ສະ­ມັດ­ຊາ​ໃຫຍ່​ອົງ­ການ​ສະ­ຫະ​ປະ­ຊາ­ຊາດ ດຳ­ເນີນ​ກອງ​ປະ­ຊຸມ​ປະ­ຈຳ​ປີ ສະ­ໄໝ​ທີ 74

01.10.2019 8:52     

   ກອງ​ປະ­ຊຸມ​ພາກ​ອະ­ພິ ­ປາຍ​ທົ່ວ​ໄປຂອງ​ສະ­ມັດ­ຊາ​ໃຫຍ່​ອົງ­ການ​ສະ­ຫະ​ປະ­ຊາ ­ຊາດ​ສະ­ໄໝ​ທີ 74 ໄດ້​ເປີດຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 24 ກັນ­ຍາ 2019 ຜ່ານ​ມາ ຢູ່ ສໍາ​ນັກ​ງານ​ໃຫຍ່​ຂອງ​ອົງ­ການ​ສະ­ຫະ​ປະ​ຊາ​ຊາດ ທີ່ນະ­ຄອນ​ນິວ​ຢອກ ສະ­ຫະ­ລັດ​ອາ​ເມ​ຣິ​ກາ ພາຍ​ໃຕ້​ການ​ເປັນ​ປະ­ທານ​ຂອງທ່ານ ສາ​ສະ​ດາ​ຈານ Tijjani Muhammad-Bande, ປະ­ທານ​ສະ­ມັດ­ຊາ​ໃຫຍ່ ສປຊ ສະ­ໄໝ​ທີ 74 ຈາກ​ປະ­ເທດ ໄນ​ຈີ​ເຣຍ ໂດຍ​ມີ​ຫົວ­ໜ້າ​ຄະ­ນະ​ຜູ້​ແທນ​ຂັ້ນ​ປະ­ມຸກ​ລັດ, ຫົວ­ໜ້າ​ລັດ­ຖະ­ບານ ແລະ ຮອງ​ປະ­ທານ​ປະ­ເທດ ຈໍາ​ນວນ 149 ທ່ານ, ຂັ້ນ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ລັດ­ຖະ­ມົນ­ຕີ​ການ​ຕ່າງ ­ປະ­ເທດ 42 ທ່ານ ໄດ້​ເຂົ້າ​ຮ່ວມ ແລະ ຜັດ­ປ່ຽນ​ກັນ​ຂຶ້ນ​ກ່າວ​ປາ​ໄສ. ກອງ​ປະ­ຊຸມ​ສະ­ມັດ­ຊາ​ໃຫຍ່​ຄັ້ງ​ນີ້ ໄດ້​ດໍາ​ເນີນ ​ພາຍ​ໃຕ້​ຫົວ­ຂໍ້ "ການ​ເພີ່ມ​ທະ­ວີ​ຄວາມ​ພະ­ຍາ ­ຍາມ​ໃນ​ການ​ຮ່ວມ​ມື​ຫຼາຍ​ຝ່າຍ ເພື່ອ​ລຶບ­ລ້າງ​ຄວາມ­ທຸກ​ຍາກ, ການ​ສຶກ­ສາ​ທີ່​ມີ​ຄຸນ​ນະ​ພາບ, ການ​ຮັບ​ມື​ການ​ປ່ຽນ­ແປງ​ດິນ​ຟ້າ​ອາ­ກາດ ແລະ ການ​ມີ​ສ່ວນ​ຮ່ວມ​ຢ່າງ​ທົ່ວ​ເຖິງ (Galvanizing multilateral efforts for poverty eradication, quality education, climate action and inclusion ຊຶ່ງ​ເປັນ​ເວ​ທີ​ສໍາ​ລັບ​ຜູ້​ນໍາ​ຂັ້ນ​ສູງ​ຈາກ​ປະ­ເທດ​ຕ່າງໆ ຖະ­ແຫຼງ​ທັດ­ສະ­ນະ​ຂອງ​ປະ­ເທດ​ຕົນ​ຕໍ່​ກັບ​ບັນ­ຫາ​ສຳ­ຄັນ​ຕ່າງໆ​ຂອງ​ໂລກເຊັ່ນ: ບັນ­ຫາ​ສັນ­ຕິ­ພາບ ແລະ ຄວາມ​ໝັ້ນ ຄົງ​ສາ­ກົນ, ການ​ກໍ່​ການ​ຮ້າຍ, ຄວາມ​ບໍ່​ສະ­ຫງົບ​ຢູ່​ຕາ­ເວັນ​ອອກ​ກາງ, ການ​ບໍ່​ແຜ່­ຜາຍ​ອາ­ວຸດ​ນິວ​ເຄ​ລຍ, ການ​ປ່ຽນ­ແປງ​ດິນ​ຟ້າ​ອາ­ກາດ, ໄພ­ພິ­ບັດ​ທາງ​ທຳ​ມະ​ຊາດ, ຂໍ້​ຂັດ​ແຍ່ງ​ທາງ​ດ້ານ​ການ​ຄ້າ, ອາ​ຊະ​ຍາ​ກຳ​ຂ້າມ​ຊາດ, ການ​ຄ້າ­ຂາຍ​ຢາ​ເສບ​ຕິດ, ການ​ເຄື່ອນ​ຍ້າຍ​ຖິ່ນ​ຖານ, ການ​ລຶບ­ລ້າງ​ຄວາມທຸກ​ຍາກ, ໄພ​ອຶດ­ຫິວ, ຄວາມ​ສະ­ເໝີ­ພາບ​ຍິງ​-​ຊາຍ, ການ​ຈໍາ​ແນ​ກ​ເຊື້ອ​ຊາດ​ຜິວ​ພັນ ແລະ ບັນ­ຫາ​ອື່ນໆທີ່​ຕິດ​ພັນ​ໂດຍ​ກົງ​ຕໍ່​ການ​ປົກ​ປັກ​ຮັກ ­ສາ​ສັນ­ຕິ­ພາບ​ໂລກ ແລະ ການ​ພັດ­ທະ­ນາ​ຂອງ​ສາ​ກົນ. ຜູ້­ນຳ​ຈາກ​ຫຼາຍປະເທດ​ຕ່າງ​ກໍ​ໄດ້​ໃຫ້​ຄຳ​ໝັ້ນ​ສັນ­ຍາ ໃນ​ການ​ປະ ­ກອບ­ສ່ວນ​ເຂົ້າໃນ​ການ​ແກ້​ໄຂ​ສິ່ງ​ທ້າ​ທາຍ​ຕ່າງໆທີ່​ປະຊາ​ຄົມ​ໂລກ​ພວມ​ປະ​ເຊີນ​ໜ້າ ພ້ອມ​ທັງ​ຮຽກ­ຮ້ອງ​ໃຫ້​ວົງ​ຄະ­ນະ​ຍາດ​ສາ­ກົນ​ເພີ່ມ​ທະ­ວີ​ການ​ຮ່ວມ​ມື​ກັນ​ໃຫ້​ຫຼາຍ​ຂຶ້ນ​ ເພື່ອ​ປະ­ກອບ ­ສ່ວນ​ເຂົ້າ​ໃນ​ການ​ປົກ​ປັກ​ຮັກ­ສາ​ສັນ­ຕິ­ພາບ, ຄວາມ​ໝັ້ນ­ຄົງ ແລະ ສົ່ງ­ເສີມ​ການ​ພັດ­ທະ­ນາ​ແບບ​ຍືນ​ຍົງ​ຢູ່​ໃນ​ໂລກ​ນີ້ ບົນ​ຫຼັກ­ການ​ແຫ່ງ​ຄວາມ​ສະເໝີ­ພາບພາຍ​ໃຕ້​ກົດ­ໝາຍ​ສາ​ກົນ. ປະ­ທານ​ສະ­ມັດ­ຊາ​ໃຫຍ່ ຍັງ​ໄດ້​ຖະ­ແຫຼງ 5 ຂົງ­ເຂດ​ວຽກ​ງານ​ທີ່​ເປັນ​ບຸ­ລິ ມະ­ສິດຂອງ​ຕົນ ເພື່ອ​ເປັນ​ທິດ​ທາງ​ໃຫ້​ປະ­ເທດ​ສະ­ມາ­ຊິກ​ຮ່ວມ​ກັນ​ປຶກ­ສາ​ຫາ­ລື ແລະ ພ້ອມ​ກັນ​ແກ້​ໄຂຄື: ການ​ລຶບ­ລ້າງ​ຄວາມ ­ທຸກ​ຍາກ, ການ​ລຶບ­ລ້າງ​ໄພ​ອຶດ​ຫີວ, ການ​ສົ່ງ­ເສີມ​ການ​ສຶກ­ສາ​ທີ່​ມີ​ຄຸນ​ນະ​ພາບ, ການ​ແກ້​ໄຂ​ບັນ­ຫາ​ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ໂດຍ​ການ​ມີ​ສ່ວນ​ຮ່ວມ​ຂອງ​ທຸກ​ພາກ­ສ່ວນ​ໃນ​ສັງ​ຄົມ. ຄະ­ນະ​ຜູ້​ແທນ ສປປ ລາວ ນໍາ​ໂດຍທ່ານ ສະ­ເຫຼີມໄຊ ກົມ​ມະ​ສິດ ລັດ­ຖະ­ມົນ­ຕີ​ກະຊວງ​ ການ​ຕ່າງ­ປະ­ເທດ​ຂຶ້ນ​ກ່າວ​ປາ​ໄສ​ໃນ​ພາກ​ອະ­ພິ­ປາຍ​ທົ່ວ​ໄປ​ຂອງ​ກອງ​ປະ­ຊຸມ​ສະ­ມັດ­ຊາ​ໃຫຍ່ ສປຊ ໃນ​ຕອນ​ບ່າຍ​ຂອງ​ວັນ​ທີ 28 ກັນ­ຍາ 2019. ຫຼັງ​ຈາກ​ນັ້ນ, ກອງ​ປະ­ຊຸມ​ດັ່ງ­ກ່າວ​ຈະ​ສືບ​ຕໍ່​ດໍາ​ເນີນ​ໄປ​ຈົນ​ເຖິງ​ວັນ​ທີ 30 ກັນ­ຍາ 2019.

   ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ສະ­ມັດ­ຊາ​ໃຫຍ່​ຄັ້ງ​ນີ້, ຄະ­ນະ​ຜູ້​ແທນ ສປປ ລາວ ຍັງ​ໄດ້​ເຂົ້າ​ຮ່ວມ​ກອງ​ປະ­ຊຸມ​ປິ່ນ​ອ້ອມ​ຈຳ­ນວນ​ໜຶ່ງເຊັ່ນ: ກອງ​ປະ­ຊຸມ​ສຸດ​ຍອດ ເພື່ອ​ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ, ກອງ​ປະ­ຊຸມ​ປຶກ­ສາ​ຫາ­ລື​ລະ­ດັບ​ສູງ ວ່າ​ດ້ວຍ​ການ​ເງິນ ​ເພື່ອ​ການ​ພັດ­ທະ­ນາ, ກອງ​ປະ­ຊຸມ​ສຸດ​ຍອດ ວ່າ​ດ້ວຍ​ການ​ປ່ຽນ­ແປງ​ດິນ​ຟ້າ​ອາ­ກາດ ຊຶ່ງ​ເປັນ​ກົນ​ໄກ​ທົບ​ທວນ​ຄົບ­ຮອບ 4 ປີ ພາຍຫຼັງ​ທີ່​ໄດ້​ຮັບ­ຮອງ​ເອົາ​ວາ­ລະ 2030 ເພື່ອ​ການ​ພັດ­ທະ­ນາ​ແບບ​ຍືນ​ຍົງ ໂດຍ​ປະ­ເທດ​ສະ­ມາ­ຊິກ ສປຊ ໃນ​ປີ 2015.
(ຂ່າວ: ກົມ​ການ​ຂ່າວ)