ຊຸກ­ຍູ້​ການ​ສ້າງ​ຄູ່​ຮ່ວມ​ຊາ­ຕາ­ກຳ​ຈີນ​-​ລາວ ໃຫ້​ກ້າວ​ສູ່ລວງ​ເລິກ ແລະ ໜັກ​ແໜ້ນ ພາຍ​ໃຕ້​ການ​ຊີ້​ນຳ​ຂອງ ແນວ​ຄິດ​ການ​ຕ່າງ­ປະ­ເທດ​ຂອງ​ສະ­ຫາຍ ສີ​ຈິ້ນ​ຜິງ

27.09.2019 10:07     

ຄຳເຫັນຂອງທ່ານ ຈ່ຽງຈາຍຕົງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ຈີນ ປະຈຳ ລາວ ເນື່ອງໃນໂອກາດ ວັນຊາດ ຈີນ ຄົບຮອບ 70 ປີ (1/10/1949-1/10/2019)

   ປີ​ນີ້​ແມ່ນ​ປີ​ຄົບຮອບ 70 ປີ​ຂອງ​ການ​ສະຖາປະນາ​ສາທາລະນະ​ລັດ ​ປະຊາຊົນ​ຈີນ ແມ່ນ​ປີ​ຄົບຮອບ 10 ປີ​ຂອງ​ການ​ສ້າງຕັ້ງ​ສາຍ​ພົວພັນ​ຄູ່​ຮ່ວມ​ມື​ຍຸດທະສາດ​ຮອບດ້ານ​ລະຫວ່າງ​ຈີນ​-​ລາວ ແລະ ​ກໍ​ແມ່ນ​ປີ​ສຳຄັນ​ຂອງ​ການ​ສ້າງ​ຄູ່​ຮ່ວມ​ຊາຕາກຳ​ຈີນ​-​ລາວ​ເຊັ່ນ​ດຽວ​ກັນ. ໃນ​ຕະຫຼອດ​ໄລຍະ 70 ປີຜ່ານມາ, ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ຈີນ, ປະຊາຊົນ​ຈີນ​ສາມັກຄີ​ເປັນ​ຈິດ​ໜຶ່ງ​ໃຈ​ດຽວ​ກັນ, ຜ່ານ​ຜ່າ​ຄວາມ​ຫຍຸ້ງຍາກ​ຕ່າງໆ​ນາໆ, ບຸກ​ໜ້າ​ບືນ​ຕົວ ແລະ ພັດທະນາ​ກ້າວໜ້າ​ເລື້ອຍໆ ໂດຍ​ຈາກ​ສະພາບ​ການ​ອັດ​ປະຕູ​ ແລະ ​ຫຼ້າຫຼັງ​ກ້າວ​ໄປ​ສູ່​ການ​ເປີດ​ປະຕູ​ ແລະ​ ກ້າວໜ້າ, ຈາກ​ສະພາບ​ການ​ທີ່​ຂາດ​ອາຫານ​ຂາດ​ເຄື່ອງນຸ່ງ​ຫົ່ມ​ ກ້າວ​ໄປ​ສູ່​ຄວາມ​ອີ່ມ​ໜຳ​ສຳລານ​ຢ່າງຮອບດ້ານ, ​ຈາກ​ສະພາບ​ທີ່​ທຸກ​ຍາກ ​ແລະ​ຫຼ້າຫຼັງ​ກ້າວ​ໄປ​ສູ່​ຄວາມ​ຈະເລີນ​ຮຸ່ງເຮືອງ​ ແລະ ​ມັ່ງ​ຄັ່ງ​ເຂັ້ມແຂງ ໄດ້​ສ້າງ​ຄວາມ​ຍິ່ງ​ໃຫຍ່​ ແລະ ​ເປັນ​ເລື່ອງ​ມະຫັດສະຈັນ​ຄັ້ງ​ແລ້ວ​ຄັ້ງ​ອີກ ​ໃນ​ປະຫວັດສາດ​ການ​ພັດທະນາ​ຂອງ​ມວນ​ມະນຸດຊົນ​ຊາດ​ຈີນ​ ໄດ້​ບັນລຸ​ການ​ພັດທະນາ​ຢ່າງ​ກ້າວ​ກະໂດດ​ທີ່​ຍິ່ງ​ໃຫຍ່ ໂດຍ​ຈາກ​ການ​ໄດ້​ຮັບ​ການ​ປົດ​ປ່ອຍ​-​ຢືນ​ລຸກຂຶ້ນ, ຮັ່ງມີ​ຂຶ້ນ, ຕະຫຼອດ​ຮອດ​ການ​ພັດທະນາ​ເຂັ້ມແຂງ​ຍິ່ງໆ​ຂຶ້ນ ແລະ ປັດຈຸບັນ​ພວມ​ກ້າວ​ເດີນ​ໄປ​ຕາມ​ເສັ້ນທາງແຫ່ງ​ການ​ຟື້ນ​ຟູ​ຄວາມ​ຈະເລີນ​ຮຸ່ງ ເຮືອງ​ທີ່​ຍິ່ງ​ໃຫຍ່​ດ້ວຍ​ບາດ ກ້າວ​ໃຫຍ່. ໃນ​ຮອບ 70 ປີຜ່ານ ມາ, ກຳລັງ​ສັງ​ລວມ​ແຫ່ງ​ຊາດ ​ແລະ​ບົດບາດ​ອິດ​ທິ​ພົນ​ໃນ​ເວທີ​ສາກົນ​ຂອງ​ຈີນ ໄດ້​ເພີ່ມ​ທະວີ​ຂຶ້ນ​ແບບ​ກ້າວ​ກະໂດດ​ທີ່​ມີ​ລັກ ສະນະ​ປະຫວັດສາດ, ໂຄງ​ປະ ກອບ​ອຸດສາຫະກຳ​ໄດ້​ຮັບ​ການ ​ປັບປຸງ​ ແລະ​ ຍົກ​ລະດັບ​ສູງ​ຂຶ້ນ ​ຢ່າງ​ຕໍ່​ເນື່ອງ, ອຸດສາຫະກຳ​ພື້ນຖານ​ ແລະ​ ພື້ນຖານ​ໂຄງ​ລ່າງ​ໄດ້​ມີ​ການ​ພັດທະນາ​ຢ່າງ​ກ້າວ​ກະໂດດ, ການ​ປະສານ​ການ​ພັດທະນາ​ໃນ​ພາກ​ພື້ນ​ໄດ້​ປະກົດ​ມີ​ສະພາບ​ການ​ໃໝ່, ການ​ຮ່ວມ​ມື​ ແລະ​ ການ​ພົວພັນ​ດ້ານ​ເສດຖະກິດ​ການ​ຄ້າ​ສາກົນ ໄດ້​ມີ​ການ​ພັດທະນາ ​ແລະ ​ໄດ້​ຮັບ​ໝາກຜົນ​ເປັນ​ທີ່​ປະຈັກຕາ​ ຕໍ່​ຄົນ​ທັງຫຼາຍ, ພາລະກິດການ ​ສຶກສາ​ວິທະຍາສາດ​ໄດ້​ພັດ ທະນາ​ກ້າວ​ຂຶ້ນ​ເລື້ອຍໆ, ກິດ ຈະການ​ສັງຄົມ​ກໍ​ມີ​ການ​ພັດ ທະນາ​ຈະເລີນ​ຮຸ່ງເຮືອງ​ຂຶ້ນ​ຢ່າງ​ບໍ່​ຢຸດ​ຢັ້ງ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ມີ​ການ​ປ່ຽນແປງ​ແບບ​ຫຼັງ​ມື​ເປັນ​ໜ້າ​ມື.

   ນັບ​ແຕ່​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ​ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ​ເປັນຕົ້ນ​ມາ, ສູນ​ກາງ​ພັກ​ກອມ​ມູ​ນິດ​ຈີນ​  ໂດຍ​ມີ​ສະຫາຍ ​ສີ​ຈິ້ນ​ຜິ​ງ​ ເປັນ​ແກນ​ນຳໄດ້​ວາງ​ເປົ້າ​ໝາຍສູ້ຊົນ  “100 ປີ 2 ເຫດການ” ແລະ ຄວາມ​ໄຝ່ຝັນ​ຂອງ​ຈີນ​ທີ່​ຟື້ນ​ຟູ​ຄວາມ​ຈະເລີນ​ຮຸ່ງເຮືອງ​ທີ່​ຍິ່ງ​ໃຫຍ່​ຂອງ​ຊົນ​ຊາດ​ຈີນ ໂດຍ​ມີ​ການ​ຄຳນຶງ​ເຖິງ​ໄລຍະ​ໃໝ່​ຂອງ​ການ​ພັດທະນາ​ຂອງ​ຈີນ​ໃນ​ຂະບວນ​ການ​ປະຫວັດສາດ ແລະ ເລັງ​ໃສ່​ສະພາບ​ການ​ປ່ຽນແປງ​ທີ່​ຍິ່ງ​ໃຫຍ່​ຂອງ​ໂລກ​ທີ່​ບໍ່​ເຄີຍ​ມີ​ມາ​ໃນ​ຮອບ​ຮ້ອຍ​ປີ ຊຶ່ງໄດ້​ຊຸກຍູ້​ໃຫ້​ສັງຄົມ​ນິຍົມ​ທີ່​ມີ​ສີສັນ​ພິເສດ​ຂອງ​ຈີນ​ກ້າວ​ເຂົ້າ​ສູ່​ຍຸກ​ໃໝ່. ເລຂາທິການ​ໃຫຍ່​ສີ​ຈິ້ນ​ຜິ​ງ ​ໄດ້​ກຳ​ແໜ້ນ​ທ່າ​ອ່ຽງ​ຂອງ​ການ​ພັດທະນາ​ຂອງ​ຈີນ ແລະ ໂລກ ແລະ ສະເໜີ​ໃຫ້​ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ, ລິ​ເລີ່ມ​ການ​ຮ່ວມ​ກັນ​ສ້າງ “ໜຶ່ງ​ແລວ​ໜຶ່ງ​ເສັ້ນທາງ”, ນຳພາ​ການ​ປະຕິ​ຮູບ​ລະບົບ​ການ​ບໍລິຫານ​ທົ່ວ​ໂລກ ຊຶ່ງ​ໄດ້​ສະແດງ​ໃຫ້​ເຫັນ​ເຖິງ​ຄຸນຄ່າ​ທີ່​ມວນ​ມະນຸດ​ສະແຫວງຫາ​ຮ່ວມ​ກັນ, ເປັນ​ການ​ຊີ້​ທິດ​ເຍືອງ​ທາງ​ໃຫ້​ແກ່​ຄວາມ​ກ້າວໜ້າ​ຂອງ​ປະຊາ​ຄົມ​ໂລກ, ມີ​ຄວາມ​ໝາຍ​ສຳ ຄັນ ແລະ ເລິກເຊິ່ງ​ຕໍ່​ການ​ພັດ ທະນາ​ໂດຍ​ສັນຕິ​ຂອງ​ຈີນ ກໍ​ຄື​ຄວາມ​ຈະເລີນຮຸ່ງເຮືອງ ແລະ ກ້າວໜ້າ​ຂອງ​ໂລກ ແລະ ເປັນ​ການ​ນຳພາ​ພວກ​ເຮົາ​ຂຽນ​ໜ້າ​ປະຫວັດສາດ​ໃໝ່​ທີ່​ຍິ່ງ​ໃຫຍ່​ດ້ານ​ການ​ຕ່າງປະເທດ​ແບບ​ປະ ເທດ​ໃຫຍ່​ທີ່​ມີ​ສີສັນ​ພິເສດ​ຂອງ​ຈີນ​ໃນ​ຍຸກ​ໃໝ່.

   ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ​ແມ່ນ​ທັດສະນະ​ໃຈກາງ​ຂອງ​ແນວ​ຄິດ​ການ​ຕ່າງປະເທດ​ຂອງ​ສະຫາຍ ສີ​ຈິ້ນ​ຜິງ ຊຶ່ງ​ໄດ້​ສົ່ງເສີມ​ຈິດໃຈ​ດັ້ງເດີມ​ຂອງ​ຊົນ​ຊາດ​ຈີນ​ທີ່​ວ່າ “ໂລກ​ເປັນ​ຄອບຄົວ​ດຽວ​ກັນ, ທຸກ​ຄົນ​ສະໜິດ​ແໜ້ນ​ຕໍ່​ກັນ​ເໝືອນ​ດັ່ງ​ເປັນ​ຄອບຄົວ​ດຽວ​ກັນ” ທັງ​ສອດຄ່ອງ​ກັບ​ກະແສ​ຍຸກ​ສະໄໝ​ຂອງ​ການ​ພັດທະນາ​ກ້າວໜ້າ​ຂອງ​ສັງຄົມ​ມະ​ນຸດ. ສະຫາຍ​ເລຂາທິການ​ໃຫຍ່ ສີ​ຈິ້ນ​ຜິງ ໄດ້​ເຂົ້າ​ຮ່ວມ​ກອງ​ປະຊຸມ​ສະມັດຊາ​ໃຫຍ່​ອົງການ​ສະຫະ​ປະຊາຊາດ​ເມື່ອ​ປີ 2015 ແລະ ໄດ້​ຢ້ຽມຢາມ​ສຳນັກງານ​ໃຫຍ່​ອົງການ​ສະຫະ​ປະຊາຊາດ​ທີ່​ເຊີ​ແນວ​ເມື່ອ​ປີ 2017, ໃນ​ໄລຍະ​ນັ້ນ, ທ່ານ​ໄດ້​ກ່າວ​ປາ​ໄສ​ສຳຄັນ ໂດຍ​ຊີ້​ໃຫ້​ເຫັນ​ຢ່າງ​ຈະແຈ້ງ​ວ່າ: ມວນ​ມະນຸດ​ລ້ວນ​ແຕ່​ດຳລົງ​ຊີວິດ​ໃນ​ບ້ານ​ໜ່ວຍ​ໂລກ​ໜຶ່ງ​ດຽວ ແລະ ນັບ​ມື້​ນັບ​ກາຍເປັນ​ປະຊາ​ຄົມ​ຮ່ວມ​ຊາຕາກຳ​ແບບ​ໃນ​ເຈົ້າ​ມີ​ຂ້ອຍ, ໃນ​ຂ້ອຍ​ມີ​ເຈົ້າ ໂດຍ​ບໍ່​ມີ​ປະເທດ​ໃດ​ສາມາດ​ຮັບ​ມື​ກັບ​ສິ່ງ​ທ້າ​ທາຍ​ຕ່າງໆ​ທີ່​ມວນ​ມະນຸດ​ພວມ​ປະເຊີນ​ດ້ວຍ​ຕົນ​ເອງ​ແຕ່​ຝ່າຍ​ດຽວ​ໄດ້, ປະເທດ​ຕ່າງໆ​ໃນ​ໂລກ​ຕ້ອງ​ປະສານ​ງານ​ກັນ​ໃນ​ລັກສະນະ​ທົ່ວ​ໂລກ, ຮ່ວມ​ກັນ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະ​ນຸດ. ຢາກ​ຈະ​ບັນລຸ​ເປົ້າ​ໝາຍ​ດັ່ງກ່າວ, ປະເທດ​ຕ່າງໆ​ໃນ​ໂລກ​ຄວນ​ຮ່ວມ​ກັນ​ເດີນ​ໄປ​ຕາມ​ເສັ້ນທາງ​ພັດທະນາ​ໂດຍ​ສັນຕິ, ຮ່ວມ​ກັນ​ຊຸກຍູ້​ການ​ສ້າງ​ການ​ພົວພັນ​ສາກົນ​ແບບ​ໃໝ່​ທີ່​ເຄົາລົບ​​ຊຶ່ງ​ກັນ ​ແລະ​ ກັນ, ຍຸຕິ​ທຳ ແລະ ການ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ ສ້າງ​ໂລກ​ທີ່​ສັນຕິພາບ​ຖາວອນ, ໝັ້ນຄົງ​ໂດຍ​ທົ່ວ​ໄປ, ຈະເລີນ​ຮຸ່ງເຮືອງ​ຮ່ວມ​ກັນ, ເປີດ​ປະ​ຕູ​-​ກວມ​ລວມ ແລະ ສະ​ອາດ ​​ສວຍ​ງາມ. ຂໍ້​ລິ​ເລີ່ມ​ທີ່​ຍິ່ງ​ໃຫຍ່​ດັ່ງກ່າວ ໄດ້​ຊີ້​ທິດ​ເຍືອງ​ທາງ ທັງ​ສະເໜີ​ຊ່ອງທາງ​ໃຫ້​ແກ່​ການ​ບັນລຸ​ການພັດ ທະນາ​ຮ່ວມກັນ, ຈະເລີນ​ຮຸ່ງເຮືອງ​ຢ່າງ​ຕໍ່​ເນື່ອງ ແລະ ສະຫງົບ​ຮຽບຮ້ອຍ​ຍາວ​ ນານ​ຂອງ​ສັງຄົມ​ມະນຸດ ຊຶ່ງ ໄດ້​ຮັບ​ການ​ຕີ​ລາຄາ​ຢ່າງ​ສູງ  ແລະ ​ມີ​ການ​ຕອບ​ຮັບ​ຢ່າງ​ຄຶກ ຄື້ນ​ຈາກ​ປະຊາ​ຄົມ​ໂລກ, ໃນ​ເອກະສານ​ທີ່​ກ່ຽວຂ້ອງ​ຂອງ​ອົງ ການ​ສະຫະ​ປະຊາຊາດ​ກໍ​ໄດ້​ນຳ​ມາ​ໃຊ້​ເປັນ​ຂໍ້​ອ້າງ​ອີງ​ຫຼາຍເທື່ອ  ຊຶ່ງ​ໄດ້​ເຮັດ​ໃຫ້​ມີ​ບົດບາດ​ອັນ​ ເລິກເຊິ່ງ​ ແລະ ​ກວ້າງ​ໄກ​ໃນ​ສາ​ກົນ.

   ຈີນ​ແມ່ນ​ຜູ້​ລິ​ເລີ່ມ​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ ແລະ ກໍ​ແມ່ນ​ຜູ້​ປະຕິບັດ​ຕົວ​ຈິງ​ຢ່າງ​ຕັ້ງໜ້າ. ພວກ​ເຮົາ​ຢຶດໝັ້ນ​ການ​ປະສານ​ສົມທົບ​ກັນ​ລະຫວ່າງ​ການ​ພັດທະນາ​ຂອງ​ຈີນ​ ແລະ​ ການ​ພັດທະນາ​ຮ່ວມ​ກັນ​ຂອງ​ໂລກ, ຢຶດໝັ້ນ​ການ​ປະສານ​ສົມທົບ​ກັນ​ລະຫວ່າງ​ຄວາມ​ໄຝ່ຝັນ​ຂອງ​ຈີນ​ ແລະ​ ຄວາມ​​ໄຝ່ຝັນ​ຂອງ​ໂລກ, ສູ້​ຊົນ​ເພື່ອ​ບັນລຸ​ຄວາມ​ປາຖະໜາ​ຂອງ​ປະຊາຊົນ​ຈີນ​ກໍ​ຄື​ປະຊາຊົນ​ບັນດາ​ປະເທດ​ໃນ​ໂລກ​ທີ່​ມີ​ຕໍ່​ຊີວິດ​ການ​ເປັນ​ຢູ່​ທີ່​ດີ​ງາມ. ການ​ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ​ໄດ້​ກາຍເປັນ​ສັນຍາລັກ​ທີ່​ຊັດ​ເຈນ​ຂອງ​ນະໂຍບາຍ​ການ​ ຕ່າງປະເທດ​ຂອງ​ປະເທດ​ໃຫຍ່​ທີ່​ມີ​ສີສັນ​ພິເສດ​ຂອງ​ຈີນ ແລະ ໄດ້​ຮັບ​ການ​ຮັບ​ຮູ້​ທົ່ວ​ໄປ​ໃນປະ ຊາ​ຄົມ​ໂລກ ຈາກ​ນີ້, ກໍ​ໄດ້ຮັບ ຄວາມ​ເຂົ້າໃຈ​ ແລະ ​ການ​ສະ ໜັບສະ​ໜູນ​ຫຼາຍ​ກວ່າ​ເກົ່າ​ເພື່ອ​ບັນລຸ​ເປົ້າ​ໝາຍ​ສູ້​ຊົນ “100 ປີ 2 ເຫດການ” ແລະ ບັນລຸ​ຄວາມ​ໄຝ່ຝັນ​ຂອງ​ຈີນ​ໃນ​ການ​ຟື້ນ​ຟູ​ຄວາມ​ຈະເລີນ​ຮຸ່ງເຮືອງ​ທີ່​ຍິ່ງ​ໃຫຍ່​ຂອງ​ຊົນ​ຊາດ​ຈີນ.

   ໃນ​ຂະບວນ​ການ​ສ້າງປະ ຊາ​ຄົມ​ຮ່ວມ​ຊາຕາກຳ​ມວນ​ມະນຸດ, ຈີນ​ ແລະ ​ ລາວ​ ໄດ້ກ້າວ ເດີນ​ຢູ່​ແຖວ​ໜ້າ. ຈີນ​ ແລະ ​ລາວ​ເປັນ​ປະເທດ​ສັງຄົມ​ນິຍົມ​ແລະ ​ເປັນ​ເພື່ອນ​ມິດ​ໃກ້​ຄຽງ, ສອງ​ປະເທດ​ມີ​ສາຍພູ​ ແລະ​ແມ່ນ້ຳ​ລຳເຊ​ຕິດ​ຈອດ​ກັນ, ມີ​ມິດຕະພາບ​ອັນ​ເປັນ​ມູນເຊື້ອ​ມາ​ແຕ່​ດົນ​ນານ. ໃນ​ຖານະ​ເປັນ​ບ້ານ​ໃກ້​ເຮືອນ​ຄຽງ​ທີ່​ດີ, ເພື່ອນ​ມິດ​ທີ່​ດີ, ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ ທັງ​ມີ​ອຸດົມ​ການ​ເໝືອນ​ກັນ, ບໍ່​ວ່າ​ໃນ​ສະໄໝ​ສົງຄາມ​ການ​ປະຕິວັດ ຫຼື​ ວ່າ​ໃນ​ໄລຍະ​ສັນຕິພາບ ແລະ​ ສ້າງ ສາ​ປະເທດ, ສອງ​ພັກ​-​ລັດ​ຈີນ​ແລະ​ ລາວ ແລະ ປະຊາຊົນ​ສອງ​ຊາດ​ຕ່າງ​ກໍ​ໄດ້​ໃຫ້ການ​ສະໜັບສະໜູນ​ຊຶ່ງ​ກັນ​ແລະ​ກັນ, ຊ່ວຍເຫຼືອ​​ຊຶ່ງກັນ​ແລະ​ກັນ ແລະ ໄດ້​ສ້າງ​ມິດຕະພາບ​ອັນ​ເລິກເຊິ່ງ ​ຊຶ່ງ​ກາຍເປັນ​ແບບ ຢ່າງ​ໃຫ້​ແກ່​ການ​ຢູ່​ຮ່ວມ​ກັນ​ໂດຍ ສັນຕິ ແລະ ຕ່າງ​ຝ່າຍ​ຕ່າງມີຜົນ​ ປະ​ໂຫຍ​ດ. ນັບ​ແຕ່​ສະຫາຍ ​ເລຂາທິການ​ໃຫຍ່​ ສີ​ຈິ້ນ​ຜິ​ງ​ ສະ ເໜີ​ທັດສະນະ​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນມະນຸດ​ເມື່ອ​ປີ 2013 ເປັນຕົ້ນ​ມາ,  ຝ່າຍ​ລາວ​ກໍ​ມີ​ການ​ຮັບ​ຮູ້​ໃນ​ລະດັບ​ສູງ​ທັງ​ໃຫ້ການ​ຕອບ​ສະໜອງ​ຢ່າງ​ຕັ້ງໜ້າ. ໃນ​ປີ​ດຽວ​ກັນ, ສະ ຫາຍ​ເລຂາທິການ​ໃຫຍ່​ ສີ​ຈິ້ນ​ຜິ​ງ​ໄດ້​ສະເໜີ​ວ່າ ຈີນ ​ແລະ​ ລາວ​ແມ່ນ “ຄູ່​ຮ່ວມ​ຊາຕາກຳທີ່​ມີຜົນ ປະໂຫຍດ​ຮ່ວມກັນ​ຢ່າງ​ກວ້າງ ຂວາງ”. ປີ 2016, ສອງ​ຝ່າຍກໍ​ໄດ້​ ຊີ້​ແຈງ​ວ່າ​ຈີນ​ ແລະ ​ລາວ ແມ່ນ “ຄູ່​ຮ່ວມ​ຊາຕາກຳ​ທີ່​ມີ​ຄວາມ​ໝາຍ​ທາງ​ຍຸດທະສາດ” ເປັນ​ຄັ້ງ​ທຳອິດ​ໃນ​ຖະແຫຼງການ​ຮ່ວມ. ປີ 2019, ຜູ້ນຳ​ສູງ​ສຸດຂອງ​ ສອງ​ພັກ​-​ລັດ​ ໄດ້​ລົງ​ນາມ​ໃນ “ແຜນ​ປະຕິບັດ​ງານ​ກ່ຽວ​ກັບ ການສ້າງ​ຄູ່​ຮ່ວມ​ຊາຕາກຳຈີນ- ລາວ” ຊຶ່ງບໍ່​ພຽງ​ແຕ່​ໄດ້​ໃຫ້ການ ​ຊີ້​ນຳ ​ແລະ ​ສ້າງ​ສິ່ງ​ອ້າງ​ອີງໃຫ້​ ແກ່​ການ​ພັດທະນາ​ສາຍ​ພົວພັນ ​ລະຫວ່າງ​ຈີນ​-​ລາວ​ໃນ​ໄລ ຍະ​ຍາວ​ນານ ແລະ ເປັນ​ການ​ເປີດ ​ຍຸກ​ໃໝ່​ແຫ່ງ​ສາຍພົວພັນ​ລະ ຫວ່າງ​ສອງ​ປະເທດ​ເທົ່າ​ນັ້ນ, ແຕ່​ຍັງ​ມີ​ຄວາມ​ໝາຍ​ສຳຄັນ​ທີ່​ເປັນ​ແບບຢ່າງ​ຕໍ່​ການ​ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ​ໃນ​ພາກ​ພື້ນ​ ແລະ​ໃນ​ສາກົນ​ອີກ​ດ້ວຍ.

   ຈີນ ແລະ ລາວ​ສ້າງ​ຄູ່​ຮ່ວມ ​ຊາຕາກຳແມ່ນ​ການ​ເລືອກຍຸດ ທະສາດ​ທີ່​ສຳຄັນຂອງສອງ ​ຝ່າຍ​ໃນ​ການ​ກຳ​ແໜ້ນ​ສະຖາ ນະ​ການ​ໃນ​ສາກົນ​ກໍ​ຄື​ໃນພາກ ​ພື້ນ​ຢ່າງ​ເລິກເຊິ່ງ ແລະ ​ສຸມ ໃສ່​ການ​ພັດທະນາ​ສາຍ​ພົວ ພັນ​ລະຫວ່າງ​ສອງ​ປະເທດໃນ​ ໄລຍະ​ຍາວ​ນານ. ຄູ່​ຮ່ວມ​ຊາຕາ ກຳ​ຈີນ​-​ລາວ​ບໍ່​ພຽງ​ແຕ່ໄດ້​ ກວມ​ເອົາ​ເນື້ອ​ໃນ​ທົ່ວ​ໄປ​ຂອງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ​ເທົ່າ​ນັ້ນ ແຕ່​ຍິ່ງ​ໄດ້​ໝາຍ​ເຖິງ​ສອງ​ຝ່າຍ​ມີ​ການ​ສະແຫວງຫາ​ຄຸນຄ່າ​ຮ່ວມ​ກັນ, ມີ​ສາຍສຳພັນ​ທາງ​ການເມືອງ​ທີ່​ພົ້ນ​ເດັ່ນ ແລະ ເປັນ​ມິດ​ທີ່​ຮັກແພງ​ກັນ​ເປັນ​ພິເສດ. ປັດຈຸບັນ, ບົນພື້ນ ຖານ​ການ​ພົວພັນ​ສາກົນ​ແບບ​ໃໝ່, ສອງ​ຝ່າຍ​ໄດ້​ສຸມ​ໃສ່​ຄົ້ນຄວ້າ​ການ​ສ້າງ​ສາຍ​ພົວພັນ​ລະຫວ່າງ​ປະເທດ​ສັງຄົມ​ນິຍົມ​ແບບໃໝ່,  ຮ່ວມ​ມື​ກັນ​ພັດທະນາ​ພາລະກິດ​ສັງຄົມ​ນິຍົມ​ທີ່​ມີ​ສີສັນ​ພິເສດ​ຂອງ​ແຕ່​ລະ​ຝ່າຍ, ຊຸກຍູ້​ການ​ສ້າງ​ຄູ່​ຮ່ວມ​ຊາຕາກຳ​ຈາກ​ທັດ ສະນະ​ຄະຕິ​ຫັນ​ເປັນ​ການ​ປະ ຕິບັດ​ຕົວ​ຈິງ, ຈາກ​ວິໄສ​ທັດ​ຫັນ​ເປັນ​ຕົວ​ຈິງ ແລະ ເຮັດ​ໃຫ້​ຄູ່​ຮ່ວມ​ຊາຕາກຳ​ຈີນ​-​ລາວ​ປະກົດ​ຜົນ​ເປັນ​ຈິງ ແລະ ແຕກ​ດອກ​ອອກ​ຜົນ ຊຶ່ງ​ໄດ້​ສະແດງ​ອອກ​ດັ່ງນີ້:

   ໜຶ່ງ: ຢຶດ​ໝັ້ນ​ເຄົາລົບຊຶ່ງ​ກັນ​ ແລະ​ ກັນ, ໄວ້​ເນື້ອ​ເຊື່ອ​ໃຈ​ ຊຶ່ງ​ກັນ ​ແລະ ​ກັນ ເພື່ອ​ປັບປຸງ​ພື້ນຖານ​ການເມືອງ​ຂອງ​ຄູ່​ຮ່ວມ​ຊາຕາ​ກຳ. ຜູ້ນຳ​ສູງ​ສຸດ​ຂອງ​ສອງ​ພັກ, ສອງ​ລັດ ໄດ້​ຮັກສາ​ການ​ພົບ​ປະກັນ​ໃນ​ແຕ່​ລະ​ປີ ເພື່ອ​ເພີ່ມ​ທະວີ​ການ​ແລກປ່ຽນ​ຍຸດທະສາດ​ກ່ຽວ​ກັບ​ບັນຫາ​ສຳຄັນ​ໃນ​ສາຍ​ພົວພັນ​ລະຫວ່າງ​ສອງ​ປະເທດ ກໍ​ຄື​ສະຖານະ​ການ​ໃນ​ສາກົນ​ ແລະ ​ພາກ​ພື້ນ​ຢ່າງ​ທັນ​ການ. ດຳເນີນ​ການ​ແລກ ປ່ຽນ ​ ແລະ ​ ສົນທະນາ​ແບບ​ຫຼາຍ​ທິດ, ຫຼາຍ​ລະດັບ, ມີ​ກົນ​ໄກ, ຖອດ​ຖອນ​ ແລະ ​ຮຽນ​ຮູ້​ຊຶ່ງ​ກັນ​ແລະ ​ກັນ, ຊຸກຍູ້​ໃຫ້ການ​ຮ່ວມ​ມື​ດ້ານ​ການ​ອົບຮົມ​ພະນັກງານ​ໃຫ້​ພັດທະນາ​ເຂົ້າ​ສູ່​ລວງ​ເລິກ. ເພີ່ມ​ທະວີ​ການ​ປະສານ​ສົມທົບ​ກັນ​ໃນ​ວຽກ​ງານ​ສາກົນ​ ແລະ​ພາກ​ພື້ນ,  ສະໜັບສະໜູນ​ຊຶ່ງ​ກັນ​ ແລະ​ ກັນ​ໃນ​ບັນຫາ​ທີ່​ກ່ຽວ​ພັນ​ເຖິງຜົນປະໂຫຍດຕົ້ນຕໍຂອງແຕ່​ ລະ​ຝ່າຍ. ສອງ: ຢຶດ​ໝັ້ນການ​ ຮ່ວມ​ມື​ແບບ​ຕ່າງ​ຝ່າຍ​ຕ່າງ​ມີ ຜົນ​ປະໂຫຍດ, ສ້າງ​ຄູ່​ຮ່ວມ​ຊາຕາກຳ​ເພື່ອ​ສະແຫວງຫາ​ຜົນປະໂຫຍດ​ຮ່ວມ. ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນທາງ” ຂອງ​ຈີນ ແລະ  ຍຸດທະສາດ “ຫັນ​ປະເທດ​ທີ່​ບໍ່​ມີ​ຊາຍ​ແດນ​ຕິດ​ທະເລ​ເປັນ​ປະເທດ​ທີ່​ເຊື່ອມ​ຕໍ່​ອະນຸ​ພາກ​ພື້ນ” ຂອງ​ລາວ​ພວມ​ເລັ່ງ​ລັດ​ເຊື່ອມ​ຈອດ​ກັນ, ການ​ກໍ່ສ້າງ​ທາງ​ລົດໄຟ​ຈີນ​-​ລາວ ຊຶ່ງ​ເປັນ​ໂຄງການ​ໃຫຍ່​ ແລະ ​ສຳຄັນ​ໃນ​ຂອບ “ໜຶ່ງ​ແລວ​ໜຶ່ງ​ເສັ້ນທາງ” ໄດ້​ມີ​ຄວາມ​ຄືບ​ໜ້າ​ເປັນ​ຢ່າງ​ດີປັດຈຸບັນ, ການກໍ່ສ້າງໂຄງການ​ດັ່ງກ່າວ​ໄດ້​ສຳເລັດ​ແລ້ວ 73,9%, ອາດ​ຈະ​ສ້າງ​ສຳເລັດ​ ແລະ ​ເປີດ​ໃຫ້​ບໍລິການ​ໃນ​ທ້າຍ​ປີ 2021 ຊຶ່ງ​ຈະ​ເປັນ​ທາງ​ລົດໄຟ​ຄວາມ​ໄວ​ສູງ​ເສັ້ນ​ທຳອິດ​ຢູ່​ອາຊີ​ຕາເວັນ​ອອກສ່ຽງ​ໃຕ້. ສອງ​ຝ່າຍ​ໄດ້​ຊຸກຍູ້​ການຈັດຕັ້ງ​ປະຕິບັດຂອບ ​ການ​ຮ່ວມ​ມື​ແລວ​ທາງເສດຖະ ກິດ​ຈີນ​-​ລາວ​ ຢ່າງ​ໝັ້ນ​ທ່ຽງ, ຈີນ​ໄດ້​ກາຍເປັນ​ຄູ່​ຄ້າ​ໃຫຍ່​ອັນ​ດັບ 2 ແລະ ເປັນ​ແຫຼ່ງ​ທຶນ​ທີ່​ໃຫຍ່​ທີ່​ສຸດ​ຂອງ​ລາວ. ສາມ: ຢຶດ​ໝັ້ນ​ການ​ຊ່ວຍເຫຼືອ​ຊຶ່ງ​ກັນ ແລະ ​ກັນ, ສ້າງ​ແນວ​ປ້ອງ​ກັນ​ຄວາມ​ໝັ້ນຄົງ​ໃນ​ຂອບ​ຄູ່​ຮ່ວມ​ຊາຕາ​ກຳ. ສອງ​ກອງທັບ​ໄດ້​ຮັກສາ​ການ​ໄປມາຫາສູ່​ກັນ​ໃນ​ລະດັບ​ຕ່າງໆ ເພີ່ມ​ທະວີ​ການ​ຮ່ວມ​ມື​ທີ່ແທ້​ຈິງ​ໃນ​ດ້ານ​ຕ່າງໆ ເຊັ່ນ: ການ​ອົບຮົມ​ບຸກ​ຄະລາ​ກອນ, ການ​ຝຶກ​ຊ້ອມ​ດ້ານ​ການ​ທະຫານ, ວຽກ​ງານ​ການເມືອງ, ການ​ປິ່ນປົວ, ພະລາທິການ ແລະ ​ອື່ນໆ; ທີ​ມ​ແພດ “ຂະ ບວນ​ລົດໄຟ​ສັນຕິພາບ” ຂອງ​ກອງທັບ​ຈີນ​ແມ່ນ​ໜ່ວຍ​ກູ້​ໄພ​ສາກົນ​ໜ່ວຍ​ທຳອິດ​ທີ່​ເດີນທາງ​ໂດຍ​ດ່ວນ​ໄປ​ຊ່ວຍເຫຼືອ​ເຂດ​ປະສົບ​ໄພ​ຄູ​ກັ້ນ​ນ້ຳ​ຂອງ​ເຂື່ອນ​ແຕກ​ຢູ່​ພາກ​ໃຕ້​ລາວ​ເມື່ອ​ປີ 2018, ວັນ​ທີ 19 ສິງຫາ​ປີ​ນີ້, ຢູ່​ລາວ​ໄດ້​ເກີດ​ອຸບັດເຫດ​ທາງ​ຖະໜົນ​ຢ່າງ​ໜັກໜ່ວງ, ທີ​ມ​ແພດ “ຂະບວນ​ລົດໄຟ​ສັນຕິພາບ” ທີ່​ພວມ​ດຳ ເນີນ​ການ​ຝຶກ​ຊ້ອມ​ຮ່ວມ​ກັບ ​ຝ່າຍ​ລາວ ກໍ​ເຂົ້າ​ຮ່ວມ​ການ​ຊ່ວຍເຫຼືອ​ກູ້​ໄພ​ທັນທີ ຊຶ່ງໄດ້​ຮັບ​ການ​ຍ້ອງຍໍ​ຈາກ​ວົງ​ການ​ຕ່າງໆ​ຂອງ​ລາວ​ຢ່າງ​ສູງ; ສອງ​ຝ່າຍ​ເພີ່ມ​ທະວີ​ການ​ຮ່ວມ​ມື​ດ້ານ​ການ​ປະຕິບັດ​ກົດໝາຍ​ແລະ​ ຄວາມ​ໝັ້ນຄົງ, ຮ່ວມ​ມື​ກັນ​ປາບ​ປາມ​ລັດທິ​ກໍ່​ການ​ຮ້າຍ, ປົກ​ປັກ​ຮັກສາ​ຄວາມ​ປອດ​ໄພ​ດ້ານ​ຊີວິດ​ ແລະ​ ຊັບ​ສິນ​ຂອງ​ພົນລະເມືອງ​ແຕ່​ລະ​ປະເທດ​ທີ່​ເຮັດ​ວຽກ​ ແລະ ​ດຳລົງ​ຊີວິດ​ຢູ່​ໃນ​ປະເທດ​ຕົນ. ສີ່: ຢຶດ​ໝັ້ນ​ໃນ​ຄວາມ​ເຂົ້າໃຈ​ກັນ​ ແລະ ຄວາມ​ສະໜິດສະໜົມ​ຕໍ່​ກັນ ເຮັດ​ໃຫ້​ຄູ່​ຮ່ວມ​ຊາຕາກຳ​ຈີນ​-​ລາວ​ເຂົ້າ​ເຖິງ​ຈິດໃຈ​ຂອງ​ປະຊາຊົນ​ສອງ​ຊາດ. ການ​ເຊື່ອມ​ສາຍ​ພົວພັນ​ທາງ​ຈິດໃຈ​ຂອງ​ປະຊາຊົນ​ສອງ​ຊາດ​ໄດ້​ຂຶ້ນ​ສູ່​ລະດັບ​ໃໝ່ ມາ​ຮອດ​ປີ​ນີ້, ນັກ​ສຶກສາ​ລາວ ທີ່​ໄດ້​ຮັບ​ທຶນ​ການ​ສຶກສາ​ລະດັບ​ລັດຖະບານ​ຈີນ​ນັບ​ລວມ​ແລ້ວ​ໄດ້​ມີ 4.000 ກວ່າ​ຄົນ ຊຶ່ງ​ຫຼາຍ​ກວ່າ ບັນດາ​ປະເທດ​ອາ​ຊຽນ; ມາ​ຮອດ​ທ້າຍ​ປີ 2018, ນັກ​ຮຽນ -​ນັກ​ສຶກສາ​ລາວ​ທີ່​ຮຽນ​ຕໍ່​ຢູ່​ຈີນ​ໄດ້​ມີ​ເຖິງ 14.645 ຄົນ, ເປັນ​ອັນ​ດັບ​ສອງ​ໃນ​ບັນດາ​ປະເທດ​ອາ​ຊຽນ ແລະ ເປັນ​ອັນ​ດັບ​ທີ 8 ໃນ 196 ປະເທດ ​ແລະ ​ເຂດ​ແຄວ້ນ​ໃນ​ໂລກ. ປັດຈຸບັນ, ການ​ຮຽນ​ພາສາ​ຈີນ​ຢູ່​ລາວ​ໄດ້​ຮັບ​ຄວາມ​ນິຍົມ​ຊົມ​ຊອບ​ ແລະ ​ມີ​ການ​ພັດທະນາ​ຢ່າງ​ຄຶກຄື້ນ, ຂະນະ​ທີ່​ສູນວັດທະນະທຳ​ຈີນ​ຢູ່​ລາວ, ສະ​ຖາ​ບັນ​ຂົງ​ຈື້ ມະຫາ ວິທະຍາໄລ​ແຫ່ງ​ຊາດ​ລາວ​ໄດ້​ກາຍເປັນ​ເວທີ​ໃໝ່​ຂອງ​ການ​ແລກປ່ຽນ​ວັດທະນະທຳ​ ແລະ​ການ​ສຶກສາ​ຂອງ​ສອງ​ປະ​ເທດ. ປີ 2019 ແມ່ນ​ປີ​ທ່ອງ​ທ່ຽວຈີນ- ​ລາວ, ນັກ​ທ່ອງ​ທ່ຽວ​ຈີນ​ທີ່​ ໄປ​ທ່ຽວ​ຢູ່​ລາວ​ອາດ​ຈະ​ເພີ່ມ​ຂຶ້ນຮອດ​ລະດັບ​ສູງ​ຄັ້ງ​ໃໝ່. ຫ້າ: ຢຶດໝັ້ນ​ການ​ດຳລົງ​ຄົງ​ຕົວ​ແບບ​ອະນຸເຄາະ​ຕໍ່​ກັນ​ ແລະ ​ບໍລິຫານ​ຮ່ວມກັນ, ຊຸກຍູ້​ໃຫ້​ຄູ່​ຮ່ວມ​ຊາຕາກຳ​ພັດ ທະນາ​ຢ່າງ​ຍືນ​ຍົງ. ຈີນ​ ແລະ​ ລາວ​ດຳເນີນ​ການ​ຮ່ວມ​ມື​ໃນ ດ້ານ​ຕ່າງໆເຊັ່ນ: ການປ່ຽນ ແປງ​ຂອງ​ດິນ​ຟ້າ​ອາກາດ, ການ​ຕິດຕາມ​ສິ່ງແວດລ້ອມ, ການ​ແກ້​ໄຂ​ບັນຫາ​ມົນ​ລະ​ພິດ, ການ​ອະນຸລັກ​ຊັບພະຍາກອນ, ການ​ບຳບັດ​ຂີ້​ເຫຍື້ອ, ການ​ສ້າງ​ຄວາມ ​ສາມາດ​ດ້ານ​ການ​ຄຸ້ມຄອງ​ສິ່ງ ແວດລ້ອມ ແລະ​  ອື່ນໆ, ເພີ່ມທະ ວີ​ການ​ສຳ​ມະ​ນາ​ ແລະ​ ການ ​ແລກປ່ຽນ​ດ້ານ​ທັດສະນະ​ການ​ອະນຸລັກ​ສິ່ງແວດລ້ອມ​ນິເວດ​ພ້ອມ​ດ້ວຍ​ມາດຕະຖານ​ກົດລະ ບຽບ​ທີ່​ກ່ຽວຂ້ອງ, ປັບປຸງ​ບູລະ ນະ​ກົນ​ໄກ​ການ​ສົນທະນາ​ການ​ຮ່ວມ​ມື​ດ້ານ​ການ​ປ້ອງກັນ ​ໄພ ພິບັດ, ການ​ບັນເທົາທຸກ ແລະ ການ​ກູ້​ໄພ​ໃນ​ຫຼາຍ​ລະດັບ;ຈີນ ​ຊ່ວຍເຫຼືອ​ລາວ​ບັນລຸ​ການພັດ ທະນາຢ່າງສົມດຸນ​ກັນ​ລະ ຫວ່າງ​ເສດຖະກິດ​ສັງຄົມ​ກັບ ​ສິ່ງແວດລ້ອມ​ນິເວດ, ເສີມ​ສ້າງ​ຄວາມ​ສາມາດ​ຂອງ​ລາວ​ໃນ​ການຈັດຕັ້ງ​ປະຕິບັດ​ວາລະການ ​ພັດທະນາ​ແບບ​ຍືນ​ຍົງ 2030 ຂອງ​ອົງການ​ສະຫະ​ປະຊາ​ຊາດ.

   “ເດີນ​ດ່ຽວ​ຍ່ອມ​ໄປ​ໄດ້ໄວ​ ແຕ່​ບໍ່​ໄກ, ເດີນ​ຮ່ວມ​ກຸ່ມໄປ​ ຊ້າ​ແດ່​ແຕ່​ຍາວ​ໄກ”. ການພັດ ທະນາ​ຂອງ​ຈີນ​ແມ່ນ​ປາສະຈາກ​ ໂລກ​ບໍ່​ໄດ້, ການ​ພັດທະນາ​ຂອງ​ໂລກ​ກໍ​ຕ້ອງການ​ຈີນ​ເຊັ່ນ​ດຽວ​ກັນ ໂດຍປະເຊີນ​ກັບ​ການ​ປ່ຽນແປງ​ຢ່າງ​ໃຫຍ່​ຂອງ​ໂລກ​ທີ່​ບໍ່​ເຄີຍ​ມີ​ມາ​ໃນ​ຮອບ​ຮ້ອຍ​ປີ, ປະເທດ​ຕ່າງໆ​ຕ້ອງການສ້າງ ​ຄວາມ​ຮັບ​ຮູ້​ທີ່​ເປັນ​ເອກະ​ພາບ​ກັນ, ເກາະ​ແຂນ​ກັນ​ກ້າວ​ໄປ​ໜ້າ, ຮ່ວມ​ມື​ກັນ​ເພື່ອ​ຜ່ານ​ຜ່າ​ຄວາມ​ຫຍຸ້ງ​ຍາກ. ຈີນ​ ແລະ​ລາວ ​ສ້າງ​ຄູ່​ຮ່ວມ​ຊາຕາກຳ,ຈະ ​ສະໜັບສະໜູນ​ການ​ເພີ່ມ​ທະ ວີ​ການ​ນຳພາ​ຂອງ​ພັກ​ ແລະ​ ລະບອບ​ສັງຄົມ​ນິຍົມ​ຂອງ​ແຕ່​ ລະຝ່າຍ​ຢ່າງ​ເດັດ​ດ່ຽວ. ຢຶດ ໝັ້ນ​ເຄົາລົບ​ຊຶ່ງ​ກັນ ແລະ ກັນ ແລະ ປະເທດ​ຕ່າງໆ​​ຊຶ່ງບໍ່​ວ່າ​ປະເທດ​ນ້ອຍ​ ຫຼື​ ໃຫຍ່​ລ້ວນ​ແຕ່​ມີ​ຄວາມ​ສະເໝີ​ພາບ. ຢຶດ​ໝັ້ນ 5 ​ຫຼັກການ​ຂອງ​ການ​ຢູ່​ຮ່ວມ​ກັນ​ໂດຍ​ສັນ​ຕິ. ຢຶດ​ໝັ້ນ​ບໍ່​ເປັນ​ກຸ່ມ, ບໍ່​ເປັນ​ປໍ​ລະ​ປັກ​ກັນ ແລະ ບໍ່​ຖື​ເອົາ​ຝ່າຍ​ທີ​ສາມ​ເປັນ​ເປົ້າ​ໝາຍ, ບໍ່​ຂີດ​ແບ່ງ​ຕາມຮູບຖານ​ຈິດ​ສຳ​ນຶກ. ຢຶດ​ໝັ້ນ​ປະສານ​ງານ​ກັນ​ຢ່າງ​ໃກ້ຊິດ​ ແລະ ​ສະ ໜັບສະໜູນຊຶ່ງ​ກັນ​ ແລະ ​ກັນ​ໃນ​ວຽກ​ງານ​ສາກົນ ​ແລະ​ ພາກ​ພື້ນ, ປົກ​ປັກ​ຮັກສາ​ສິດ​ ແລະ​ ຜົນປະໂຫຍດ​ທີ່​ເປັນ​ທຳ​ຂອງ​ປະເທດ​ໃຜ​ລາວ. ຢຶດ​ໝັ້ນ​ການ​ປຶກສາ​ຫາລື​ຮ່ວມ​ກັນ, ກໍ່ສ້າງ​ຮ່ວມ​ກັນ ແລະ ຊົມໃຊ້​ຮ່ວມ ກັນ, ຊຸກຍູ້​ການ​ພັດທະນາ​ເສດຖະກິດ​ໂລກ​ແບບ​ເປີດ ກວ້າງ, ປົກ​ປັກ​ຮັກສາ​ການ​ພັດ ທະນາ​ ແລະ​ ຄວາມ​ຈະເລີນ​ຮຸ່ງ ເຮືອງ​ຂອງ​ພາກ​ພື້ນ ກໍ​ຄື​ຂອງ​ໂລກ ໂດຍ​ຢູ່​ຈຸດ​ເລີ່ມ​ຕົ້ນ​ໃໝ່​ທາງ​ປະຫວັດສາດ​ແຫ່ງ​ການ​ສະຖາປະນາ​ສາທາລະນະ​ລັດ​ປະຊາຊົນ​ຈີນ​ຄົບຮອບ 70 ປີ, ພວກ​ເຮົາ​ເຕັມ​ໄປ​ດ້ວຍ​ຄວາມ​ໝັ້ນ​ໃຈ​ ແລະ ​ມີ​ຄວາມ​ປາຖະ ໜາ​ຢ່າງ​ເຕັມ​ປ່ຽມ​ຕໍ່​ອະນາຄົດ​ຂອງ​ສາຍ​ພົວພັນ​ລະຫວ່າງ​ຈີນ-​ ລາວ ແລະ ພາຍ​ໃຕ້​ການ​ຊີ້​ນຳ​ຈາກ​ແນວ​ຄິດ​ການ​ຕ່າງປະເທດ​ຂອງ​ສະຫາຍ ສີ​ຈິ້ນ​ຜິງ, ພວກ​ເຮົາ​ຈະ​ສືບຕໍ່​ຈັດ​ເອົາ​ວຽກ​ງານ​ກັບ​ລາວ​ໄວ້​ຢູ່​ບ່ອນ​ທີ່​ພົ້ນ​ເດັ່ນ​ໃນ​ວຽກ​ງານ​ການ​ຕ່າງປະເທດ​ກັບ​ປະເທດ​ອ້ອມ​ຂ້າງ, ສ້າງສາ, ພັດທະນາ ແລະ ປັບປຸງ​ຄູ່​ຮ່ວມ​ຊາຕາກຳ​ຈີນ​-​ລາວ​ໃຫ້​ດີ.