ ລາວ ນຳ​ໂດຍ ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ​ໄດ້​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ວ່າ​ດ້ວຍ​ການ​ປ່ຽນແປງ​ດິນ​ຟ້າ​ອາກາດ 2019 ຊຶ່ງ​ໄດ້​ຈັດ​ຂຶ້ນ ທີ່​ສຳນັກ ງານ​ໃຫຍ່​ອົງການ ສປຊ ທີ່​ນິວ​ຢອກ, ສ.ອາເມຣິກາ, ພາຍ​ໃຕ້​ຄຳ​ຂວັນ "ການ​ຕໍ່ສູ້​ທີ່​ພວກ​ເຮົາ​ເອົາ​ຊະນະ​ໄດ້ ແລະ ຕ້ອງ​ຊະນະ ໂດຍ​ມີ​ຜູ້ນຳ​ຂັ້ນ​ສູງ​ຈາກ​ປະເທດ​ສະມາຊິກ ສປຊ, ອົງການ​ຈັດ​ຕັ້ງ​ສາກົນ​ທີ່​ເຮັດ​ວຽກ​ຕິດ​ພັນ​ກັບ​ການ​ປ່ຽນແປງ​ດິນ​ຟ້າ​ອາກາດ, ອົງການ​ຈັດ​ຕັ້ງ​ທາງ​ສັງຄົມ ແລະ ພາກ​ທຸລະ​ກິດ​ເຂົ້າ​ຮ່ວມ. ຈຸດປະສົງ​ຂອງ​ກອງ​ປະຊຸມ​ຄັ້ງ​ນີ້ ແມ່ນ​ເພື່ອ​ປຶກສາ​ຫາລື​ລະດັບ​ສູງ​ໃນ​ການ​ແກ້​ໄຂ​ບັນຫາ​ການ​ປ່ຽນແປງ​ດິນ​ຟ້າ​ອາກາດ ແລະ ຊຸກຍູ້​ການຈັດຕັ້ງ​ປະຕິບັດ​ສັນຍາ ປາ​ຣີ ວ່າ​ດ້ວຍ​ການ​ປ່ຽນແປງ​ດິນ​ຟ້າ​ອາກາດ ໃຫ້​ໄວ​ຂຶ້ນ​ຕື່ມ ແລະ ເປັນ​ຮູບ​ປະ​ທຳ​ຕາມ​ລະດັບ​ຄາດ​ໝາຍ.

   ໃນ​ໄລຍະ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ, ທ່ານ ນາງ ບຸນ​ຄໍາ ວໍລະ​ຈິດ, ຮອງ​ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ກໍ​ໄດ້​ເຂົ້າ​ຮ່ວມ​ກອງ​ປະຊຸມ​ລະດັບ​ລັດຖະມົນຕີ​ກ່ຽວ​ກັບ​ການ​ລົງທຶນ​ເຂົ້າ​ໃສ່​ການ​ປັບ​ຕົວ​ເຂົ້າ​ກັບ​ການ​ປ່ຽນແປງ​ດິນ​ຟ້າ​ອາກາດ​ໂດຍ​ຜ່ານ​ກອງ​ທຶນ​ການ​ປ່ຽນແປງ​ດິນ​ຟ້າ​ອາກາດ​ສຳລັບ​ປະເທດ​ດ້ອຍ​ພັດທະນາ, ກອງ​ປະຊຸມ​ຍັງ​ໄດ້​ນຳ​ສະເໜີ​ການ​ເປັນ​ຄູ່​ຮ່ວມ​ມື​ຈັດ​ຕັ້ງ​ປະຕິບັດ​ແຜນ​ງານ​ແຫ່ງ​ຊາດ​ໃນ​ການ​ປະກອບສ່ວນ​ແກ້​ໄຂ​ບັນຫາ​ການ​ປ່ຽນແປງ​ດິນ​ຟ້າ​ອາກາດ​ຂອງ​ແຕ່​ລະ​ປະເທດ ແລະ ກອງ​ປະຊຸມ​ປິ່ນ​ອ້ອມ​ອື່ນໆ.

   ໃນ​ມື້​ດຽວ​ກັນ​ນີ້, ຄະນະ​ຜູ້​ແທນ ສປປ ລາວ ຍັງ​ໄດ້​ເຂົ້າ​ຮ່ວມ​ກອງ​ປະຊຸມ​ລະດັບ​ສູງ ສປຊ ວ່າ​ດ້ວຍ​ວຽກ​ງານ​ສາທາລະນະ​ສຸກ​ພາຍ​ໃຕ້​ຫົວຂໍ້ "ການ​ປະກັນ​ສຸຂະພາບ​ທົ່ວ​ປວງ​ຊົນ: ກ້າວ​ໄປ​ພ້ອມ​ກັນ​ເພື່ອ​ເຮັດ​ໃຫ້​ສຸຂະພາບ​ຂອງ​ທຸກ​ຄົນ​ດີ​ຂຶ້ນ" ຊຶ່ງ​ຖືກ​ຈັດ​ຂຶ້ນ​ເປັນ​ຄັ້ງ​ທຳອິດ​ພາຍຫຼັງ​ທີ່​ອົງການ ສປຊ ໄດ້​ຮັບຮອງ​ເອົາ​ບັນຫາ​ດັ່ງກ່າວ​ເປັນ​ບັນຫາ​ສາກົນ​ໃນ​ປີ 2015 ເພື່ອ​ພ້ອມ​ກັນ​ຕີ​ລາຄາ​ຄືນ​ການຈັດຕັ້ງ​ປະຕິບັດ​ບັນດາ​ພັນທະ​ສັນຍາ ແລະ ຄາດໝາຍ​ສູ້​ຊົນ​ຕ່າງໆ.
(ຂ່າວ: ກົມ​ການ​ຂ່າວ)