ລັດ­ຖະ­ມົນ­ຕີ​ກະ­ຊວງ ປທສ ຕ້ອນ­ຮັບທູດ​ເອີ​ຣົບ

30.09.2019 9:24     

   ໃນ​ວັນ​ທີ 27 ກັນຍານີ້, ທ່ານ ທັນ​ສະໄໝ ກົມ​ມະ​ສິດ ລັດຖະມົນຕີ​ກະຊວງໄປສະນີ, ໂທລະ​ຄົມມະນາຄົມ ແລະ ການ​ສື່ສານ (ປທສ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງທ່ານ ເລ​ໂອ ຟາ​ແບກ ເອກ​ອັກ​ຄະ​ລັດ​ຖະ​ທູດ​ແຫ່ງ​ສະຫະພາບ​ເອີ​ຣົບ (EU) ປະ​ຈໍາ ສປປ ລາວ ແລະ ໜ່ວຍ​ງານ​ຄວາມ​ປອດ​ໄພ​ທາງ​ດ້ານ​ຄອມ​ພິວ​ເຕີ EU ໃນ​ການ​ປຶກສາ​ຫາລື​ກ່ຽວ​ກັບ​ວຽກ​ງານ​ການ​ຮ່ວມ​ມື​ໃນ​ຕໍ່​ໜ້າ.

   ໃນ​ໂອກາດ​ນີ້, ທ່ານ ທັນ​ສະໄໝ ກົມ​ມະ​ສິດ ໄດ້​ສະແດງ​ຄວາມ​ຍິນດີ​ຕ້ອນຮັບ, ຊົມເຊີຍ ພ້ອມ​ທັງ​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຂໍ່າ​ນັບແລະ ພົບ​ປະ​ຂອງທ່ານ ເລ​ໂອ ຟາ​ແບກ ພ້ອມ​ດ້ວຍ​ໜ່ວຍ​ງານ​ຄວາມ​ປອດ​ໄພ​ທາງ​ດ້ານ​ຄອມ​ພິວເຕີ EU. ພ້ອມ​ນີ້, ສອງ​ຝ່າຍກໍໄດ້​ມີ​ ການ​ປຶກສາ​ຫາລື​ກ່ຽວ​ກັບ​ແຜນ ການ​ຮ່ວມ​ມື​ກັນ​ທາງ​ດ້ານ​ວຽກ​ງານ ໄອ​ຊີ​ທີ ໂດຍ​ສະເພາະຂົງ ເຂດ​ວຽກ​ງານຄວາມ​ປອດ​ໄພ​ທາງ​ໄຊ​ເບີ (Cybercecurity) ແລະ ຄວາມ​ໝັ້ນຄົງ ທາງ​ໄຊ​ເບີ (Cyber Resilience) ຊຶ່ງ​ກໍາ​ລັງ​ຂະຫຍາຍ​ໂຄງການ​ມາ​ຍັງ​ປະເທດ​ອາຊຽນ ກໍຄື ສປປ ລາວ ໂດຍ​ໂຄງການ​ດັ່ງກ່າວແມ່ນ​ສຸມ​ໃສ່ການສ້າງ​ ຄວາມ​ເຂັ້ມແຂງ​ດ້ານ​ນະໂຍ ບາຍ​ຄວາມ​ປອດ​ໄພ​ທາງ​ໄຊ​ເບີ, ສົ່ງເສີມ​ຄວາມ​ສາມາດ​ ໃນ​ການ​ຕອບ​ໂຕ້​ເຫດ​ສຸກ​ເສີນ​ດ້ານ​ຄວາມ​ປອດ​ໄພ​ທາງ​ໄຊ​ເບີ ແລະ ການ​ສົ່ງເສີມ​ເຄືອ​ຂ່າຍ​ຊ່ຽວຊານ ແລະ ການ​ຮ່ວມ​ມື​ທາງ​ໄຊ​ເບີ. ນອກ​ນີ້, ທັງ​ສອງ​ຝ່າຍຍັງ​ໄດ້​ມີ​ການ​ແລກປ່ຽນ, ຖອດຖອນ​ບົດຮຽນ ຊຶ່ງ​ກັນ ແລະ ກັນ​ໃນ​ການ​ພັດທະນາ, ການ​ນໍາ​ໃຊ້ໄອ​ຊີ​ທີໃຫ້​ມີ​ຄວາມ​ປອດ​ໄພ​ສູງ, ສາມາດ​ເຊື່ອມ​ໂຍງ​ກັບ​ພາກ​ພື້ນ ແລະ ສາກົນ​ໄດ້.

   ໃນ​ຕອນ​ທ້າຍ, ທ່ານ ເລ​ໂອ ຟາ​ແບກ ແລະ ໜ່ວຍ​ງານ​ຄວາມ​ປອດ​ໄພ​ທາງ​ດ້ານ​ຄອມ​ພິວ​ເຕີ ກໍໄດ້​ສະແດງ​ຄວາມຂອບໃຈ ທ່ານລັດຖະມົນຕີກະຊວງ ປທສ ທີ່​ໄດ້​ຕ້ອນຮັບ​ອັນ​ອົບ​ອຸ້ນໃນ​ຄັ້ງ​ນີ້ີ້.
(ຂ່າວ: ຫ້ອງການ, ພະ​ແນກ​ເລຂາ​ນຸ​ການ​-​ພິທີ​ການ)