ລັດ­ຖະ­ມົນ­ຕີ​ກະ­ຊວງ ຍທຂ ຕ້ອນ­ຮັບເອກ​ອັກ​ຄະ​ລັດ​ຖະ​ທູດ​ສິງ­ກະ­ໂປ

10.10.2019 8:34     

   ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ ໂຍທາ​ທິ​ການ ແລະ ຂົນສົ່ງ (ຍທຂ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ​ຂອງ ທ່ານ ນາງ ແລວ ສຸລິນ (Leow Siu Lin) ເອກ​ອັກ​ຄະ​ລັດ​ຖະ​ທູດ​ສິງກະໂປ ປະຈຳ ສປປ ລາວ ເຂົ້າ​ຢ້ຽມ​ຂ່ຳນັບ​ໃນ​ວັນ​ທີ 8 ຕຸລາ​ຜ່ານ​ມາ ທີ່​ຫ້ອງ​ຮັບແຂກ​ກະຊວງ ຍທຂ ເນື່ອງ​ໃນ​ໂອກາດ​ທີ່​ທ່ານ ມາ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​​ຖະ​ທູດ​ສິງກະໂປ​ຄົນ​ໃໝ່​ປະຈຳ​ລາວ.

   ໃນ​ໂອກາດ​ດັ່ງກ່າວ ທ່ານ ບຸນ​ຈັນ ສິນ​ທະ​ວົງ ກໍ​ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຊົມເຊີຍ ພ້ອມ​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຂ່ຳນັບ​ຂອງ ທ່ານ ນາງ Leow Siu Lin ຊຶ່ງ​ມາ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​​ລັດ​ຖະ​ທູດ​ສິງກະໂປ​ຄົນ​ໃໝ່ ປະ​ຈໍາ ສປປ ລາວ ຄັ້ງ​ນີ້ເປັນ​ຂີດ​ໝາຍ​ສຳຄັນ ໃນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື, ຊ່ວຍເຫຼືອ​ຊຶ່ງ​ກັນ ແລະ ກັນ​ລະຫວ່າງ ລາວ​-​ສິງກະໂປ ໃຫ້​ເຕີບ​ໃຫຍ່​ຂະຫຍາຍຕົວ ແລະ ແໜ້ນ​ແຟ້ນ​ຍິ່ງ​ຂຶ້ນ ພ້ອມ​ດຽວ​ກັນ​ນັ້ນ ຍັງ​ໄດ້​ມີ​ການ​ປຶກສາ​ຫາລື​ກ່ຽວ​ກັບ​ການ​ສືບຕໍ່​ວຽກ​ງານ​ການ​ຮ່ວມ​ມື​ແລກປ່ຽນ, ວຽກ​ງານ​ການ​ພັດທະນາ​ພື້ນຖານ​ໂຄງ​ລາງ​ຕື່ມ​ອີກ. ທ່ານ​ທູດ​ກໍ​ໄດ້​ສະແດງ​ຄວາມ​ຂອບໃຈ​ຕໍ່​ທ່ານ ລັດຖະມົນຕີ​ກະຊວງ ຍທຂ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ​ໃນ​ຄັ້ງ​ນີ້.
(ຂ່າວ​-​ພາບ:ກະຊວງ ຍທຂ)