ສປປ ລາວ ຍ່ືນ​ສານ​ເຂົ້າ​ເປັນ​ພາ­ຄີ ແລະ ໃຫ້​ສັດ­ຕະ­ຍາ­ບັນ ຕໍ່​ສົນ­ທິ­ສັນ­ຍາ​ສຳ­ຄັນ​ຂອງ​ອົງ­ການ ສປຊ

30.09.2019 9:22     

   ໃນ​ໂອກາດ​ເຂົ້າ​ຮ່ວມ​ກອງ ​ປະຊຸມ​ສະມັດຊາໃຫຍ່ຂອງອົງ ການ​ສະຫະ​ປະຊາຊາດ ສະໄໝ​ທີ 74 ທີ່ນິວ​ຢອກ ສະຫະລັດ​ອາ​ເມ​ຣິ​ກາ, ທ່ານ ສະເຫຼີມໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດໄດ້ຕາງໜ້າ​ໃຫ້​ລັດຖະບານ ແຫ່ງ ສປປ ລາວ ຍື່ນ​ສານ​ເຂົ້າ​ຮ່ວມ​ເປັນ​ພາຄີ​ສົນທິສັນຍາ​ສະຫະ​ປະຊາຊາດ ວ່າ​ດ້ວຍ​ສັນຍາ​ຊື້​-​ຂາຍ​ສິນຄ້າ​ລະຫວ່າງ​ປະເທດ ​ແລະ ຍື່ນ​ສານ​ໃຫ້​ສັດ ຕະຍາບັນ​ຕໍ່​ສົນທິສັນຍາ​ວ່າ​ດ້ວຍ​ການ​ເກືອດ​ຫ້າມ​ອາວຸດ​ນິວ​ເຄ​ລຍ​ໃຫ້​ແກ່​ທ່ານ Miguel de Serpa Soares ຮອງ​ເລ ຂາທິການ​ໃຫຍ່ ສປຊ ​ຜູ້​ຮັບຜິດ ຊອບ​ວຽກ​ງານ​ກົດໝາຍ ທັງ​ເປັນ​ທີ່​ປຶກສາ​ທາງ​ດ້ານ​ກົດໝາຍ​ຂອງອົງການ ສປຊ ໃນ​ວັນ​ທີ 24 ແລະ 26 ກັນຍາ 2019 ຕາມ​ລຳ​ດັບ.

   ສົນທິສັນຍາ​ສະຫະ​ປະ ຊາຊາດ ວ່າ​ດ້ວຍ​ສັນຍາ​ຊື້​-​ຂາຍ​ສິນຄ້າ​ລະຫວ່າງ​ປະເທດໄດ້ຖືກ​ ຮັບຮອງ​ເອົາ​ໃນ​ປີ 1980 ທີ່​ນະ ຄອນຫຼວງ​ວຽນ ປະເທດ​ໂອ​ຕຣິດ ແລະ ມີ​ຜົນ​ສັກສິດ​ໃນ​ປີ 1988 ໂດຍ​ມີ​ຈຸດປະສົງ ເພື່ອ​ກໍາ​ນົດ​ລະບຽບ​ການ​ຊື້​-​ຂາຍ​ສິນຄ້າ ລະຫວ່າງ​ປະເທດ ລວມ​ທັງ​ພັນ ທະ​ຂອງ​ຜູ້​ຊື້​-​ຜູ້​ຂາຍ. ປັດຈຸບັນ, ມີ​ ປະເທດ​ເຂົ້າ​ເປັນ​ພາຄີ​ທັງໝົດ 89 ປະ​ເທດ. ການ​ເຂົ້າ​ຮ່ວມ ສົນທິສັນຍາ​ດັ່ງກ່າວແມ່ນ​ມີ​ຄວາມ​ສໍາ​ຄັນ ເນື່ອງ​ຈາກ​ເປັນ​ໂອກາດ​ດີ​ໃຫ້​ບັນດາ​ປະເທດ​ພາຄີ​ສາມາດ​ນຳ​ໃຊ້​ບົດບັນຍັດ ​ພາຍ​ໃຕ້​ສົນທິສັນຍາ​ດັ່ງກ່າວ ເປັນ​ພື້ນຖານ ແລະ ເປັນ​ບ່ອນ ​ອີງ​ໃນ​ການ​ເຮັດ​ສັນຍາ​ຊື້​-​ຂາຍ ລະຫວ່າງ​ປະເທດ ຊຶ່ງ​ຈະ​ຫຼຸດ ຜ່ອນ​ຄວາມ​ຫຍຸ້ງຍາກ ແລະ ຄວາມ​ສ່ຽງ ໃນ​ການເລືອກໃຊ້ ກົດໝາຍ ຫຼື ສັນຍາທີ່​ບໍ່​ເປັນມາດ ຕະຖານ​ດຽວ​ກັນ ລະຫວ່າງ​ຜູ້​ຊື້​-​ຜູ້​ຂາຍ. ນອກຈາກ​ນັ້ນ, ກໍ​ຈະ​ເຮັດ​ໃຫ້ ສປປ ລາວ ປັບປຸງ​ລະບົບ​ກົດໝາຍຂອງ​ຕົນໃຫ້​ເປັນ​ສາກົນ​ຫຼາຍ​ຂຶ້ນ ດ້ວຍ​ການ​ນຳ​ໃຊ້​ມາດຕະຖານ​ດຽວ​ກັນ​ຂອງ​ຄູ່​ສັນຍາ ໂດຍ​ສະເພາະໃນ​ ປັດຈຸບັນ​ທີ່ ສປປ ລາວ ຍັງ​ບໍ່​ທັນ​ມີ​ກົດໝາຍ​ສະເພາະ​ກ່ຽວ​ກັບ​ການ​ຊື້​-​ຂາຍ ລະຫວ່າງ​ປະ ເທດ ເປັນຕົ້ນ​ແມ່ນ​ດ້ານ​ສິດ ແລະ ພັນທະ​ຂອງ​ຄູ່​ຄ້າ​ທີ່ຢູ່​ຄົນ​ລະ​ປະເທດ ລວມ​ທັງ​ກົນ​ໄກ​ໃນ​ການ​ແກ້​ໄຂ​ຂໍ້​ຂັດ​ແຍ່ງກ່ຽວ​ກັບ ການ​ຊື້​-​ຂາຍ ລະຫວ່າງ​ປະ​ເທດ.

   ສົນທິສັນຍາ ວ່າ​ດ້ວຍ​ການ​ເກືອດ​ຫ້າມ​ອາວຸດ​ນິວ​ເຄ​ລຍໄດ້​ຖືກ​ຮັບຮອງ​ເອົາ​ ໃນ​ກອງ​ປະຊຸມ​ສະມັດຊາ​ໃຫຍ່ ສປຊ ສະໄໝ​ທີ 72 ໃນ​ປີ 2017 ພາຍ​ຫຼັງ​ສໍາ​ເລັດ​ຂະບວນ​ການ​ເຈລະຈາ​ ນັບ​ແຕ່​ປີ 2010 ເປັນຕົ້ນ​ມາ. ສົນທິສັນຍາ​ດັ່ງກ່າວ​ໄດ້​ເປີດ​ໃຫ້​ປະເທດສະ ມາຊິກ ສປຊ ລົງ​ນາມ​ເປັນ​ພາ ຄີ​ໃນ​ວັນ​ທີ 20 ກັນຍາ 2017 ທີ່ ສໍາ​ນັກ​ງານ​ໃຫຍ່​ຂອງ​ອົງການ ສປຊ. ປັດຈຸບັນ​ມີ 79 ປະເທດ ໄດ້​ລົງ​ນາມ ແລະ ໃນ​ນັ້ນ​ມີ 32 ປະເທດ​ໃຫ້​ສັດຕະ​ຍາ​ບັນ. ພາຍ ຫຼັງ 50 ປະເທດ​ໄດ້​ໃຫ້ສັດຕະ ຍາບັນ, ສົນທິສັນຍາ​ດັ່ງກ່າວ ຈະ​ມີ​ຜົນ​ບັງຄັບ​ໃຊ້​ພາຍ​ໃນ 90 ວັນ. ຈຸດປະສົງ​ຫຼັກ​ຂອງ​ສົນທິ ສັນຍາ​ນີ້ແມ່ນ​ເພື່ອ​ເກືອດຫ້າມ​ ອາວຸດ​ນິວ​ເຄ​​ລຍຄື: ຫ້າມ​ບໍ່​ໃຫ້​ ມີ​ການ​ພັດທະນາ, ທົດລອງ, ຜະລິດ, ຄອບຄອງ, ສະ​ສົມ, ສົ່ງຕໍ່, ຮັບ​ເອົາ ຫຼື ນຳ​ໃຊ້​ຢູ່​ໃນ​ດິນແດນ​ຂອງ​ຕົນ. ການ​ໃຫ້ສັດ ຕະຍາບັນ​ສົນທິສັນຍາດັ່ງກ່າວ ຂອງ ສປປ ລາວ ແມ່ນ​ສະແດງ​ ໃຫ້​ເຫັນ​ເຖິງ​ຄວາມ​ໝາຍ​ໝັ້ນ​ ທາງ​ດ້ານ​ການເມືອງ​ອັນສະເໝີ​ ຕົ້ນ​ສະເໝີ​ປາຍທີ່​ຢາກ​ສ້າງ​ໃຫ້​ໂລກ​ນີ້​ປອດ​ອາວຸດ​ນິວ​ເຄ​ລຍ, ກໍ​ຄື​ເປັນ​ການ​ປະກອບສ່ວນ​ສະ ໜັບສະໜູນ​ຄວາມ​ພະຍາຍາມ​ຂອງ​ວົງ​ຄະນາ​ຍາດ​ສາກົນກ່ຽວ​ກັບ​ການ​ເກືອດ​ຫ້າມ ແລະ ການ ລຶບລ້າງ​ອາວຸດ​ນິວ​ເຄ​ລຍທີ່​ເປັນ​ໄພ​ຂົ່ມຂູ່​ອັນ​ຮ້າຍ​ແຮງ​ຕໍ່​ມວນ​ມະນຸດ​ໃນ​ໂລກ.
(ຂ່າວ: ກົມ​ການ​ຂ່າວ)