ສິງ­ກະ­ໂປ ສະ­ຫຼອງ​ວັນ­ຊາດ ແລະ ວັນ​ສ້າງ­ຕັ້ງສາຍ​ພົວ­ພັນ​ການ​ທູດ ສິງ​ກະ​ໂປ​-ສປປ ລາວ

14.10.2019 8:35     

   ສະຖານ​ເອກ​ອັກ​ຄະ​ລັດ​ ຖະ​ທູດ ແຫ່ງ ສິງກະໂປ ປະ ຈຳ ສປປ ລາວ ໄດ້​ຈັດງານລ້ຽງ ສະເຫຼີມສະຫຼອງວັນຊາດສິງ ກະໂປ ຄົບຮອບ 54 ປີ (9/8/ 1965-9/8/2019) ແລະ ສະ ເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ​ກັບ ສປປ ລາວ ຄົບຮອບ 45 ປີ (2/12/1974 -2/12/2019) ໃນ​ວັນ​ທີ 11 ຕຸລາ ຜ່ານ​ມາ ທີ່​ນະຄອນຫຼວງ​ວຽງ​ ຈັນ ໂດຍ​ມີທ່ານ ສະເຫຼີມໄຊ ກົມ​ມະສິດ ລັດຖະມົນຕີ​ກະຊວງ ​ການ​ຕ່າງປະເທດ, ທ່ານນາງ ສູນ​ທອນ ໄຊ​ຍະ​ຈັກ ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ປປ ລາວ, ທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ກະ ຊວງ​ສາທາລະນະ​ສຸກ, ມີ​ບັນດາ​ທ່ານ​ຮອງ​ລັດຖະມົນຕີ, ບັນດາ​ທູຕານຸທູດ​ປະເທດເພື່ອນ​ມິດ ແລະ ອົງການ​ຈັດ​ຕັ້ງ​ສາກົນ ປະ ຈຳ ສປປ ລາວ ເຂົ້າ​ຮ່ວມ.

   ທ່ານນາງ ລຽວ ຊິວ ລິນ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ ແຫ່ງ ສາທາລະນະ​ລັດ​ສິງກະໂປ ປະຈຳ ສປປ ລາວ ກ່າວ​ວ່າ:ປີ​ນີ້​ເປັນ​ປີ​ທີ່​ສຳຄັນ​ສອງຢ່າງ ຊຶ່ງ​ອັນ​ທີໜຶ່ງແມ່ນ​ການ​ລະນຶກ​ວັນຊາດ​ຂອງ​ສິງກະໂປ ຄົບ ຮອບ 54 ປີ, ລະນຶກ​ເຖິງ​ອັນ​ທີ່​ເປັນ​ປັດ​ໄຈ​ສຳຄັນທີ່​ເຮັດໃຫ້​ ເກີດ​ມີ​ປະຫວັດສາດ ແລະ ການ ​ພັດທະນາ​ຂອງ​ສິງ​ກະໂປ. ອັນ​ທີ​ສອງແມ່ນ​ປີ​ນີ້​ເປັນ​ປີ​ທີ່​ມີ​ຄວາມ​ໝາຍ​ຄວາມ​ສຳຄັນ​ລະຫວ່າງ ສາທາລະນະ​ລັດ ສິງກະໂປ ແລະ ສປປ ລາວ ຊຶ່ງ​ເປັນ​ປີ​ຄົບຮອບ 45 ປີ ແຫ່ງ​ການ​ສ້າງຕັ້ງ​ສາຍ​ພົວພັນ​ການ​ທູດ​ຂອງ​ສອງ​ປະ​ເທດ. ສິງກະໂປ -ລາວ ມີ​ມິດຕະພາບ​ອັນ​ຍາວ​ນານ, ມີ​ສາຍ​ພົວພັນ ແລະ ການ​ຮ່ວມ​ມື​ທີ່​ດີ​ໃນ​ຫຼາຍ​ຂົງເຂດ​ວຽກ​ງານ ທັງ​ໃນ​ຂອບ​ສອງ​ຝ່າຍ ສິງກະໂປ ລາວ ແລະ ໃນ​ຂອບ ​ອາ​ຊຽນ. ສະເພາະໃນຂອບສອງ​ ຝ່າຍ, ການ​ນໍາ​ຂັ້ນ​ສູງຂອງ​ສອງ​ປະເທດໄດ້​ມີ​ການ​ແລກປ່ຽນ​ຢ້ຽມຢາມ​ ຊຶ່ງ​ກັນ ແລະ ກັນ ໃນ​ແຕ່​ລະ​ປີ​ຢ່າງ​ປົກກະຕິ, ການ​ຮ່ວມ​ມື​ທາງ​ດ້ານ​ເສດຖະກິດ ກໍ​ໄດ້​ຮັບ​ຄວາມ​ສົນໃຈ​ຈາກບັນ ດາ​ບໍລິສັດ​ຂອງ​ສິງກະໂປ ທີ່​ມາ​ຊອກ​ຫາ​ກາລະ​ໂອກາດການ ​ເຮັດ​ທຸລະ​ກິດ​ຢູ່​ລາວ​ໃນ​ຫຼາຍ ​ຂະແໜງ, ການ​ແລກປ່ຽນ​ໄປ ມາຫາສູ່​ລະຫວ່າງ​ປະຊາຊົນ​ສອງ​ປະເທດແມ່ນ​ດີ​ຫຼາຍ ຊຶ່ງ​ໃນ​ແຕ່​ລະ​ປີມີ​ນັກ​ສຶກສາ​ສິງ ກະໂປ​ປະມານ 600-700 ຄົນ ເດີນທາງ​ມາ​ລາວ ເພື່ອ​ເຮັດ​ກິດ​ຈະ​ກໍາ​ອາສາ​ສະໝັກ​ຊ່ວຍເຫຼືອ​ຊຸມ​ຊົນ ແລະ ມາ​ທັດສະນະ​ສຶກສາ, ພາຍ​ໃຕ້​ແຜນ​ງານ​ໂຄງການ​ຮ່ວມ​ມື​ແຕ່​ປີ 1992 ເປັນຕົ້ນ​ມາ ມີ​ພະນັກງານ​ລັດ​ຂອງ ສປປ ລາວ ເກືອບ 14.000 ທ່ານ ໄດ້​ຮັບ​ການ​ຝຶກ​ອົບຮົມ​ໃນ​ຫຼາຍ​ຂົງເຂດ​ວຽກ​ງານ ທີ່​ຈັດ​ທັງ​ຢູ່​ລາວ ແລະ ຢູ່​ສິງ​ກະ​ໂປ.

   ໂອກາດ​ດຽວ​ກັນ​ນີ້, ທ່ານ ສະເຫຼີມ​ໄຊ ກົມ​ມະ​ສິດ ກໍ​ໄດ້​ກ່າວ​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ແຫ່ງ​ການ​ສ້າງ​ສາຍ​ພົວພັນ​ການ​ທູດ ລະຫວ່າງ ສປປ ລາວ ສິງກະໂປ ພ້ອມ​ທັງ​ອວຍພອນ​ໄຊ​ໂອກາດ​ວັນຊາດ​ສິງກະໂປ ວ່າ:ຂໍ​ຖື​ໂອກາດ​ນີ້ ຕາງໜ້າ​ໃຫ້​ລັດຖະບານ ແລະ ປະຊາຊົນ​ລາວ ສະແດງ​ຄວາມ​ຍິນດີ ແລະ ອວຍພອນ​ໄຊ​ອັນ​ປະເສີດ​ມາ​ຍັງ​ລັດຖະບານ ແລະ ປະຊາຊົນ​ສິງກະໂປ ເນື່ອງ​ໃນ​ໂອກາດ​ວັນຊາດ​ຂອງ​ສິງກະໂປ ຄົບຮອບ 54 ປີ, ຂໍ​ສະແດງ​ຄວາມ​ຍິນດີ ແລະ ຕີ​ລາຄາ​ສູງ ຕໍ່​ສາຍ​ພົວພັນ​ການ​ທູດ​ລາວ ສິງກະໂປ ຄົບຮອບ 45 ປີ ໂດຍ​ໃນ​ວັນ​ທີ 2 ທັນວາ 1974 ລາວ ແລະ ສິງກະໂປ​ໄດ້​ລົງ​ນາມ​ໃນ​ຂໍ້​ຕົກລົງ​ວ່າ​ດ້ວຍ​ການ​ສ້າງຕັ້ງ​ສາຍ​ພົວພັນ​ທາງ​ການ​ທູດ ຊຶ່ງ​ເປັນ​ຂີດ​ໝາຍ​ປະຫວັດສາດ​ໃນ​ ການ​ພົວພັນ ແລະ ການຮ່ວມ​ ມື​ທີ່​ເປັນ​ມູນເຊື້ອ​ຂອງ​ສອງປະ ເທດ ລາວ-ສິງກະໂປ, ຜ່ານ 45 ປີ ລາວ-ສິງກະໂປໄດ້​ມີ​ການ​ພົວພັນ​ມິດຕະພາບ, ມີ​ການ​ຮ່ວມ​ມື​ໃນ​ລະດັບ​ຕ່າງໆ ນັບ​ມື້​ນັບ​ຂະຫຍາຍຕົວ ແລະ ຂໍ​ຖື​ໂອກາດ​ນີ້​ສະແດງຄວາມ ​ຂອບໃຈ​ຢ່າງ​ຈິງ​ໃຈ​ຕໍ່​ລັດຖະ ບານ​ ແລະ ​ປະຊາຊົນ​ສິງກະໂປ​ທີ່​ໄດ້​ໃຫ້ການ​ຊ່ວຍເຫຼືອ​ສະໜັບ ສະໜູນ​ອັນ​ລໍ້າ​ຄ່າ​ປະກອບສ່ວນ​ຢ່າງ​ຕັ້ງໜ້າເຂົ້າ​ໃນ​ການ​ພັດທະ ນາ​ເສດຖະກິດ-ສັງຄົມ​ຂອງ ສປປ ລາວ.
(ຂ່າວ-ພາບ: ສຸກ​ສະຫວັນ)