ຮອງ​ປະ­ທານ​ປະ­ເທດ ຕ້ອນ­ຮັບ​ທູດ​ໄທ ເຂົ້າ​ຢ້ຽມ​ອຳ​ລາ

01.10.2019 8:56     

   ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ​ ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ອຳ​ລາ​ຂອງ​ທ່ານ ກຽດ​ຕິ​ຄຸນ ຊາດ​ປຣະ​ເສີດ ເອກ​ອັກ​ຄະ​ຣາ​ຊະ​ທູດ​ວິສາມັນ​ຜູ້​ມີ​ອຳນາດ​ເຕັມ ​ແຫ່ງ ​ຣາ​ຊະ​ອານາຈັກ​ໄທ​ປະຈຳ ສປປ ລາວ ໃນ​ວັນ​ທີ 30 ກັນຍາ​ນີ້ ທີ່​ທຳ​ນຽບ​ປະທານ​ປະ​ເທດ .
ໃນ​ໂອກາດ​ດັ່ງກ່າວ​ ທ່ານ​ຮອງ​ປະທານ​ປະເທດ​ກໍ​ໄດ້​ສະແດງ​ຄວາມ​ຊົມເຊີຍ​ຕໍ່​ການ​ປະຕິບັດ​ໜ້າທີ່​ວຽກ​ງານ​ການ​ທູດ​ຢູ່ ສປປ ລາວ ຕະຫຼອດໄລຍະ​ເວລາ​ຜ່ານ​ມາຈົນ​ສຳເລັດໜ້າທີ່​ອັນ​ຈົບງາມ ພ້ອມ​ທັງ​ອວຍພອນ​ໃຫ້​ທ່ານ​ທູດເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ ແລະ ປະສົບ​ຜົນສຳເລັດ​ຕໍ່ໜ້າ​ທີ່​ວຽກ​ງານ​ໃໝ່​ຂອງ​ທ່ານ​ທູດ .

   ທ່ານ   ກຽດ​ຕິ​ຄຸນ   ຊາດ​ປຣະ​ເສີດ   ກໍ​ໄດ້​ສະແດງ​ຄວາມ​ຂອບ​ອົກ​ຂອບໃຈ​ຕໍ່ ທ່ານຮອງ​ປະທານ​ປະເທດ ແຫ່ງ ສປປ ລາວ ທີ່​ໄດ້​ເສຍສະຫຼະ​ເວລາ​ອັນ​ມີຄ່າ​ໃຫ້ການ​ຕ້ອນຮັບ​ໃນ​ຄັ້ງ​ນີ້ ພ້ອມ​ທັງ​ສະແດງ​ຄວາມ​ຂອບ​ອົກ​ຂອບໃຈ​ຕໍ່​ລັດຖະບານ ແລະ ປະຊາຊົນ​ລາວ ທີ່​ໃຫ້ການ​ຮ່ວມ​ມື ແລະ ອຳນວຍ​ຄວາມ​ສະດວກ​ໃນ​ການ​ປະຕິບັດ​ໜ້າທີ່​ວຽກ​ງານ​ການ​ທູດ ຈົນ​ປະສົບ​ຜົນສຳເລັດ​ຢ່າງ​ຈົບງາມ ແລະ ຫວັງ​ຢ່າງ​ຍິ່ງ​ວ່າ ສາຍ​ພົວພັນ​ທາງ​ການ​ທູດ​ລະຫວ່າງ​ໄທ ແລະ ລາວ ຈະ​ໄດ້​ຮັບ​ການ​ເສີມ​ຂະຫຍາຍ​ຍິ່ງໆ​ຂຶ້ນ .
 ຂ່າວ​ -ພາບ : ສຸກ​ສາຄອນ