ທູດ​ລາວ ຍ່ືນ​ສານ​ຕາ​ຕັ້ງ​ຕໍ່​ຮອງ​ສົມ­ເດັດ​ເຈົ້າ​ຊີ­ວິດ ແຫ່ງ ລັດ​ກາ​ຕາ

30.09.2019 9:28     

   ທ່ານ ສີ​ສອນ​ໄຊ ເຫງົ້າ​ວົງ​ສີ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ​ ສາທາລະນະ​ລັດ ປະຊາທິປະ ໄຕ ປະຊາຊົນ​ລາວ ປະຈຳ​ລັດ​ກູ​ເວດ ໄດ້​ຍື່ນ​ສານ​ຕາ​ຕັ້ງ​ຕໍ່​ຮອງ​ສົມເດັດ​ເຈົ້າ​ຊີວິດ​ກາ​ຕາ, ທ່ານ ແຊກ ອາບ ດູນ​ລາ​ບິນ ສາ​ມັດ ບິນ ກາ​ລີ​ຟາ ອານ​ທາ​ນີ (H.H. Sheikh Abdullah bin Hamad bin Khalifa Al Thani) ເມື່ອບໍ່​ດົນ​ມານີ້ ເພື່ອດໍາ​ລົງຕໍາ ​ແໜ່​ງ​ເປັນ​ເອກ​ອັກ​ຄະ​ລັດ​ຖະ​ ທູດ​ວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສປປ ລາວ ປະຈຳ​ລັດ​ກາ​ຕາ ໂດຍ​ມີ​ສໍາ​ນັກ​ງານ​ຕັ້ງ​ຢູ່​ລັດ​ກູ​ເວດ.

   ໃນ​ໂອກາດ​ອັນ​ສໍາ​ຄັນ​ນີ້, ຮອງ​ສົມເດັດໄດ້​ກ່າວ​ສະແດງ​ຄວາມ​ຍິນດີ​ຕ້ອນຮັບ ແລະ ຊົມເຊີຍ​ຕໍ່​ທ່ານ​ທູດ​ທີ່​ໄດ້​ຮັບ​ການ​ແຕ່ງຕັ້ງ​​ເປັນ​ເອກອັກຄະ​ລັດ​ຖະ​ທູດ​ວິສາມັນ​ຜູ້​ມີ​ອໍາ​ນາດ​ເຕັມ​ ແຫ່ງ ສປປ ລາວ ປະຈຳ​ລັດ​ກາ​ຕາ ຄົນ​ໃໝ່ ເພື່ອ​ສືບຕໍ່​ປະຕິບັດ​ໜ້າທີ່​ການທູດ ​ອັນ​ສົມ​ກຽດ ແລະ ສູງ​ສົ່ງ​ດັ່ງກ່າວ ພ້ອມ​ນັ້ນ​ກໍ​ເຊື່ອ​ໝັ້ນ​ວ່າ ທ່ານ​ຈະ​ສືບຕໍ່​ປະຕິບັດ​ໜ້າທີ່​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່​ດີ​ທີ່​ມີ​ມາ​ແລ້ວ​ລະຫວ່າງສອງ​ປະເທດໃຫ້​ຂະ ຫຍາຍຕົວຍິ່ງໆ​ຂຶ້ນ ແລະ ຂໍ​ອວຍພອນ​ໃຫ້​ທ່ານ​ທູດ ​ຈົ່ງ​ປະ ສົບ​ຜົນສຳເລັດ​ໃນ​ໜ້າທີ່​ຂອງ​ຕົນ​ດ້ວຍ. ທ່ານຮອງ​ສົມເດັດ​ໄດ້​ສະແດງ​ຄວາມ​ຍິນດີ​ສືບຕໍ່​ຮ່ວມ​ມື​ກັນ ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ມີ​ມາ​ແລ້ວ ລະຫວ່າງສອງ​ປະເທດ​ໃຫ້​ຂະ ຫຍາຍຕົວ​ຍິ່ງໆ​ຂຶ້ນ ພ້ອມ​ກັນ​ນັ້ນ ກໍ​ຂໍ​ສົ່ງ​ຄຳ​ຢ້ຽມຢາມ ແລະ ອວຍພອນ​ອັນ​ປະເສີດ​ຈາກ​ສົມເດັດ​ເຈົ້າ​ຊີວິດ ແຫ່ງ​ລັດ​ກາ​ຕາ ໄປ​ຍັງ​ພະນະ​ທ່ານ ບຸນຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ ຈົ່ງ​ມີ​ພະລາ​ໄມ​ສົມ ບູນ ແລະ ຄວາມ​ຜາ​ສຸກ​ດ້ວຍ.

   ທ່ານ​ທູດໄດ້​ສະແດງ​ຄວາມ​ຂອບໃຈ​ຕໍ່​ຄຳ​ຢ້ຽມ​ຢາມ ຖາມ​ຂ່າວ​ ແລະ ພອນ​ໄຊອັນ​ປະ​ເສີດ​ຂອງ​ຮອງ​ສົມ​ເດັດ ແລະ ຢືນຢັນ​ວ່າ ຈະຕັ້ງໜ້າປະຕິບັດ​ ໜ້າທີ່​ການ​ທູດ​ໃຫ້​ດີ​ທີ່ສຸດ ເພື່ອ​ ສືບຕໍ່​ເສີມ​ຂະຫຍາຍສາຍພົວ ພັນ​ທີ່​ດີ​ທີ່​ມີ​ມາ​ແລ້ວ ລະຫວ່າງ ສອງ​ປະເທດ​ໃຫ້​ຂະຫຍາ​ຍ​ຕົວ​ຍິ່ງໆ​ຂຶ້ນ ແລະ ຂໍ​ຖື​ໂອກາດ​ນີ້​ ສົ່ງຄຳ​ຢ້ຽມຢາມ ແລະ ອວຍ ພອນ​ອັນ​ປະເສີດ​ຈາກ​ພະນະ​ທ່ານ ບຸນ​ຍັງ ວໍລະຈິດ ປະທານ​ປະເທດ ແຫ່ງ ສປປ ລາວ ຜ່ານ​ຮອງ​ສົມເດັດ​ໄປ​ຍັງ​ສົມເດັດ ທ່ານ ແຊກ ຕາ​ມິນ ບິນ ຮາ​ມັດ ອານ​ທາ​ນີ (HH. Sheikh Tamin Bin Hamad AI-Thani ຈົ່ງ​ມີ​ພະລາ​ນາໄມ​ສົມບູນ ແລະ ມີ​ຄວາມ​ຜາ​ສຸກ ແລະ ຂໍ​ໃຫ້​ປະຊາຊົນ​ກາ​ຕາ ຈົ່ງ​ມີ​ຄວາມ​ກ້າວໜ້າ​ວັດທະນາ​ຖາ​ວອນ​ຕະຫຼອດ​ໄປ. ສ​ປ​ປ ລາວ ແລະ ລັດກາ​ຕາ​ໄດ​້​ສ້າງ​ຕັ້ງ​ສາຍ​ພົວ​ພັນການ​ທູ​ດ​ນຳ​ກັນ ໃນ​ວັນ​ທີ 3/2/2005 ເປັນ​ຕົ້ນ​ມາ.

   ກ່ອນ​ການ​ເຂົ້າ​ຍື່ນ​ສານ​ຕາ​ຕັ້ງ​ຕໍ່​ຮອງ​ເຈົ້າ​ຊີວິດ​ລັດ​ກາ​ຕາ, ທ່ານ​ເອກ​ອັກ​ຄະ​ລັດ​ຖະ​ທູດ​ໄດ້​ເຂົ້າ​ຍື່ນ​ສໍາ​ເນົາ​ສານ​ຕາ​ຕັ້ງ​ຕໍ່​ທ່ານ ອາ​ເມັດ ບິນ ຮັດ​ສັນ ອານ ທາ​ນີ (H.E Dr. Ahmed bin Hassan Al Thani) ຮອງ​ລັດຖະມົນຕີ​ກະ ຊວງ​ຕ່າງປະເທດ ແຫ່ງ​ ລັດ​ກາ​ຕາ.
(ຂ່າວ-ພາບ: ກົມ​ການ​ຂ່າວ)